1 CHANRELNAK 27
27
Ram Uktu Bawi Hna
1Mah hihi Israel mi, an pale innchungkhar hna lu a si ciomi, a thongthong pawl a uktu hna le a zaza pawl a uktu hna le an bawi pawl hna, a chuak a lut lengmangmi bu pipi hna he aa pehtlaimi rian i thla khat hnu thla khat in kum chuak tiang siangpahrang cu a rian a ṭuanpiaktu hna cazin cu a si, bu khat cu sang hnih thong li an si:
2Zabdiel fapa Jashobeam cu thla khatnak thla ah pakhatnak bu kha a hruitu a si; a bu chungah cun sang hnih le thong li an um. 3Amah cu Perez tefa a si i thla khatnak thla ah cun amah cu ralkapbu haotu vialte hna bawi bik a si. 4Thla hnihnak thla bu cu Aho mi Dodai nih a hrui hna; a bu chungah cun sang hnih le thong li an um. 5Ralbawi pathumnak, thla thumnak thla ca i cu Benaiah a si, amah cu tlangbawi Jehoiada fapa a si i haotu bik a si; a bu chungah cun sang hnih le thong li an um. 6Hi Benaiah hi sawm thum hna lak i miṭhawng kha a si i amah nih sawm thum hna kha a hrui hna; amah bu a haotu hna cu a fapa Ammizabad kha a si. 7Thla linak ca i a palinak cu Joab unau Asahel kha a si i a fapa Zebadiah nih khan a hun zulh; a bu chungah cun sang hnih le thong li an um. 8Ralbawi panganak, thla nganak ca i cu Izrah mi Shamhuth a si; a bu chungah cun sang hnih le thong li an um. 9Paruknak, thla ruknak ca i cu Ira a si, amah cu Tekoa mi Ikkesh fapa a si; a bu chungah cun sang hnih le thong li an um. 10Pasarihnak, thla sarihnak ca i cu Efraim tefa Pelon mi Helez a si; a bu chungah cun sang hnih le thong li an um. 11Pariatnak, thla riatnak ca i cu Zerah tefa Hushath mi Sibbekai a si; a bu chungah cun sang hnih le thong li an um. 12Pakuanak, thla kuanak ca i cu Benjamin tefa Anathoth mi Abiezer a si; a bu chungah cun sang hnih le thong li an um. 13Pahranak, thla hranak ca i cu Zerah tefa Netofah mi Maharai a si; a bu chungah cun sang hnih le thong li an um. 14Hleikhatnak, thla hleikhatnak ca i cu Benjamin fapa hna tefa Pirathon mi Benaiah a si; a bu chungah cun sang hnih le thong li an um. 15Hleihnihnak, thla hleihnihnak ca i cu Othniel tefa Netofah mi Heldai a si; a bu chungah cun sang hnih le thong li an um.
16Israel mi phun hna chungah cun, Reuben mi hna caah Zikhri fapa Eliezer cu bawi upa bik a si; Simeon mi hna caah Maakah fapa Shefatiah a si; 17Levi caah Kemuel fapa Hashabiah a si; Aaron caah Zadok a si; 18Judah caah Elihu a si, amah cu David unau pakhat a si; Issakhar caah Mikhael fapa Omri a si; 19Zebulun caah Obadiah fapa Ishmaiah a si; Naftali caah Azriel fapa Jeremoth a si; 20Efraim mi hna caah Azaziah fapa Hoshea a si; Manasseh phun cheu caah Pedaiah fapa Joel a si; 21Gilead i a ummi Manasseh phun cheu caah Zekhariah fapa Iddo a si; Benjamin caah Abner fapa Jaasiel a si; 22Dan caah Jehoram fapa Azarel a si. Mah hna hi Israel mi phun a hruitu hna cu an si. 23David nih kum kul toi kha cu a rel hna lo, zeicahtiah Bawipa nih Israel cu van i arfi zat ah khin ka ser lai tiah bia a kam cang. #Gen 15.5; 22.17; 26.4 24Zeruiah fapa Joab nih khan rel hram a thawk, sihmanhsehlaw a dih lo; asinain hi ruang ah hin Israel cungah thinhunnak a tlung i cu relnak cu Siangpahrang David chanrelnak chungah khumh a si lo. #2Sam 24.1-15; 1Cha 21.1-14
25Siangpahrang chawhlawn kuang hna a zohkhenhtu cu Adiel fapa Azmaveth a si; cun ram chung i a ummi le khua chung i a ummi le khuate chung le innsang chung i a ummi chawhlawn kuang hna a zohkhenhtu cu Uzziah fapa Jonathan a si; 26Vawlei kha leh awkah lo chung i rian a ṭuantu hna a zohkhenhtu cu Khelub fapa Ezri a si; 27mitsur dum a zohkhenhtu cu Ramath mi Shimei a si; cun mitsur dum chungin a chuakmi mitsur hang khonnak zohkhenhtu cu Shifmot mi Zabdi a si. 28Shefelah i a ummi oliv thing le saikamor thing zohkhenhtu cu Geder mi Baalhanan a si; cun chiti khonmi a zohkhenhtu cu Joash a si. 29Sharon i a tlongmi saṭil run a zohkhenhtu hna cu Sharon mi Shitrai a si; nelrawn i a tlongmi saṭil run zohkhenhtu hna cu Adlai fapa Shafat a si. 30Kalauk a zohkhenhtu hna cu Ishmael mi Obil a si; laa a nu a zohkhenhtu hna cu Meronoth mi Jehdeiah a si. Tuurun a zohkhenhtu hna cu Hag mi Jaziz a si. 31Hi vialte hna hi David Siangpahrang chaw kengtu an si.
32David pacheu Jonathan cu fimchimtu a si, amah cu mifim le cazi a si; amah le Hakhmoni fapa Jehiel nih siangpahrang fapa kha an zohkhenh hna. 33Ahithophel cu siangpahrang fimchimtu a si i Arki mi Hushai cu siangpahrang hawikom a si. 34Ahithophel cu Jehoiada, Benaiah fapa le Abiathar nih an hun chaan. Joab cu siangpahrang ralkapbu haotu a si.
Currently Selected:
1 CHANRELNAK 27: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
