2 CHANRELNAK 3
3
Solomon Nih Bawipa Inn A Sak
(1Sia 6.1-38)
1Cun Solomon nih Jerusalem khua chung Moriah Tlang, a pa David sin i Bawipa a langhnak, David nih a timhtuahmi phuhri, Jebus mi Ornan ta a simi ah khan Bawipa inn cu sak hram a thawk. #Gen 22.2 2A bawi kum linak, thla hnihnak thla ah khan sak hram cu a thawk, 3Pathian inn saknak ca i Solomon nih a tahnak cu mah hihi an si: a sau, tahnak hlun dong in, dong sawm ruk a si, a kauh cu dong kul a si. 4Cun inn ṭuangpi hmailei i innleng cu a inn vang can in dong kul a si; cun a sanlei cu dong za le dong kul a si. Cun a chunglei in sui thiang in a nalh. 5Ṭuangpi cu saipres thing in a kamh i sui thiang in a nalh i a cungah tumkung le cikcin kha a cuanter hna. 6Inn cu lungvar man sung in a ṭamh, a bunhnak tete a ser hna. Sui cu Parvaim sui a si. 7Cuticun inn cu sui in a hut — a kaan le a innleng le a vampang hna le a innka khar hna kha; cun vampang hna ah khan cherubim a suai hna.
8Cun a thiang bik hmun kha a ser; a saulei cu inn vang he aa khat in dong kul a si i a kauhlei cu dong kul a si; sui thiang talen za ruk in a hut. #Exo 26.33-34 9Thirkhenh ca hmanmi cu sui shekel sawm nga a si. Cun cung dot hna cu sui in a hut hna.
10Hmun thiang bik ah khan thing in cherubim pahnih a ser hna i sui in a hut hna. #Exo 25.18-20 11Cherubim hna thla hna nih cun dong kul a zarh; pakhat thla pakhat, dong nga a simi nih khan, inn vampang kha a tongh i a thla dang, dong nga a simi nih khan, cherub dang pakhat thla kha a tongh; 12cun hi cherub thla pakhat, dong nga a si vemi nih hin, inn vampang kha a tawngh i a khattelei thla, dong nga ṭhiamṭhiam a simi kha, cherub pakhatnak thla ah khan aa peh. 13Hi cherubim hna thla hna nih hin dong kul an zarh; cherubim cu an ke in an dir i ṭuangpi lei kha an hoih. 14Cun puanzar a dum, sendung, le sen eu hna kha la hmangṭhia in a ser hna i an cungah cherubim kha a cuanter hna. #Exo 26.31
Dar Tungpi Pahnih
(1Sia 7.15-22)
15Inn hmaiah cun tungpi pahnih, dong sawm thum le dong nga veve a sangmi a ser hna i an par ah cun luchin dong nga veve a sangmi a chinh hna. 16Ṭhi bantuk cikcin a ser hna i tungpi par ah cun a ngerh hna; cun taleti za khat a ser hna i cikcin ah cun a thlaih hna. 17Tungpi hna cu biakinn hmaiah, pakhat orhlei ah, pakhat kehlei ah a phun hna i orhlei i cu Jakhin tiah a ti i kehlei i cu Boaz tiah a ti.
Currently Selected:
2 CHANRELNAK 3: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
