Markus 14

Ihz peur aacz yio keui kyaam piamz Yesuhz

(Matthe 26:1-5, Lukas 22:1-2, Yohn 11:45-53)

1Moh thaengz aarz seu ngihz, maang pawiz kaaiz mun nam sapz ceu boh pawiz lawt phez, beunz caangz boh ihz mawz kyaamz keui teur lao daehz ngaz dawmz mat Yesuhz kyaam piamz Hnhz. 2Keuiz daz, keuh doz ihz keui ronyz raeteur daz daehz nahz, “Yak maat cih kaai seu ngihz pawiz.”

Keun nyah hawkz leh nam man hawm thawkz kaai kingz Yesuhz

(Matthe 26:6-13, Yohn 12:1-8)

3Meuz Yesuhz naeh pruh Bethani kaang Simon ihz tut, meuz diz ne maang keun nyah hawkz leh truz nam man hawm caet caet an langz mawh baaiz, seu teur dawngz reu aangz keun ra. Meuz Yesuhz suamz boh ne tiz teuk haakz teur dawngz, thawkz sapz kaai kingz Hnhz. 4Ihz teur ka kaw ca, teur daz daehz nahz, “Cih naehz lah, aez nam man sumz maat maat a? 5Saz denarius waiz peur ya pyaz, rak seum aez ihz phaanz keui nahz.” Keuh nae tang keun nyah ne cih pleung.

6Yesuhz kaw daz, “Teungz mah hnhz raez, yak ya hnhz. Hnhz a wa cih an rak kaai Ohz. 7Ihz phaanz keui naeh kawmz pehz se se. Teur pehz sunz kawr ne kawr keuh meu naeh kaw bawnz. Ohz samz nam naeh kawmz pehz se se. 8Keun nyah an ni cih aez Ohz nahz seu hnhz penz bawnz, ngaz saangz keo toz Ohz rae thukz aez nam man hawm kaai toz Ohz. 9Ohz daz mawn pehz nahz, khahz krai reu oiz rak tawiz prih keu tehz ne ngaz bawnz krai boh lawng keun nyah an ni aez naeh ta seum tang ihz.”

Yudas ngaz saz Yesuhz

(Matthe 26:14-16, Lukas 22:3-6)

10Meuz phangz an diz, Yudas an naeh tuhz seu kawlz aarz ne lan cu beunz caangz keui saz kokz Tahz Yesuhz. 11Meuz keuh ngarz ne, rawhz seuz baaiz rae, aez keu tih daz, ngaz aez hnhz nahz paekz. Waaiz an diz, Yudas ngawm kraao sang trohz ngaz saz kokz Hnhz ceun nae ne.

Pawiz Caoh Phraz

(Matthe 26:17-25, Lukas 22:7-14,21-23, Yohn 13:21-30)

12Kaai seu ngihz hawkz pawiz kaaiz mun nam sapz ceu boh pawiz lawt phez ne, teu paez keui truz cu Hnhz maanyz daz, “Ngaz lan raenz aez a naez ta Tahz ehz suamz pawiz lawt phez a?”

13Tahz Yesuhz cao teu paez Daehz keu aarz, “Paarz kut tuhz weng ne te awlz ihz leh truz omz. Lan tawiz hnhz, 14kut tawiz hnhz tuhz kaang raez. Maanyz tahz kaang an hnhz kut ne daz, ‘Tahz Sra ehz lao, lukz suamz pawiz lawt phez Ohz boh teu paez Ohz keui naeh a naez?’ 15Ihz an diz, ngaz lao plaez paarz nahz lukz mawh an naeh raan thaz kol ne, raenz ehz nahz a diz eu.”

16Teu paez keui kaw kut lan tuhz weng ne, awlz ceun Hnhz lao, raenz pawiz lawt phez a diz.

17Meuz teuk borz ne Yesuhz boh teu paez seu kawlz aarz keui truz teur tawiz. 18Meuz keu dez kaai tangz suamz boh ne, Yesuhz daz, “Ohz daz mawn pehz nahz, ihz hawkz an naeh tuhz pehz, suamz kawmz Ohz ne ngaz saz kokz Ohz.”

19Teu paez keui kaw phawmz kyehz teur aacz daehz maanyz Hnhz, hawkz a wa hawkz maanyz, “Naeh ohz haz?”

20Yesuhz lao tawpz keuh nahz, “Ihz hawkz an naeh tuhz seu kawlz aarz, cawpz teur kawmz boh Ohz ne ngaz saz kokz Ohz. 21Kuanz Ihz ne ngaz bawnz yam ceun tuhz kyaamz lik taemz mok. Keuiz daz, ihz an saz kokz Ohz ne ngaz talz phez mawh. Ihz an diz, khanz yak keut truz baaiz rak.”

Yesuhz seun teungz aacz cih pawiz Caoh Phraz

(Matthe 26:26-30, Lukas 22:14-23, 1 Korin 11:23-25)

22Meuz suamz boh teuk bimz ne Yesuhz leh kaaiz mun, taang kez cuz Phraz Pen Caoh pekz kaaiz mun aez keuh nahz, “Teur aacz daehz leh suamz raez, kaaiz mun an ni naeh toz Ohz.”

23Tawnz tang klakz omz seu pit taang kez cuz Phraz Pen Caoh aez keuh nahz, keuh kaw teur aacz daehz leh tiangz. 24Yesuhz daz, “An ni naeh naamz Ohz an thawkz aez ihz keui nahz, naeh kaai traz an prawm teun mehz. 25Ohz daz mawn pehz nahz, tae leh seu ni, thonz taw seu ngihz Ohz tiangz omz seu pit teun mehz tuhz prih Phraz Pen Caoh ne, Ohz nam tiangz leui.”

26Waaiz an diz, keuh keun euiz lae lan cu thaz rang Olip.

Yesuhz lao aacz Petros ngaz thiangz thengz Daehz

(Matthe 26:31-35, Lukas 22:31-34, Yohn 13:36-38)

27Yesuhz daz keuh nahz, “Borz meu ni pehz ngaz mok thengz Ohz, naeh ceun tuhz kyaamz lik daz, ‘Ohz piamz ihz khaenz soz, soz keui ngaz baak beuz.’ 28Keuiz daz, Ohz meu rae imz rae, lan aacz pehz prih Kalile.”

29Petros daz, “Sangz daz ihz keu ni mok thengz Mih kaw, ohz nam thengz.”

30Yesuhz daz mawn hnhz nahz, “Borz meu ni, co yaerz maat keu dawrz aarz laehz ne, mih ngaz thiangz thengz Ohz waiz laehz.”

31Petros kaw daz mawn mawn, “Sangz daz, ohz bawnz yam kawmz Tahz ehz kaw, ohz nam thiangz thengz.”

Keuh kaw teur aacz daehz daz boh ceun diz leun.

Yesuhz suz tawngz tawz sraakz Ketsemane

(Matthe 26:36-46, Lukas 22:39-46)

32Keuh lan phraeoz tawz ti Ketsemane ne Yesuhz lao teu paez daehz keui nahz, “Co Ohz suz tawngz ne pehz keu dez ngawm a niz raez.” 33Hnhz raak Petros, Yakop boh Yohn aez lan tawiz Daehz, Hnhz phawmz kawcz phawmz doz. 34Hnhz daz keuh nahz, “Phawmz Ohz rawhz khin baaiz raenz yam, pehz keu waiz pao Ohz a niz raez.”

35Peun lan a diz nyaenz awh, Hnhz kupz kaai keu tehz, suz tawngz daz, “Beuk caang kaw, peur teuk an ni aez peun lan Ohz se kamz.” 36Yesuhz daz, “Oz Paz, Paz! Mih cih penz bawnz klawhz meoz. Kraai thengz aez klakz peur teuk an ni. Keuiz daz, yak aez naeh ceun Ohz sunz penz, aez naeh ceun Mih sunz penz.”

37Hnhz mial truz cu meu rae teu paez Daehz keu waiz ne awlz keuh yaetz reuk ngeut boh, Hnhz daz Petros nahz, “Simon, mih yaetz reuk ngeut haz? Pao seu seu na ri kaw mih nam penz bawnz haz? 38Suz tawngz raez, yak aez pehz bawnz lan tawiz reung dengz kawi keui khyawz leh daehz. Phawmz khuanz ne maang boh keum rang kaw, toz samz caang keu ceum.”

39Mial lan thaengz ti Hnhz suz tawngz ne suz tawngz mial ceun Hnhz a wa maanyz. 40Waaiz an diz, mial truz cu teu paez Daehz kaw awlz keuh yaetz reuk ngeut thaengz boh kawp daz, ngaai keuh keu can, keuh nam mas ngaz bawnz tawpz Hnhz nahz ceun nae.

41Hnhz mial truz cu keuh waiz laehz rae daz keuh nahz, “Pehz yeung yaetz reuk ngeut boh haz? Rawi leuk raez, ehz ngaz lan. Yawt raez. Kraao leh Kuanz Ihz aapz thengz tuhz tihz ihz raai ne a wa phraeoz. 42Ceng leuk lah. Ehz lan. Pehz awlz boh nam anz haz? Ihz an saz kokz Ohz ne a wa truz phraeoz.”

Yudas aapz Yesuhz

(Matthe 26:47-56, Lukas 22:47-53, Yohn 18:3-12)

43Meuz Hnhz daz boh ceun diz ne, Yudas, an naeh tuhz seu kawlz aarz ne truz phraeoz. Beunz caangz, ihz mawz kyaamz boh ihz peur aacz keui cao ihz daehz keui khaenz tang waac, tang kawn truz tawiz Yudas. 44Ihz an saz kokz Hnhz ne lao mok peun tang keuh nahz, “Ihz an ohz kuny ne naeh Yesuhz keuiz, mat Hnhz leh lan yawt rak rak lah.”

45Meuz Yudas phraeoz truz ne lan cu luat tawz Hnhz daz, “Tahz Sra, Tahz Sra.” daz rae kuny Hnhz. 46Keuh kaw takz mat Hnhz. 47Meuz phangz an diz ihz hawkz an ceng boh rim keuh ne leh plaez waac mak kuanz leng ceu beunz, keu tiakz hnhz seu plaakz paw teutz klaez. 48Yesuhz daz keuh nahz, “Pehz khaenz waac, khaenz kawn mat Ohz, naeh ceun ihz mat conz. 49Klawhz seu ngihz meuz Ohz naeh boh peur lah pehz, sawnz aez tuhz wat ne, pehz paw nam mat Ohz. An ni aez tuhz kyaamz lik ne neuk truz rae penz ceun ni.”

50Meuz phangz an diz, teu paez Hnhz keui tiunz thengz Hnhz.

51Maang ihz plung hawkz nam kap kreung, seu kum taw pahz pan, lan tawiz puatz keuh, ihz keui kaw kyaam mat tang hnhz. 52Hnhz kaw plawiz thengz pahz daehz, tiunz kulz kaalz toz maat.

Ihz caetz Yesuhz

(Matthe 26:57-68, Lukas 22:54-55, 22:63-71, Yohn 18:13-14, 18:19-24)

53Keuh leh Yesuhz lan cu ceu beunz, beunz caangz keui, ihz peur aacz keui, ihz mawz kyaamz keui kaw lan teur cuhz a diz. 54Petros moh raamz yaan lan tawiz Hnhz, phraeoz teun leukz kaang ceu beunz ne hnhz tatz ngal keu dez teur kawmz ihz khunz keui. 55Beunz caangz boh ihz mawh rumz keui khahz saak se reung dengz kawi ngaz piamz Hnhz, keuiz daz nam awlz. 56Ihz keui teur aacz daehz lao plaez kaw keuh eunz nam teur anz daehz.

57Teur ka kaw ceng lao an nam anz ne daz, 58“Ehz a wa ngarz Hnhz daz, ‘Ohz ya wat an leh tihz ihz cih, moh waiz seu ngihz tae thaengz hawkz an nam leh tihz ihz cih boh.’” 59Keuiz daz, keuh daz thanz teur diz kaw, keuh eunz nam teur deuiz.

60Ceu beunz ceng aacz ngaai keuh rae, maanyz Hnhz daz, “Mih nam tawpz naehz leui haz? Keuh maap sapz reung dengz kawi Mih thanz teur ni a?”

61Keuiz daz Yesuhz moh pras pras, nam tawpz seu khaw khaw. Ceu beunz kaw maanyz thaengz, “Anz Mih naeh Tahz Khris kuanz Phraz Pen Caoh an rak ne hoh?”

62Yesuhz kaw daz, “Anz. Waaiz an ni, pehz te bawnz awlz Kuanz Ihz ne keu dez thaz takz kaaiz Phraz taanz khoz mawh tumz truz peu eumz.”

63Ceu beunz kaw siarz thengz kreung daehz daz, “Lo thaengz saak se naehz leui? 64Pehz a wa ngarz mony reu ma Hnhz upz leuz Phraz Pen Caoh. Pehz thaang ceun nae hoh?”

Keuh kaw daz, “Hnhz a wa trohz yam.”

65Meuz diz, ihz teur ka teuk chuz sapz Hnhz nahz omz nyaangz. Bitz ngaai Hnhz, leh keu neumz tihz phak rae daz, “Lao raez, yaeh cih Mih?” Ihz khunz keui kaw tiz keu taep Hnhz.

Petros thiangz thengz Yesuhz

(Matthe 26:69-75, Lukas 22:56-62, Yohn 18:15-18, 18:25-27)

66Meuz Petros naeh tawiz teun leukz kaang ne maang keun nyah hawkz, an naeh kuanz leng ceu beunz truz cu hnhz, 67awlz Petros tatz ngal, yiang yawt hnhz daz, “Mih naeh bohz raen Yesuhz ihz weng Nasaraet long.”

68Petros kaw tawpz thiangz daz, “Ohz nam mas an mih daz ne.” A wa daz kaw hnhz lae lan thaz keur wah ne yaerz kaw keu dawrz.

69Moh thaengz nyaenz, keun nyah an diz awlz Petros ne daz ihz an naeh rim daehz keui nahz, “Hnhz an ni naeh cumz keuh hawkz.” 70Petros kaw thiangz thengz thaengz.

Moh seu co, ihz ceng boh a diz ne daz Petros nahz, “Mih anz mawn cumz keuh keuiz, mih kaw naeh ihz prih Kalile.”

71Petros kaw kin mial toz daehz daz, “Ohz nam mas ihz an mih lao ohz.”

72Meuz diz luat, yaerz kaw keu dawrz thaengz. Petros kaw kuiz kingz daehz yaam, kawp hnhz tang mony reu ma Yesuhz lao mok daehz daz, “Co yaerz maat keu dawrz aarz laehz ne, mih ngaz thiangz thengz Ohz waiz laehz.”

Currently Selected:

Markus 14: ril

Highlight

Copy