2 CHANRELNAK 36
36
Jehoahaz Pennak le Ṭumchuknak
(2Sia 23.31-35)
1Cu ram profet nih cun Josiah fapa Jehoahaz kha a lak i a pa hmun ah khan Jerusalem ah siangpahrang ah a ser. 2Jehoahaz cu pen hram a thawk ah kum kul le kum thum a si Jerusalem in thla thum a pen. 3Cun Jerusalem ah cun Izipt siangpahrang nih a phuah i ram cu ngunkhuai ngun talen za khat le sui talen pakhat a cawh. 4Cun a unau Eliakim kha Judah le Jerusalem siangpahrang ah cun Izipt siangpahrang nih khan a ser i a min cu Jehoiakim ah a thlen; sihmanhsehlaw a unau Jehoahaz cu Neko nih khan a lak i Izipt ah a kalpi. #Jer 22.11-12
Jehoiakim Pennak
(2Sia 23.36—24.7)
5Jehoiakim cu pen hram a thawk ah kum kul le kum nga a si i Jerusalem in kum hleikhat a pen. Bawipa a Pathian mithmuh i thil ṭhalo kha a tuah. #Jer 22.18-19; 26.1-6; 35.1-19 6Babilon siangpahrang Nebukhadnezzar nih khan a hung doh i hreng a khenh i Babilon ah a kalpi. #Jer 25.1-38; 36.1-32; 45.1-5; Dan 1.1-2 7Bawipa inn chung i a ummi umkheng a cheu hna zong kha Nebukhadnezzar nih Babilon ah a kalpi hna i Babilon i a siangpahrang inn ah cun a chiah hna. 8Jehoiakim tuahsernak a tang rihmi hna le fihnung a tuahmi le a ziaza ṭhalo hna cu zohhmanh, Israel le Judah Siangpahrang hna Cauk chungah an i ṭial i a fapa Jehoiachin cu amah hmun ah khan a hung bawi.
Jehoiachin Cu Babilon Ah Sal Ah An Kalpi
(2Sia 24.8-11)
9Jehoiachin cu pen hram a thawk ah kum riat a si i Jerusalem in thla thum le ni hra a bawi. Bawipa mithmuh i thil ṭhalo kha a tuah. 10Cun cu kum ṭhal ah Nebukhadnezzar Siangpahrang nih mi a thlah hna i amah cu Bawipa inn chung i umkheng mansung hna he cun Babilon ah an ratpi i a unau Zedekiah cu Judah le Jerusalem siangpahrang ah a ser. #Jer 22.24-30; 24.1-10; 29.1-2; 37.1; Eze 17.12,13
Zedekiah Pennak
(2Sia 24.18-20; Jer 52.1-3)
11Zedekiah cu pen hram a thawk ah kum kul le kum khat a si i Jerusalem in kum hlei khat a bawi. #Jer 27.1-22; 28.1-17 12Bawipa, a Pathian mithmuh i thil ṭhalo kha a tuah. Bawipa kaa chungin a chuakmi bia a chimtu Jeremiah hmaiah khan a lung a ṭhum lo. 13Cun Pathian min chalh in chiat a sertu Siangpahrang Nebukhadnezzar zong kha a doh; Bawipa, Israel Pathian lei i i mer duh loin a hngawng kha a ṭhawnter i a lung kha a hahter. #Eze 17.15 14Tlangbawi hna lak i haotu deuhdeuh hna le mi zapi hna zong kha, cu bantuk cun zumhtlaklo ngaiin an um i miphun hna thil fihnung vialte kha an zulh ve; cun Jerusalem ah a thiantermi Bawipa inn kha a thurhhnawmh.
15 Bawipa, an pupa hna Pathian nih khan a mi hna le a umnak hmun cungah khan zaangfahnak a ngeih caah lamkaltu kha ngol duh lo tein a thlahhnawh lengmang hna; 16sihmanhsehlaw Bawipa thinhunnak cu a mi hna cungah a thawh i remh ṭhan khawhnak a um ti lo tiangin Pathian lamkaltu hna cu an rak zawmhtaih lengmang hna i a bia kha zei ah an rel lo i a profet hna kha an nihsawh hna.
Judah Saltannak
(2Sia 25.1-21; Jer 39.8-10; 52.12-30)
17Cucaah an tlangval hna cu an hmunthiang inn chungah khan vainam in a that i, tlangval cungah siseh, upa cungah siseh, zaangfahnak a ngei lomi, Khaldi mi siangpahrang kha an cungah a ratpi; a kut chungah cun an dihlak in a chanh hna. #Jer 21.1-10; 34.1-5 18Cun Pathian inn chung i a ummi umkheng vialte, a hme a ngan in, cun Bawipa inn rothil hna le siangpahrang le a bawi pawl rothil vialte hna cu an dihlak in Babilon ah an kalpi hna. 19Cun Pathian inn cu an khangh i Jerusalem khua kulhnak vampang cu an chimh hna i a chung i siangpahrang inn vialte cu mei in an khangh hna i a umkheng mansung vialte cu an hrawh dih hna. 20Cun vainam thahnak in a luatmi hna kha Babilon ah sal ah a kalpi hna i Persia pennak a feh hlantiang annih cu amah le a fapa hna sal ah an cang; 21mah hihi Jeremiah kaa in Bawipa bia a chuakmi, ram nih a sabbath hna cu aa lawmhpi dih hlantiang, timi tlinternak caah khan a si. Kum sawm sarih tlinternak caah khan rawkral in a um chung vialte sabbath kha a ul ko. #Jer 25.11; 29.10
Sairas Nih Thawng A Thanh
(Ezr 1.1-4)
22Jeremiah kaa in a langmi Bawipa bia cu a tlin nakhnga, Persia siangpahrang Sairas a bawi kum khatnak ah, Bawipa nih Sairas thlarau cu a hninhsaih i cucaah a pennak ram chung vialte ah thawng thanhnak a tuah i, 23“Hi bangin Persia siangpahrang Sairas nih, Bawipa, vancung Pathian nih vawleicung ram vialte cu a ka pek cang i mah caah Judah ram Jerusalem i inn pakhat sak awk kha a ka fial. Cucaah Pathian mi a simi nannih cu nan dihlak in cuka ah cun va kal u law Bawipa nan Pathian cu nan sinah um ko seh,” a ti. #Isa 44.28
Currently Selected:
2 CHANRELNAK 36: HCL06
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006