2 CHANRELNAK 19
19
Profet Jehu Nih Jehoshafat A Sik
1Judah siangpahrang Jehoshafat cu Jerusalem i a inn ah him tein a tlung ṭhan. 2Sihmanhsehlaw hmutu Hanani fapa Jehu nih amah cu ton awkah a kal i Siangpahrang Jehoshafat cu a thawh i, “Miṭhalo cu bawmh i Bawipa a huami hna cu dawt awk a si maw? Hi ruangah hin nangmah cungah Bawipa thinhunnak cu a chuak cang. 3Asinain, Asherah hna cu ram chungin na hloh hna i Pathian kawl kha na lung in naa sehchih caah nangmah chungah ṭhatnak tlawmpal cu hmuh a si,” tiah a ti.
Jehoshafat Nih Biaceihtu A Ser Hna
4Jehoshafat cu Jerusalem ah khua a sa; cun Beersheba in Efraim tlangram tiang mi hna sinah khan a kal i an pupa hna Pathian, Bawipa sinah khan a ratpi ṭhan hna. 5Judah ram chung i kulhmi khua dihlak ah khan, khua khat hnu khua khat in, biaceihtu a chiah hna i, 6biaceihtu hna cu, “Nan tuahmi kha ṭha tein ruat u, zeitintiah bia nan ceihmi cu minung caah a si lo i Bawipa caah a si; nan biakhiahnak ah Bawipa cu nan sin ah aa tel lengmang ve. 7Cucaah Bawipa ṭihnak cu nan cungah um seh; nan tuahmi kha i ralring u, zeitintiah Bawipa kan Pathian sinah cun biading merh siseh, duhdanh ngeih siseh, ziknawh siseh, a um lo,” tiah a ti.
8Cuhleiah Jerusalem ah Jehoshafat nih Levi mi tlawmpal, tlangbawi tlawmpal le Israel mi innchungkhar hna lu tlawmpal kha Bawipa ca i biakhiahnak tuah awkah le i almi bia kha ceih awkah, a thiah hna. 9Cun nawl a pek hna i, “Hi bangin Bawipa ṭih buin zumhawktlak tein, nan lung dihlak in nan tuah lai: 10khuazei khuami hmanh, thisen chuahnak kong ah siseh, phungbia le nawlbia kong ah siseh, an bia nan sin a phak tikah, annih nih Bawipa hmaiah mawhnak an ton nakhnga lo le nan cung le nan unau hna cungah thinhunnak a tlun nakhnga lo, nannih nih annih cu nan rak cawnpiak hna lai. Cu bantuk cun nan tuah lai i mawhnak nan tong lai lo. 11Cun zohhmanh u, Bawipa lei thil vialte ah tlangbawi upa bik Amariah cu nan cungah a um; cun siangpahrang lei thil vialte ah Judah innchungkhar uktu Zebadiah, Ishmael fapa cu nan cungah a um; cun Levi mi hna cu nan biaceihtu bawi hme deuh an si lai. Ralṭha tein tuah u law Bawipa cu miding mi hna sinah cun um ko seh!” tiah a ti.
Currently Selected:
2 CHANRELNAK 19: HCL06
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006