Zechariah 2
2
Piteena Khau Mukholna
1Mukholna dang khat ah a khut sungah piteena khau a toai pasal khat ka mu hi. 2“Koisung pai tu ni ziam?” ci in ka dongh hi.
Ama in, “Jerusalem bangza in sau a, bangza in zai ziam, ci in tee tu khi hi,” ci in hong zo hi.
3Tuaciang keima hong paupui vantunglalang sia mai sangah kal hong suan ka mu a, vantunglalang dang khat ama taw kisi tu in hong pai hi. 4A masa sia in a dang khat sia munah, “Zia sung a pikhau toai khangmoipa kungah va tai ta'n a, Jerusalem ah mihing le ngannote tam leilam tu ahiciang luphung taw uum tu in lian lei tu hi. 5Topa in khuapi huu tu in ama mama khuapi kiimkot a mei luphung khat hi tu a, ama tua munah a vaangletna theampo taw a teang tu in kamciam pia zo hi va ci ta'n,” ci hi.
Saltaangte Inn ah Cia tu in Kisam
6-7 Topa in a mite tungah, “Mun theampo ah note kong thethaang hi. Ahihang tu in, no saltaangte awng, Babylon panin suakta in Jerusalem ah heak kik tavun. 8Khat pawpo in note hong saat le, kei a tu manphabel ka sak sia a saat ahi hi,” ci hi.
Tua ahikom Vaanglianbelpa Topa in a mite ii vanh a suttol minamte tungah hi thu son tu in keima hong puak hi: 9“Topa ama mama in note hong sim tu a, khatvei lai a na naseam ahi ngeite in na vanh uh hong suttol kik tu hi,” hong cisak hi.
Hi bangin hong pian tak ciang Vaanglianbelpa Topa in kei hong puak hunlam a kuama po in he tu uh hi.
10 Topa in, “Jerusalem mite awng, lungdamin lasa vun! Note sungah a teang tu in kong pai hi!” ci hi.
11Tua hun ciang minam tam mama Topa kungah pai tu a, ama mite suak tu uh hi. Ama in note sungah hong teang tu a, no kungah kei hong puak hunlam na he tu uh hi. 12Judah mite khatvei ma ama ngam thiangtho sungah Topa ii nei tuam hong hi kik tu a, Jerusalem khua sia ama itbel khuapi hong hi kik tu hi.
13Ama sia a teenna mun thiangtho panin hong pai ahiciang mi theampo awng, Topa mai ah thim dide in om vun.
Currently Selected:
Zechariah 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
