Lukas 11

Sawnz aez suz tawngz

(Matthe 6:9-13, 7:7-11)

1Naeh seu seu ngihz Yesuhz suz tawngz boh seu ti. Meuz a wa ne teu paez Hnhz hawkz maanyz Hnhz daz, “Tahz, sawnz aez ehz nahz suz tawngz ceun Yohn sawnz aez teu paez daehz nahz luz.”

2Yesuhz daz keuh nahz, “Meuz suz tawngz ne daz,

‘Paz ehz an naeh lang kaang raaoz,

aez mus Mih naeh reung dengz nap suamz,

aez prih Mih tae leuk.

3Aez ehz nahz seum suamz aez kumz klawhz seu ngihz,

4ceun ehz plawiz reung dengz kawi ihz cih pleung ehz ne

plawiz aez ehz eunz ceun diz.

Yak aez ehz lan tawiz an khyawz leh daehz.’”

5Yesuhz lao thaengz keuh nahz, “Daz yawt ihz hawkz an naeh tuhz pehz ne lan cu kuanz bohz daehz meuz khinz sawmz, maanyz daz, ‘Aez ohz rawm kaaiz mun keu waiz luz, 6kuanz bohz ohz lae reung dengz rae taamz phraeoz kaang ehz, ohz samz nam maang seum suamz naehz damz hnhz.’ 7Kuanz bohz hnhz kaw moh tuhz kaang daehz ne daz hnhz nahz, ‘Yak krio ohz! Keur wah a wa peun khatz, kuanz ihz ehz kaw yaetz kawmz ohz tuhz pahz ne. Ohz nam caang rawi leh aez naehz.’ 8Ohz lao pehz nahz, kawp daz naeh kuanz bohz daehz rae tahz kaang an diz rawi leh aez an hnhz maanyz nam anz. Kawp yaak maanyz tikz tikz rae tahz kaang an diz rawi leh aez an hnhz lo hacz aamz. 9Kawp ceun diz Ohz lao pehz nahz, Maanyz raez, te bawnz. Khahz raez, te awlz. Khrakz keur wah raez, te lawk aez boh pehz nahz. 10Ihz maanyz ne bawnz, ihz khahz ne awlz, ihz khrakz keur wah kaw lawk aez boh. 11Beuk kuanz pehz maanyz kahz ne, anz maang paz leh aez heunyz? 12Beuk maanyz tamz yaerz samz leh aez maengz keur ngawz anz maang? 13Pehz naeh ihz nam rak, yeung mawz leh aez kuanz daehz nahz an rak ne, Paz pehz an naeh lang kaang raaoz baaiz aez Khuanz Seu Ngamz kaai ihz maanyz Hnhz.”

Yesuhz boh khunz phiz

(Matthe 12:22-30, Markus 3:20-27)

14Naeh seu seu ngihz Yesuhz wah thengz phiz ahz. Waaiz phiz a wa lae ne ihz an diz kaw upz bawnz. Wungz ihz keui sangz. 15Keuiz daz ihz teur ka daz, “Hnhz wah thengz phiz kawp khunz phiz raai Beelsebul ne aez Hnhz nahz taanz khoz.”

16Ihz teur ka samz cao Hnhz plaez an laak laaiz thaz kaang raaoz. 17Yesuhz mas keuh wonz, Hnhz daz keuh nahz, “Ihz prih teur deuiz teur kawi daehz kaw prih an diz te luh. Ihz kaang kawmz teur kawi daehz kaw ngaz luh. 18Beuk Satan ne tiukz mial daehz kaw prih hnhz nam khreumz. Pehz daz Ohz leh taanz khoz khunz phiz wah thengz phiz raai. 19Beuk naeh ceun diz, kuanz pehz samz ceuk naeng yaeh rae wah thengz phiz? Kawp ceun diz keuh ngaz naeh lawng tatz traz kaai pehz. 20Keuiz daz beuk Ohz leh reum haz tihz Phraz Pen Caoh wah thengz ne prih Phraz Pen Caoh a wa truz naeh peur la pehz.

21Ihz keum rang mawh leh tang kreung tawnz pao kaang daehz ne yaeh nam leh bawnz phrihz phrahz hnhz. 22Keuiz daz maang ihz keum rang baaiz mawh lak hnhz ne pae hnhz, leh thengz kreung tawnz an hnhz phawmz mawh rae rimz leh phrihz phrahz an hnhz rawmz mok.

23Ihz nam naeh plaakz Ohz ne naeh ihz thiangz Ohz, ihz nam rawmz tawiz Ohz ne naeh ihz sraz sraz.

Lawng phiz raai mial kut

(Matthe 12:43-45)

24Meuz phiz raai lae thaz ihz ne lan tawiz ti hawngz, khahz dawmz ti moh. Meuz hnhz nam awlz ti moh ne daz mial daehz eunz ngaz weng cu mial ti moh trimz. 25Meuz phraeoz weng mial ne awlz pisz mok phreoz mok laep laep. 26Phiz an diz raak leh phiz an raai lak daehz teu pulz, kut truz moh tuhz an diz. Reung naeh thaz puatz ihz an diz na lak meuz aacz boh.”

Reung dengz rak an mawn

27Meuz phangz Yesuhz daz boh ceun diz ne, maang keun nyah hawkz naeh tuhz wungz ihz ne raak daz, “Mah an keun meur Tahz ehz boh damz omz buhz Tahz ehz ne maang reung dengz rak.”

28Yesuhz mial daz, “Keuiz daz ihz teuk ngarz mony Phraz boh cih tawiz ne baaiz naeh an rak.”

An laak laaiz Yonah

(Matthe 12:38-42)

29Meuz wungz ihz keui keur rim Yesuhz ne Hnhz daz, “Ihz seu ni naeh kaap ihz raai, keuh khahz an laak laaiz rak seum sangz. Keuiz daz neuz lak an laak laaiz Yonah, Ohz nam plaez keuh nahz naehz. 30Ceun Yonah penz an laak laaiz a ihz weng Nineweh ne, Kuanz Ihz kaw ngaz penz ta ihz kaap seu ni nahz. 31Meuz tatz traz ne naang haw khamz prih Seun Daalz ngaz aez taam a keuh, kawp daz hnhz moh prih yaan tui truz teuk ngarz mony reu ma pinya khunz Solomon. Ohz daz pehz nahz, a niz maang ihz mawh lak khunz Solomon. 32Meuz tatz traz ne ihz weng Nineweh keui ngaz rawi ceng aez taam keuh, kawp daz keuh caanz reung dengz kawi daehz meuz keuh ngarz Yonah krai, a niz maang ihz mawh lak Yonah.

Ngaai naeh ceun ngal ngawiz toz

(Matthe 5:15, 6:22-23)

33Ihz kleoz ngal ngawiz ne yaeh nam leh sroz dupz, nam seun tapz mok hnhz. Tam mok kaai lakz hnhz leun, aez ihz kut tuhz kaang keui caang awlz thaangz. 34Ngaai pehz naeh ngal ngawiz toz pehz. Meuz ngaai pehz rak ne thaangz aasz tang toz. Keuiz daz meuz ngaai nam rak leui kaw bimz lang tang toz. 35Seu tih yak cih aez an thaangz tuhz daehz penz an bimz. 36Beuk thaangz tang toz kaw nam maang ti bimz rae ceun ngal ngawiz thaangz kaai toz pehz ne aasz tang toz.”

Yesuhz nae Pharise boh ihz mawz kyaamz

(Matthe 5:15, 6:22-23)

37Meuz Yesuhz a wa lao ceun diz ne, maang Pharise hawkz truz raak Hnhz suamz seum suamz, Hnhz kaw kut keu dez suamz. 38Meuz Pharise an naeh tahz kaang awlz Yesuhz suamz seum suamz nam khez tihz ne sangz. 39Kawp ceun diz Yesuhz daz hnhz nahz, “Pharise pehz keui teuk aamz thaz nawk klakz boh sroz, keuiz daz tuhz nao samz neuk taw lawphahz boh an raai keui pan. 40Ihz ngeu keui aez! Phraz Pen Caoh phaan cih thaz nawk tang tuhz nao nam anz haz? 41Beuk pehz aez ihz phaanz keui nahz an naeh tuhz nao kaw a wa aamz hacz aamz ta pehz.

42Pharise keui aez, pehz naeh an nam rak! Pehz leh imz krim boh keul disz, teungz an kut seu neumz klawhz meoz keui lu seu kawlz pun seu pun Phraz Pen Caoh nahz kaw pehz nam cih phrengz, nam cih tawiz reung dengz rak Phraz Pen Caoh. An lo lu kaw pehz bawnz lu, an lo cih ihz nahz kaw pehz bawnz cih phrengz phrengz.

43Pharise keui aez, pehz naeh an nam rak! Pehz dawhz ti keu dez trawng dutz tuhz crawp, sunz aez ihz tak nap suamz daehz tawiz teur laas. 44Keuiz daz pehz eunz naeh an nam rak! Pehz naeh ceun peun lu ihz keui nuar boh lang kol hnhz kaw nam mas tuhz keutz naeh peun lu.”

45Ihz mawz kyaamz hawkz daz Yesuhz nahz, “Tahz, beuk naeh ceun diz, Mih daz tang ehz eu.”

46Yesuhz kaw daz, “Ihz mawz kyaamz keui aez, pehz naeh an nam rak! Kawp daz pehz cao ihz baekz an kreuk keui, pehz nam leh tang kuanz tihz daehz teu lam lawh. 47Ihz an nam rak keui, pehz cih peun lu ihz taangz phraz, an ihz keu daehz keu daepz pehz piamz. 48Pehz penz phawmz ihz keu daehz keu daepz daehz, keuh tahz piamz, pehz tahz cih peun lu. 49Kawp ceun diz pinya Phraz Pen Caoh lao mok, ‘Ohz phuhz ihz taangz Ohz boh teu maan a keuh, keuiz daz teur ka keuh piamz, teur ka keuh pae suamz.’ 50Kawp ceun diz keuh te talz taam daehz piamz ihz taangz phraz thaz meuz seun teungz tae prih keu tehz, 51kaanz ihz piamz Abel taw ihz piamz Sekhariah teun khinz khrengz tucz boh ti seu ngamz.

52Ihz mawz kyaamz keui aez, pehz naeh an nam rak! Pehz tawnz mok sawz keur wah pinya rae pehz kaw nam kut, ihz ngaz kut kaw pehz kan.”

53Meuz Yesuhz lae lan thaz a diz ne ihz mawz kyaamz boh Pharise keui truz cu Hnhz, khahz reung dengz kawi, maanyz heungz baaiz. 54Keuh pao yawt ngaz ceu dakz mony reu ma anz Hnhz upz pleung naehz.

Currently Selected:

Lukas 11: ril

Highlight

Copy