2 SIANGPAHRANG 10
10
Jehu Nih Ahab Innchungkhar A Hrawh Hna
1Ahab nih Samaria ah fapa sawm sarih a ngeih hna. Cucaah Jehu nih ca a ṭial i Samaria khua ah khan, khua uktu hna le upa hna le Ahab fapa hna zohkhenhtu hna kha a kuat hna i, 2“Hi ca hi nan sin a phak cangka tein, nan bawipa fapa hna cu nan sin i an um caah khan le nan sinah rangleng hna le rang hna le kulh mi khua hna zong, cun hriamnam hna kha an um caah, 3nan bawipa fapa hna lak i a ṭha bik le aa tlak bik kha thim u law a pa bawi ṭhutdan cungah khan ṭhutter u law nan bawipa innchungkhar kha ral dohpiak hna u,” tiah a ti. 4Sihmanhsehlaw an ṭih tuk hringhran i, “Zohhmanh, siangpahrang pahnih hna hmanh nih khan an dirh kho lo, kannih chinchin nih zeitindah kan dirh khawh lai?” tiah an ti. 5Cucaah siangpahrang inn a zohkhenhtu le khua a zohkhenhtu hna nih khan upa hna le ngakchia zohkhenhtu hna he tiah Jehu cu bia an cah i, “Kannih cu na sal kan si ko, na kan fialmi paoh cu kan tuah lai. Ahohmanh siangpahrang ah kan ser hna lai lo; nangmah mit ah a ṭha na timi paoh kan cungah tuah ko,” tiah an ti. 6Cun ca pahnihnak a kuat hna i, “Nannih cu keimah lei ṭang nan si i ka bia ngaih awk nan i timh ahcun, nan bawipa fapa hna lu kha tan hna u law thaizing atu tikah hin ka sinah Jezreel khua ah ra u,” tiah a ti. Siangpahrang fapa cu sawm sarih an si i anmah a cawmtu hna khuachung mingan hna sinah khan an um. 7Cun ca cu an sin a phak tikah, siangpahrang fapa cu an lak hna i an thah hna, mi sawm sarih hna cu; cun an lu cu bawm ah an khumh hna i Jezreel ah cun amah sinah cun an hun kuat hna. 8Lamkaltu kha a rat i “Siangpahrang fapa hna lu cu an rak put cang,” tiah a chimh tikah, “Kutka luhnak ah khan bu hnih ah pong hna u law thaizing tiangin um hna seh,” tiah a ti. 9Cun a thaizing i a va chuah i a dir tikah, mi vialte sinah cun, “Nannih cu sualnak nan ngei lo. Ka bawipa a rawi i a thattu cu keimah ka si sihmanhsehlaw mah vialte hi aho nih dah an thah hna? 10Cucaah Bawipa nih Ahab innchungkhar kong ah a chimmi, Bawipa bia cu, sawhsawh in pakhat hmanh vawlei ah a tla lai lo, ti kha hngal tuah u; zeitintiah Bawipa nih a sal Elijah in a chimmi kha a tuah cang,” tiah a ti. 11Cucaah Ahab tefa Jezreel i a tang rihmi paohpaoh, a mi ngan vialte hna le a hawikom ṭha hna le a tlangbawi hna kha, pakhat hmanh tang loin Jehu nih a thah dih hna. #Hos 1.4
12Cun aa thawh i Samaria ah a kal. Lampi ah tuukhal hna hmun Beth-eked kha a va phak tikah, 13Judah siangpahrang Ahaziah rualchan kha Jehu nih a ton hna i, “Ahodah nan si?” tiah a ti. Annih nih, “Kannih cu Ahaziah rualchan kan si i siangpahrang fapa hna kha le siangpahrang bawinu a nu fapa hna kha va tlawn awkah kan rung,” tiah a ti. 14Anih nih, “A nung in tlai hna u,” tiah a ti i a nung in an tlaih hna i Beth-eked khor ah khan an thah hna, minung sawm li le pahnih, pakhat hmanh a zuah hna lo
15Cun khika in a kal tikah, Rekhab fapa Jehonadab kha amah ton awkah a ra; daihnak a pek i, “Na cung i ka lung zumhawktlak a si bantuk hin nang tah ka cungah na si ve maw?” tiah a ti. Cun Jehonadab nih, “Asi,” tiah a leh. Jehu nih, “A si ahcun, na kut ka chan tuah,” tiah a ti. Cucaah a kut kha a chanh. Cun Jehu nih amah sinah rangleng chungah khan a vun hnuh. 16Cun anih nih, “Ka sinah ra law, Bawipa ca i ka ṭanning hi ra zoh tuah,” tiah a ti. Cucaah a rangleng ah khan a citter. 17Cun Samaria a phak tikah Samaria i Ahab ta a tang rihmi paohpaoh kha, Bawipa nih Elijah sinah a chimmi a bia ningin, a thianh hirhiar hna hlantiang a thah hna.
Jehu Nih Baal Biaknak A Hrawh
18Khi tikah Jehu nih mi vialte kha a pumh hna i annih cu, “Ahab nih Baal cu tlawmte lawng a rian a ṭuan; sihmanhsehlaw Jehu nih cun tampi in a ṭuan lai. 19Cucaah Baal profet vialte le a biatu vialte le a tlangbawi vialte hna kha ka sinah ko hna u; pakhat hmanh bau hna hlah seh, zeitintiah Baal sin i pekchanh awk raithawinak nganpi pakhat ka ngei; a baumi paoh cu an nung lai lo,” tiah a ti. Sihmanhsehlaw Jehu nih hlennak in a tuahmi a si, Baal a biami hna hrawhnak caah khan. 20Cun Jehu nih, “Baal caah pumhnak thiang pakhat tuah u,” tiah nawl a pek. Cucaah mah cucu an thanh. 21Cun Jehu nih Israel ram chung dihlak ah bia a cah hna i Baal a biami vialte cu an ra dih, pakhat hmanh a ra lomi an um lo. Cun Baal inn chungah khan an lut i Baal inn cu khattelei kam in khattelei kam tiang an khat dih. 22Cun hnipuan chiahnak a zohkhenhtu sinah khan, “Thilpuan kha Baal biatu vialte hna caah hin rak chuah hna,” tiah a ti. Cucaah thilpuan cu a chuahpiak hna. 23Cun Jehu cu Rekhab fapa Jehonadab he khan Baal inn chungah cun an lut i Baal a biami hna cu, “Nan lakah hin Bawipa a biami pakhat hmanh an um nakhnga lo kawl hna u, Baal a biami lawnglawng um hna seh,” tiah a ti. 24Cun raithawinak le khangh thawinak pekchanh awkah khan a vung lut.
Cun Jehu nih mi sawm riat cu lengah khan a chiah hna i, “Hi mi nan kut chung i kan pekmi hna lak hin pakhat hmanh a luattertu cu nan nunnak nan sung lai,” tiah a ti hna. 25Cucaah khangh thawinak pekchanh kha a lim cangka in, Jehu nih ralvengtu hna le an bawi hna cu, “Lut u law, that hna u; pakhat hmanh luatter hna hlah u,” tiah a ti. Cucaah vainam in an sam hna i ralvengtu hna le an bawi hna nih khan lengah an hlonh hna i Baal inn chungchin dal ah khan an lut i 26Baal inn chung i a ummi tungphun kha an chuah i an khangh. 27Cun Baal tungphun kha an hrawh cikcek i Baal inn kha an hrawh cikcek i zunput ah an ser i nihin ni tiangin a si lan.
28Cuticun Jehu nih Baal cu Israel ram chungin a thianh. 29Sihmanhsehlaw Nebat fapa Jeroboam nih Israel mi a rak sualter hnanak, sui cawfa Bethel i a ummi kha le Dan i a ummi hna kha a pialtak hna lo. #1Sia 12.28-30 30Cun Bawipa nih Jehu cu, “Ka mithmuh ah a dikmi kha ṭha tein na tuah i ka lung chungah a umning dihlak in Ahab innchungkhar cungah na tuah caah, na fapa hna cu chan li tiangin Israel bawi ṭhutdan cungah an ṭhu lai,” tiah a ti. 31Sihmanhsehlaw Jehu cu Bawipa, Israel Pathian nawlbia kha a lungthin a dihumnak in zulh awkah aa ralring lo; Jeroboam nih Israel mi a sualternak hna a sualnak kha a pialtak hna lo.
32Khi caan ah khan Bawipa nih Israel ram a cheu kha thianh hram a thawk. Hazael nih Israel ram chungah a tei thluahmah hna: 33Jordan in nichuahlei ah, Gilead ram vialte, Gad mi hna le Reuben mi hna le Manasseh mi hna ram, Arnon nelrawn pawng i a ummi Aroer thawk in, Gilead le Bashan tiang. 34Jehu tuahsernak a tang rihmi hna le a tuahmi vialte le a ṭhawnnak vialte cu, Israel Siangpahrang hna Chanrelnak Cauk chungah an i ṭial lo mei? 35Cuticun Jehu cu a pupa hna sinah a it i Samaria ah an vui. Cun Jehoahaz fapa cu amah hmun ah khan a hung bawi. 36Jehu nih Israel mi Samaria in a pen hna chung cu kum kul le kum riat a si.
Currently Selected:
2 SIANGPAHRANG 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
