1 SIANGPAHRANG 15
15
Abijam Pennak
(2Cha 13.1—14.1)
1Nebat fapa Jeroboam Siangpahrang, a bawi kum hleiriat kum ah khan, Abijam nih Judah ram uk hram aa thawk cu a si. 2Jerusalem ah kum thum bawi a si. A nu min cu Maakah a si, Abishalom fanu a si. 3Cun amah hlan i a pa nih a rak tuahmi sualnak vialte chungah khan a kal ve i a pu David lung bantuk kha si loin, a lung cu Bawipa a Pathian sinah khan a dihlak in aa biatak ngaingai lo. 4Sihmanhsehlaw David ruangah, Bawipa a Pathian nih Jerusalem khua ah meiinn pakhat a pek, amah hnuah a fapa cu a hun thawhter i Jerusalem kha a fehter; #1Sia 11.36 5zeicahtiah David nih Bawipa mithmuh i a dingmi kha a tuah i Hit mi Uriah kong ah khan dah ti lo ahcun nawl a pekmi paoh kha a nun chung vialte pakhat hmanh a pialtak hna lo. #2Sam 11.1-27 6Cun a nun chung vialte, Rehoboam le Jeroboam karlak ah khan ral a um zungzal. 7Abijam tuahsernak a tang rihmi le a tuahmi vialte hna cu, Judah Siangpahrang hna Chanrelnak Cauk chungah an i ṭial lo mei? Cun Abijam le Jeroboam karlak ah khan ral a um. 8Cun Abijam cu a pupa hna sinah a it i David khua ah khan an vui, cun a fapa Asa kha amah hmun ah cun a hung bawi.
Asa Pennak
(2Cha 14.1-5; 15.19)
9Israel siangpahrang Jeroboam a bawi kum kul kum ah Asa nih Judah ram pen hram aa thawk, 10Jerusalem ah kum sawm li le kum khat a bawi. A pi min cu Maakah, Abishalom fanu a si. 11Cun a pu David nih a rak tuah bang khan, Asa nih Bawipa mithmuh i a dikmi thil kha a tuah. 12Biaknak lei pa hlawhhlang kha ram chungin a dawi hna i a pupa nih an sermi siasal vialte kha a ṭhial hna. 13A nu Maakah zong kha, Asherah caah fihnung siasal a ser caah siangpahrang bawinu a sinak kha a ngolter; cun Asa nih a nu milem cu a hau i Kidron tivate ah khan a khangh. 14Sihmanhsehlaw khuahrum bo hna kha cu a hrawk hna lo. Asinain, Asa cu a nun chung vialte, Bawipa leiah a lung dihlak in aa biatak ko. 15Cun Bawipa inn chungah khan a pa biakamnak laksawng hna le amah biakamnak laksawng hna, ngun, sui le umkheng hna kha a rak put hna.
Asa le Benhadad An Ṭangṭi
(2Cha 6.1-14)
16Cun Asa le Baasha, Israel siangpahrang karlak ah khan, an chan chung vialte ral a um. 17Israel siangpahrang Baasha nih Judah ram kha a hung doh i Judah siangpahrang sinah ahohmanh chuahter lo le luhter lonak caah Ramah khua kha a ser. 18Cun Asa nih Bawipa inn chung le siangpahrang inn chung i a tangmi ro ngun, le sui vialte kha a lak hna i a sal hna kut chungah khan a pek hna; cun Siangpahrang Asa nih cun Hezion fapa Tabrimmon i fapa Benhadad, Siria siangpahrang, Damaskas khua i a ummi sinah khan mi a thlah hna i, 19“Ka pa le na pa karlak i a rak um bangkhan, keimah le nangmah karlak ah ṭanṭinak um seh: zohhmanh, laksawng ah ngun le sui kan kuat; cucaah va kal law Israel siangpahrang Baasha nih hin a ka kirtak nakhnga, amah he nan ṭanṭinak kha chat tuah,” tiah a ti. 20Cun Benhadad nih Siangpahrang Asa kha a bia a ngaih i a ralkapbu haotu hna kha Israel mi khua doh awkah a thlah hna i Ijon, Dan, Abel-beth-maakah le Khinneroth vialte kha, Naftali ram vialte he an tei dih. 21Cun mah cucu Baasha nih a theih tikah, Ramah khua ser kha a ngol i Tirzah khua ah khan khua a sa. 22Cun Siangpahrang Asa nih Judah ram dihlak ah thawng a thanh hna, pakhat hmanh an luat lo, Ramah khua sernak ah Baasha nih a rak hmanmi lung le thing vialte kha an thiar dih i cu thingrua cun Siangpahrang Asa nih Mizpah khua le Benjamin ram i Geba khua kha a ser hna. 23Asa tuahsernak a tang rihmi hna le a ṭhawnnak vialte, a tuahmi vialte le khua a sermi vialte hna cu, Judah Siangpahrang hna Chanrelnak Cauk chungah an i ṭial lo mei? Sihmanhsehlaw a tar leiah a ke ah hma a ing. 24Cun Asa cu a pupa hna sinah a it i a pupa hna sinah cun a pu David khua chungah an vui i a fapa Jehoshafat kha amah hmun ah cun a hung bawi.
Nadab Pennak
25Judah siangpahrang Asa bawi kum hnihnak ah Jeroboam fapa Nadab nih khan Israel mi cu uk hram a thawk hna; Israel mi cu kum hnih a uk hna. 26Bawipa mithmuh i thil ṭhalo kha a tuah i a pa lam kha a zul ve i a pa nih Israel mi a sualter hnanak a sualnak kha a tuah ve.
27Issakhar chungkhar mi Ahijah i fapa Baasha nih amah cu a rawi i Filistin mi ta a simi Gibbethon khua ah khan Baasha nih cun a thah; Nadab le Israel mi vialte nih Gibbethon cu an dum lio a rak si. 28Cuticun Baasha nih, Judah siangpahrang Asa a bawi kum thumnak ah cun Nadab kha a thah i amah hmun ah cun amah cu a bawi. 29Cun siangpahrang a can kate in Jeroboam innchungkhar vialte cu a thah dih hna; Bawipa nih a sal Ahijah Shilon mi sinah a rak chimmi bia ningte khan, a hrawh dih hlantiang, Jeroboam hrinthlak hna lakah khan thaw a chuahmi pakhat hmanh a ngan hna lo; #1Sia 14.10 30mah cucu, Jeroboam nih amah nih a sualmi sualnak hna le Israel mi a sualtermi hna sualnak ruang le Bawipa, Israel Pathian a thin a phawh caah khan a si.
31Nadab tuahsernak a tang rihmi hna le a tuahmi vialte cu, Israel Siangpahrang hna Chanrelnak Cauk chungah an i ṭial lo mei? 32Cun Asa le Israel siangpahrang Baasha karlak ah khan, an chan chung vialte ral a um.
Baasha Pennak
33Judah siangpahrang Asa a bawi kum thumnak ah Ahijah fapa Baasha nih Israel mi vialte cu Tirzah khua in uk hram a thawk hna i kum kul le kum li a uk hna. 34Cun Bawipa mithmuh i a ṭha lomi kha a tuah i Jeroboam lam kha a zul i Israel mi a sualtermi hna sualnak a rak tuahmi kha a tuah ve.
Currently Selected:
1 SIANGPAHRANG 15: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
