Lukas 10
10
Yesuhz cao teu paez pulz kawlz aarz lan
1Waaiz an diz Yesuhz khaanz thaengz teu paez pulz kawlz aarz rae plawiz lan keuh ihz keu aarz teur tawiz, aez keuh lan aacz Daehz tawiz weng tawiz pruh ti Daehz ngaz lan. 2Hnhz leh pung taek daz keuh nahz, “An rak seum woc keui heungz baaiz, keuiz daz ihz woc samz lany. Suz tawngz aez Tahz phuhz truz thaengz ihz woc. 3Lan raez, Ohz phuhz lan pehz naeh ceun soz kyehz plawiz peur lah sohz prawk. 4Yak khaenz paekz, seu kiz boh cawng khlapz, yak deukz tak ihz tawiz reung dengz. 5Meuz pehz kut tuhz kaang an nae kaw seun teungz lao, ‘Reung dengz nimz aez naeh kaai kaang an ni se kamz.’ 6Beuk maang ihz theukz reung dengz nimz tuhz kaang an diz kaw hnhz ngaz bawnz. Beuk nam maang kaw reung dengz nimz an diz ngaz truz cu mial pehz. 7Thangz kaang ihz an saanyz rap pehz. Suamz tiangz an keuh raenz aez, kawp daz ihz cih kaanz ne theukz bawnz boh langz keum rang. Yak kraai ti moh cur seu kaang raw seu kaang. 8Meuz pehz kut tuhz weng an nae kaw, ihz saanyz rap pehz ne suamz an keuh damz. 9Cih aez ihz penz keui moh rak, rawz tang ihz nahz, ‘Prih Phraz Pen Caoh a wa thatz pehz.’ 10Keuiz daz tawiz weng an nam saanyz rap pehz ne lan cu reung dengz longz rae daz, 11‘Ehz pisz thengz mun muk tuhz weng pehz an takz cawng ehz, aez naeh an cih khatz pehz keuiz daz tang tang mok, prih Phraz Pen Caoh ne a wa thatz pehz keuiz!’ 12Ohz daz mawn pehz nahz, meuz seu ngihz tatz traz ne weng an diz talz na lak weng Sodom.
Weng ihz an nam mawz yum
(Matthe 11:20-24)
13Ihz weng Khorasin keui, naeh an nam rak, ihz weng Betsaida kaw aez talz tang daehz. An laak laaiz an Ohz plaez tuhz paarz ne khanz Ohz plaez tuhz weng Taia boh weng Sidon kaw kaar taan daehz caanz reung dengz kawi thaz meu naeh rae kap kreung teur haaoz, keu dez tuhz keum rum. 14Kaai seu ngihz tatz traz ne paarz ngaz talz na lak weng Taia boh weng Sidon. 15Weng Kapernaum aez! Mih sunz aez ihz phrawz daehz lang kaang raaoz haz? Nam keuiz, mih ngaz talz ihz teuk klaez daehz phraeoz tuhz ngal raai.”
16Yesuhz lao teu paez Daehz, “Ihz teuk ngarz pehz ne naeh ihz teuk ngarz Ohz, ihz thiangz pehz ne naeh ihz thiangz Ohz. Ihz thiangz Ohz samz naeh ihz thiangz Phraz an phuhz Ohz truz.”
Teu pae pulz kawlz aarz keui weng phraeoz mial
17Meuz teu paez pulz kawl aarz keui weng phraeoz mial ne seuz phawmz lao Hnhz daz, “Tahz, phiz keuiz kaw teuk ngarz ehz, meuz ehz leh mus Mih lao ne.” 18Yesuhz daz keuh nahz, “Ohz awlz Satan klaez thaz kaang raaoz naeh ceun laak lawk. 19Yawt, Ohz aez pehz nahz a na lang kol taanz khoz hacz aamz tang an pae heunyz boh maengz keur ngawz keui. Nam maang naehz cih teuk suhz pehz. 20Yak seuz phawmz taw phiz teuk ngarz mony pehz, seuz phawmz kawp mus pehz maaiz mok lang kaang raaoz.”
Yesuhz seuz phawmz
(Matthe 11:25-27, 13:16-17)
21Meuz ceun diz Yesuhz seuz phawmz kawp Khuanz Seu Ngamz ne daz, “Paz, Tahz an upz peung lang kaang raaoz boh keu tehz, kez cuz mawh baaiz kawp unz mok phrihz phrahz keu diz thaz ihz mas boh ihz mawz, samz plaez kuanz ihz kyehz keui nahz an diz. Paz, an keu ni penz truz ceun Mih sunz cih kez cuz.
22Paz Ohz aez Ohz nahz hacz aamz. Neuz lak Paz, yaeh nam mas Kuanz. Neuz lak Kuanz boh ihz an Kuanz cih aez mas pan, yaeh nam mas Paz.”
23Waaiz an diz Yesuhz waaiz lao taw teu paez Daehz keui pan daz, “Ngaai pehz naeh an rak, kawp daz pehz awlz an taan awlz. 24Ohz daz pehz nahz, ihz taangz phraz boh khunz keui sunz awlz an pehz awlz kaw nam awlz, sunz ngarz an pehz ngarz kaw nam ngarz.”
Mony pung taek lawng ihz Samaria an rak
25Ihz mawz kyaamz hawkz ceng maanyz Yesuhz tang sunz caam yawt daz, “Tahz sra, aez ohz caam phawmz cen cen ne lo cih naehz?”
26Yesuhz kaw mial daz, “Tuhz kyaamz lik taemz mok naehz da? Mih rawz maen ceun nae da?”
27Ihz an diz kaw daz, “Mih lo rak Phraz Cen Cen, Phraz Pen Caoh daehz kingz keu nuasz hacz aamz, khuanz hacz aamz, keum rang hacz aamz, phawmz hacz aamz. Samz rak ihz rim daehz ceun mih rak toz daehz.”
28Yesuhz daz, “Anz, cih ceun diz raez. Mih bawnz caam phawmz cen cen eu.”
29Ihz an diz kaw cih ceun daehz naeh ihz cih phrengz rae maanyz Yesuhz, “Yaeh naeh ihz rim daehz hoh?”
30Yesuhz mial daz, “Maang ihz hawkz moh weng Yerusalem lan weng Yerikho ne talz conz. Conz keui pucz thengz kreung hnhz, tiz teuk suhz mawn, meuz raenz yam ne lan thengz. 31Saangz longz seu paz truz tawiz reung dengz rae meuz awlz hnhz ne wiar thengz. 32Moh thaengz nyaenz awh, maang ihz Lewi hawkz truz tawiz reung dengz senz an diz rae awlz thaengz tang daehz kaw wiar thengz thaengz. 33Ihz prih Samaria hawkz lan tawiz senz an diz rae meuz hnhz awlz ihz an diz ne maang phawmz teur yawng cu hnhz. 34Lan cu hnhz, thukz aez ihz an diz nahz nam man boh keu daaoz plaehz seu pit, pok aez tang ti suhz. Samz leh tang ihz an diz taangz kaai meu rang mahz liz daehz, lan cu crawp ti ihz yaetz preumz rae lum la hnhz a diz. 35Ceun kap siz ne hnhz aez tahz ti yaetz preumz nahz paekz ron aarz pyaz rae daz, ‘Lum la aez hnhz rak rak naz, beuk paekz nam kumz kaw beuk ohz truz tui aez thaengz.’ daz ceun diz rae lae lan.”
36Yesuhz maanyz hnhz, “Keuh keu waiz ne naeh yaeh ihz rim ihz an talz conz a?”
37Ihz mawz kyaamz kaw daz, “Ihz an teur yawng hnhz eu.”
Yesuhz lao hnhz, “Lan cih ceun diz naz.”
Martha kaar Mari
38Meuz Yesuhz boh teu paez keui lan tawiz reung dengz ne kut tuhz pruh seu pruh, maang keun nyah hawkz, mus hnhz daz Martha ne, saanyz Yesuhz tuhz kaang daehz. 39Hnhz maang seum bohz keun nyah hawkz mus daz Mari, meuz Yesuhz sawnz ne Mari keu dez teuk ngarz a cawng Yesuhz. 40Martha samz phawmz kawcz tawiz damz khaekz. Hnhz truz cu Yesuhz daz, “Tahz, seum bohz ohz nam kawr ohz, ohz bawnz cih daehz ne ngaz teungz mah haz? Lao hnhz truz kawr ohz luz.”
41Keuiz daz Caoh Phraz lao hnhz, “Martha, Martha! Mih kawcz phawmz, talz seuk ya tawiz klawhz ceu klawhz meoz. 42Keuiz daz an lo ne maang thaengz seu meoz. Mari samz ras leh daehz nahz an rak rae yaeh nam rimz bawnz hnhz eunz.”
Currently Selected:
Lukas 10: ril
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
