यहूदा 1
1
1येशू ख्रीष्टको सेवक र याकोबको भाइ यहूदाबाट,
तिनीहरूलाई, जो परमेश्वर पिताबाट बोलाइएका र प्रेम गरिएका येशू ख्रीष्टको लागि#1:1 लागि अर्थात् ख्रीष्टमा सुरक्षित राखिएका छन्।
2तिमीहरूलाई प्रशस्त मात्रामा कृपा, शान्ति र प्रेम होस्।
ईश्वरहीन मानिसहरूको पाप र विनाश
3प्रिय मित्रहरूहो, म तिमीहरूलाई हामी सहभागी भएको मुक्तिको विषयमा लेख्न अति इच्छुक भए तापनि परमेश्वरका सन्तहरूलाई सधैंको निम्ति सुम्पिएको विश्वासको रक्षा गर भनेर तिमीहरूलाई विन्ती गर्दै लेख्न मलाई इच्छा लाग्यो। 4किनकि धेरै अघिदेखि दण्डको भागीदार हुन् भनी लेखिएका कतिपय मानिसहरू तिमीहरूका बीचमा गुप्त रूपले पसिसकेका छन्। तिनीहरू ईश्वरहीन मानिसहरू हुन्, जसले हाम्रा परमेश्वरको अनुग्रहलाई दुष्ट आचरणको अनुमतिपत्रको रूपमा बदली गर्छन्, अनि हाम्रा एक मात्र स्वामी प्रभु येशू ख्रीष्टलाई इन्कार गर्दछन्।
5तिमीहरूले यो सबै जानिसकेका छौ तापनि म तिमीहरूलाई यो स्मरण गराउन चाहन्छु—प्रभुले आफ्नो जातिलाई इजिप्ट देशबाट निकालेर ल्याउनुभयो; तर विश्वास नगर्नेहरूलाई पछिबाट नष्ट गर्नुभयो। 6ती स्वर्गदूतहरू जसले आफ्नो अधिकारको स्थान राखेनन्, तर तिनीहरूका आफ्नै घरसमेत त्याग गर्नेलाई उहाँले त्यस महान् दिनको न्यायको निम्ति अनन्तको साङ्लोले बाँधेर अन्धकारमा राख्नुभएको छ। 7यस्तै किसिमले सदोम र गमोरा अनि छेउछाउका शहरहरूले आफूलाई व्यभिचारको अनैतिकता र भ्रष्टताको लागि दिइहाले। तिनीहरू त अनन्तको आगोको दण्ड भोग्नेहरूका नमुना भएका छन्।
8ठीक यही किसिमले यी मानिसहरू गुप्त रूपले पसेका छन्। यी ईश्वरहीन मानिसहरूले सपनाको आधारमा तिनीहरूका आफ्नै शरीरलाई दूषित पार्छन्; अधिकारलाई इन्कार गर्दछन्, अनि स्वर्गीय प्राणीहरूको निन्दा गर्छन्। 9तर प्रधान दूत माइकलले पनि मोशाको शरीरको विषयमा शैतानसित विवाद गर्दा त्यसको विरुद्धमा निन्दापूर्ण दोष लगाउन साहस गरेनन्, तर “प्रभुले तिमीलाई हप्काऊन्!#1:9 हप्काऊन्! यहूदाले मोशाको यहूदी करारको विषयमा सङ्केत गरेका हुन् लगभग पहिलो ई.सं. शताब्दीतिर” मात्र भनेका थिए। 10तरै पनि यी मानिसहरूले निर्बुद्धि पशुहरूझैं सहज बुद्धिले कुरा बुझ्छन्; त्यसैले तिनीहरू आफूले नबुझेका कुराहरूको निन्दा गर्छन्। यी कुराहरूले नै तिनीहरूलाई नष्ट गर्नेछन्।
11यस्ताहरूलाई धिक्कार छ! तिनीहरू कयिनको#1:11 उत्प 4:3-8 बाटोमा लागेका छन्। तिनीहरू लाभको निम्ति बालामको#1:11 गन्ती 22; 23; 24 गल्तीतिर हतारिन्छन्। तिनीहरू कोरहको#1:11 गन्ती 16 विद्रोहमा जस्तै नष्ट भएका छन्।
12यी मानिसहरू तिमीहरूका प्रेम भोजहरूमा कलङ्कहरू हुन्, जो सङ्कोचविना निर्धक्कसित तिमीहरूसँगै खान्छन्। तिनीहरू आफ्नै मात्र पेट भर्ने गोठालाहरू हुन्। तिनीहरू बतासले उडाइएका पानीविनाका बादलहरू हुन्। तिनीहरू शरद ऋतुका फल नभएका, दुईपल्ट मरिसकेका र जरैसित उखेलिएका रूखहरू हुन्। 13तिनीहरू समुद्रका उर्लंदा छालहरू हुन्; जसले आफ्नै शर्मका फिँज काढ्छन्। तिनीहरू डुलुवा ताराहरू हुन्, जसको लागि सबैभन्दा कालो अन्धकार सदाको लागि साँचिएको छ।
14आदमदेखि सातौं पुस्ताका हनोकले यस्ता मानिसहरूबारे यसरी अगमवाणी गरेका थिए: “हेर, प्रभु हरेकको न्याय गर्नलाई आफ्ना हजारौं-हजारौं पवित्र जनहरूसँग आउँदै हुनुहुन्छ, 15अनि ती सबै, जसले अभद्र तरिकाले ईश्वरहीन कामहरू गरे, र ईश्वरहीन पापीहरूले उहाँको विरुद्धमा बोलेका सबै कुराहरूको दण्ड दिनलाई आउँदै हुनुहुन्छ।”#1:15 यहूदीहरूको पहिलो पुस्तक एनोशबाट लगभग पहिलो ई. पू. शताब्दीतिर 16यी मानिसहरू गनगन गर्नेहरू र दोष खोज्नेहरू हुन्। तिनीहरू आफ्नै दुष्ट विचारको पछि लाग्छन्। तिनीहरू आफ्नै विषयमा घमण्ड गर्छन्, र तिनीहरू आफ्नै लाभको निम्ति अरूको चापलूसी गर्दछन्।
स्थिरताको लागि आव्हान
17तर प्रिय मित्रहरूहो, हाम्रा प्रभु येशू ख्रीष्टका प्रेरितहरूले पहिलेबाट नै के भनेका छन्, सो सम्झ। 18तिनीहरूले तिमीहरूलाई भने, “अन्तिम समयहरूमा आफ्नै इच्छाहरूको पछि लाग्ने ईश्वरहीन निन्दकहरू हुनेछन्।” 19यिनीहरू त्यस्ता मानिसहरू हुन्, जसले तिमीहरूमा विभाजन ल्याउँछन्, जससित परमेश्वरको आत्मा नभएका, तर सहज बुद्धिको पछि लाग्नेहरू हुन्।
20तर प्रिय मित्रहरूहो, तिमीहरूले आफूलाई अति पवित्र विश्वासमा निर्माण गर, पवित्र आत्मामा प्रार्थना गर। 21प्रभु येशू ख्रीष्टले तिमीहरूलाई अनन्त जीवनमा लैजाने कृपालाई पर्खंदा तिमीहरू आफूलाई परमेश्वरको प्रेममा स्थिर बनाइराख।
22अनि शङ्कालुहरूप्रति कृपालु बन। 23अनन्तको आगोमा पर्न लागेका केही मानिसहरूलाई झट्टै बचाओ; उहाँको डरलाई हृदयमा राखेर अरूहरूप्रति सधैं दया देखाओ। भ्रष्ट शरीरले दाग लगाएको वस्त्रलाई घृणा गर।
आशिषको वचन
24अब उहाँलाई नै, जसले तिमीहरूलाई पतन हुनदेखि बचाउनुहुन्छ र तिमीलाई उहाँको महिमित उपस्थितिमा अति आनन्दसाथ निष्कलङ्क प्रस्तुत गर्न सक्नुहुन्छ। 25हाम्रा एउटै मुक्तिदाता परमेश्वरलाई हाम्रा प्रभु येशू ख्रीष्टद्वारा महिमा, गौरव, पराक्रम र अधिकार युगानुयुग अघि, अहिले, सदा-सर्वदा भइरहोस्। आमेन!
Currently Selected:
यहूदा 1: NCV
Highlight
Share
Copy
Want to have your highlights saved across all your devices? Sign up or sign in
पवित्र बाइबल, नेपाली समकालीन संस्करण™
प्रतिलिपि अधिकार © 1998, 2006, 2021 Biblica, Inc.
अनुमतिसहित प्रयोग गरिएको छ। सम्पूर्ण अधिकार विश्वव्यापी रूपमा सुरक्षित रहनेछ।
Nepali Contemporary Version™, New Testament
Copyright © 1998, 2006, 2021 by Biblica, Inc.
Used with permission. All rights reserved worldwide.
