1 SIANGPAHRANG 9
9
Bawipa Solomon Sinah A Lang Ṭhan
(2Cha 7.11-22)
1Solomon nih Bawipa inn le siangpahrang inn le Solomon nih sak a duhmi vialte kha a sak dih tikah, 2Gibeon ah a sinah a rak langh bangkhan, Bawipa cu a voi hnihnak Solomon sinah khan a lang ṭhan. #1Sia 3.5; 2Cha 1.7 3Cun Bawipa nih a thawh i, “Ka hmai i na thlacamnak le na ka nawlnak vialte cu ka theih cang; hi na sakmi inn hi ka thianter cang i zungzal ca in a chungah ka min ka chiah cang; ka mit le ka lung cu khika ah an um camcin lai. 4Cun nangmah kongah, na pa David nih a rak kal bantuk khan, ka hmaiah lung hlumte le dinnak in na kal i nawl kan pekmi vialte ningin na tuah i ka nawlbia le ka phung lam kha na zulh hna ahcun, 5khi tikah na pa David sinah, ‘Israel mi bawi ṭhutdan cung ṭhu dingmi na ṭhing lai lo,’ tiin bia ka rak kam cang bang khan Israel mi hna cungah zungzal ca in na siangpahrang bawi ṭhutdan cu ka fehter lai. #1Sia 2.4 6Sihmanhsehlaw nangmah siseh, na fale si hna seh, keimah zulhnak khan nan pial i nan hmaiah ka chiahmi ka nawlbia le ka phungbia kha nan zulh hna lo i nan kal i pathian dang kha an rian nan ṭuan hna i nan biak hna ahcun, 7khi tikah Israel mi cu ram ka rak pekmi hna chung khan ka hloh hna lai i ka min ca i ka thiantermi inn hi ka mit hmuh phak lo ah ka hlonh lai; cun Israel cu phungthluk bia le nihchuak capo bia ah mi vialte lakah a cang lai. 8Cun hi inn hi a rawkmi thilpon ah a cang lai; a pawng i a kalmi paoh an khuaruah a har lai i an hnar an phit lai i annih nih cun, ‘Zeicahdah mah ti hin Bawipa nih hi ram cung le hi inn cungah hin a tuah hnga?’ tiah an ti lai. #2Sia 25.9; 2Cha 36.19 9Cun annih nih an thawh hna lai i, ‘Zeicahdah a si ti ahcun, annih an pupa hna Izipt ram in a chuahpitu Bawipa an Pathian kha an hlawt i pathian dang kha an i tlaih hna i an biak hna i an rian an ṭuan hna caah hi ṭhat lonak vialte hi Bawipa nih an cungah a tlunter,’ tiah an ti lai,” tiah a ti.
Solomon Nih A Tuahmi Thil Dangdang
(2Cha 8.1-18)
10Solomon nih Bawipa inn le siangpahrang inn a sak chung kha kum kul a rau. 11Tair siangpahrang Hiram nih khan sidar thing, saipres thing le sui a duh zat in Solomon kha a pek. Cun Siangpahrang Solomon nih Galilee ram chung khua pakul kha a pek. 12Sihmanhsehlaw Solomon nih a pekmi khua hna kha zoh awkah Hiram nih Tair in a rat tikah, a lung an tong lo. 13Cucaah amah nih cun, “Ka unaupa, na ka pekmi khua hna hi zei bantuk khua hen an si ee?” tiah a ti. Cucaah nihin tiangin annih cun Kabul tiah ti an ti. 14Hiram nih khan siangpahrang cu sui talen za khat le kul a rak pek.
15Cun Siangpahrang Solomon nih Bawipa inn le amah inn le Millo kha le Jerusalem kulhnak vampang le Hazor le Megiddo le Gezer 16(Izipt siangpahrang Faro nih khan Gezer khua kha a hung tlaih i mei in a khangh i cu khua chung i a ummi Kanaan mi kha a thah hna i a fanu, Solomon nupi kha, hlawn ah a rak pek; 17i Solomon nih Gezer khua kha a sak ṭhan), cun thlanglei Beth-horon, 18Baalath, le Judah ram chung ramlak i a ummi Tamar khua, 19cun Solomon nih a ngeihmi thil khonnak khua vialte le a rangleng hna ca khua hna le a rangcung ralkap khua hna le Jerusalem, Lebanon le a penmi ram dihlak ah Solomon nih sak a duhmi paoh saknak caah hnekmi rianṭuantu bu a sernak kong cu mah hihi a si. 20Amor mi le Hit mi le Periz mi le Hiv mi le Jebus mi chungin a tangmi vialte, Israel mi a si lomi hna — 21Israel mi nih an hrawh dih khawh lomi hna, an hnu i an tefa a rung tangmi hna kha — mah hna hi Solomon nih hnekmi rianṭuantu sal bu ah a ser hna i cu bang cun nihin tiang hin an si. 22Sihmanhsehlaw Israel mi cu Solomon nih sal ah a ser hna lo; annih cu ralkap, bawi, ralbawi, ralkapbu haotu, a rangleng bawi hna le rangcung ralkap an si.
23Rianṭuantu a zohtu hna, Solomon rian cung i bawi bikbik hna cu, hi za nga le sawm nga hi an si.
24Sihmanhsehlaw Faro fanu cu David khua khan Solomon nih a sakpiakmi amah inn ah khan a hung kal; cu hnuah Millo kha a sak.
25Kum khat ah voi thum Solomon nih, Bawipa ca i a sermi biakṭheng cungah khan, khangh thawinak hna le daihnak thawinak hna kha a pekchanh tawn hna i Bawipa hmaiah zihmui kha a khangh tawn. Cuticun inn cu a lim. #Exo 23.17; 34.23; Deu 16.16
26Siangpahrang Solomon nih, Edom ram chung, Rili Sen kam khua Eloth pawng i a ummi Ezion-geber khua ah khan sangphawlawng phu khat a ser. 27Cun cu sangphawlawng rual sinah cun Hiram nih a sinum, rili kong a hngal ngaimi tilawng rianṭuantu hna kha Solomon sinum hna he cun hmunkhat ah a thlah hna; 28cun Ofir ah an va kal i cuka cun sui an rak phorh; an rak phorhmi cu talen za li le kul a si; annih nih Siangpahrang Solomon sinah khan an rak phorh.
Currently Selected:
1 SIANGPAHRANG 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006