फिलिप्पी 1
1
1ख्रीष्ट येशूका सेवकहरू, पावल र तिमोथीबाट,
ख्रीष्ट येशूमा भएका फिलिप्पीका पवित्र जनहरू साथै मण्डलीका अध्यक्षहरू र मण्डली सेवकहरू सबैलाई:
2हाम्रा परमेश्वर पिता र प्रभु येशू ख्रीष्टबाट तिमीहरूलाई अनुग्रह र शान्ति।
धन्यवाद ज्ञापन र प्रार्थना
3तिमीहरूलाई म जब-जब याद गर्छु, म मेरा परमेश्वरलाई सधैं धन्यवाद चढाउँछु। 4मेरो हरेक प्रार्थनामा तिमीहरू सबैका निम्ति म सधैं आनन्दसाथ प्रार्थना गर्दछु। 5किनकि सुसमाचारको काममा सुरुदेखि नै अहिलेसम्म तिमीहरूको सहभागीता रहेको छ। 6यो कुरामा दृढ भरोसा छ कि, परमेश्वर जसले तिमीहरूमा एउटा असल काम सुरु गर्नुभएको छ, उहाँले नै ख्रीष्ट येशूको पुनरागमनसम्म त्यो काम पूरा गर्नुहुनेछ।
7तिमीहरू सबैका निम्ति यस्तो महसुस गर्नु मेरो लागि उचित छ; किनकि मैले मेरो हृदयमा तिमीहरूलाई राखेको छु, त्यसैले चाहे म कैदमा रहँदा अथवा सुसमाचारको समर्थन र प्रतिरक्षा गर्दा, यसमा मसँगै तिमीहरू सबै परमेश्वरको अनुग्रहमा सहभागी भएका छौ। 8परमेश्वर साक्षी हुनुहुन्छ कि, ख्रीष्ट येशूको प्रेमले तिमीहरू सबैको कति धेरै म तृष्णा गर्दछु।
9अनि मेरो प्रार्थना यही छ, ज्ञान र अन्तर्दृष्टिको गहिराइमा तिमीहरूको प्रेम झन्-झन् प्रशस्त हुँदै जाओस्। 10यस उद्देश्यले कि, तिमीहरूले जे उत्तम छ, त्यो छुट्याउन सक; ताकि ख्रीष्टको पुनरागमनमा तिमीहरू शुद्ध र दोषरहित रहन सक। 11अनि परमेश्वरको महिमा र प्रशंसाको निम्ति येशू ख्रीष्टद्वारा आउने धार्मिकताका फलले तिमीहरू भरिपूर्ण हुन सक।
पावलको कैदद्वारा सुसमाचारको विस्तार
12दाजुभाइ-दिदीबहिनीहरूहो, अहिले ममाथि आइलागेका कुराहरूले वास्तवमा सुसमाचारलाई विस्तार गर्ने काम गरेको छ भनी तिमीहरूले जान भन्ने म चाहन्छु। 13परिणाम स्वरूप सारा दरबारका पहरादारहरू र बाँकी सबै मानिसहरूकहाँ म ख्रीष्टको निम्ति कैदमा रहेको हुँ भनी छर्लङ्ग भएको छ। 14अनि मेरो कैदको कारणले गर्दा प्रभुमा धेरै विश्वासीहरू साहसी भएका छन्, र निडरतासाथ सुसमाचार प्रचार गर्न धेरै उत्साहित भएका छन्।
15यो सत्य हो, कतिले डाह र प्रतिस्पर्धाका कारण ख्रीष्टलाई प्रचार गर्दछन्, तर अरूहरूले चाहिँ स्वच्छ मनसायले गर्दछन्। 16म सुसमाचारको सुरक्षाका निम्ति कैदमा परेको छु भनी जानेर स्वच्छ मनसायले प्रचार गर्नेहरूले यो काम प्रेमका लागि गर्दछन्। 17डाह र प्रतिस्पर्धाले प्रचार गर्नेहरूले स्वार्थी उद्देश्यले बेइमानीका साथ ख्रीष्टको प्रचार गरे; ताकि म कैदमा रहेको बेला तिनीहरूले मलाई अझ धेरै समस्या खडा गर्न सकून्। 18तर के भयो त? महत्त्वपूर्ण कुरा यही नै हो कि, चाहे खराब मनसायले होस् या सत्यतामा, जुनसुकै तरिकाले भए पनि ख्रीष्ट नै प्रचारिनुहुन्छ। यसैकारणले म आनन्दित हुन्छु।
हो म निरन्तर आनन्दित हुनेछु। 19किनकि तिमीहरूका प्रार्थना र येशू ख्रीष्टको आत्माले दिनुहुने सहायताद्वारा ममाथि आइलागेका कुराहरू मेरै छुटकाराको निम्ति हुनेछ भनी म जान्दछु। 20म उत्कट इच्छा र आशा गर्दछु, कि म कदापि शर्ममा पर्नेछैनँ, तर मसँग प्रशस्त साहस हुनेछ, ताकि चाहे जीवनद्वारा होस् वा मृत्युद्वारा, सदाझैं मेरो शरीरमा ख्रीष्ट उच्च पारिनुहुनेछ। 21किनकि मेरो निम्ति जिउनु ख्रीष्ट हो, अनि मर्नुचाहिँ लाभ हो। 22यदि म शरीरमा नै जिइरहनुपर्ने हो भने यसको अर्थ मेरो निम्ति फलदायी परिश्रम हुनेछ। तापनि मैले के रोज्ने त? सो म जान्दिनँ! 23म दुवैबाट दबाबमा परेको छु: बिदा भएर ख्रीष्टको साथमा हुने इच्छा गर्दछु; किनकि यो धेरै नै असल छ। 24तर म शरीरमा नै रहिरहनु तिमीहरूका निम्ति अझ बढी आवश्यक छ। 25म निश्चित भएँ कि, विश्वासमा तिमीहरू सबैको उन्नति र आनन्दको निम्ति म सबैसँग जीवित रहिरहनेछु भनी म जान्दछु, 26यसकारण म फेरि तिमीहरूकहाँ आउँदा मेरो कारण तिमीहरूलाई ख्रीष्ट येशूमा गर्व गर्ने प्रशस्त कारण होस्।
सुसमाचारको योग्य जीवन
27तिमीहरूलाई जेसुकै आइपरे तापनि ख्रीष्टको सुसमाचारको योग्य चालचलनमा चल। तब चाहे म आएर तिमीहरूलाई देखूँ, अथवा अनुपस्थित रहेर तिमीहरूका बारेमा सुनूँ, म यही कुरा थाहा पाउन चाहन्छु, कि तिमीहरू एउटै आत्मामा दृढ भई खडा छौ, र सुसमाचारको विश्वासको निम्ति एउटै मनका भई मिलेर परिश्रम गर्दछौ। 28तिमीहरू विरोधीहरूसँग कुनै किसिमले डराउनु हुँदैन। यो तिनीहरूका निम्ति एउटा चिन्ह हो कि, तिनीहरू नाश हुनेछन्, तर तिमीहरूचाहिँ बचाइनेछौ—यो परमेश्वरबाटको चिन्ह हो। 29किनकि ख्रीष्टको निम्ति तिमीहरूलाई यो दिइएको छ कि, उहाँमाथि विश्वास गर्ने मात्र होइन, तर उहाँको निम्ति कष्ट पनि भोग्नुपर्छ। 30किनकि तिमीहरू पनि त्यही संघर्षमा नै छौ, जुन संघर्ष तिमीहरूले ममा देख्यौ र त्यो अझै पनि ममा छँदैछ भनी अहिले सुनेका छौ।
Currently Selected:
फिलिप्पी 1: NCV
Highlight
Share
Copy
Want to have your highlights saved across all your devices? Sign up or sign in
पवित्र बाइबल, नेपाली समकालीन संस्करण™
प्रतिलिपि अधिकार © 1998, 2006, 2021 Biblica, Inc.
अनुमतिसहित प्रयोग गरिएको छ। सम्पूर्ण अधिकार विश्वव्यापी रूपमा सुरक्षित रहनेछ।
Nepali Contemporary Version™, New Testament
Copyright © 1998, 2006, 2021 by Biblica, Inc.
Used with permission. All rights reserved worldwide.
