Nehemiah 5
5
Mizawngte a Kinencipna
1Tawmvei zawkciang nupi le pasal, mi tam mama in Judah a mipuite tungah lungkim ngawlin a phun uh kipan hi. 2Pawlkhat in, “Ko innkuan liante in nuntak natu antang ka kisamh uh hi,” ci hi.
3A dangte in, “Pukthi ngawl natu in, antang a khom a nga natu ka lote, ka sapithuante le ka innte ka pong uh hi,” ci hi.
4A dangte in, “Koma lote le sapithuante tungtaang phiangshia piak tu in sum ka puk uh kul hi. 5Ih Judah mipuite taw minam kibang khu hi. Ka tate amate tate taw kibangin pha hi ngawl ziam? Ahizong ka tate sila ka suasak kul hi. Ka tanute pawlkhat sila in kizuak zo hi. Ko cimaw khu hi, banghang ziam cile koma ii lote le sapithuante hong kilaaksak zo hi,” ci lai uh hi.
6A phunnate ka zaak ciang ka thin uuk a, 7ka ngamtat tu ka khensat hi. Mipi lampuite le a uliante ka pau a, “Na suapuite nengcip nu hi!” ka ci hi. #Pu 22:25; Thiam 25:35-37; Thkna 23:19-20
Tua buaina taw kisai in mihonpite ka sam a, 8amate tungah, “Ngamdangte tungah amate le amate a kizuak ih Judah mealheakte sia ih hi theiza in ih tan kik hi. Tu in Judah a mipuite ahi note tungah amate le amate hong kizuak natu in na mealheakte zawthawk vawt nu hi!” ka ci hi. A lampuite thim dide in om a, bangma son thei ngawl uh hi.
9Tuaciang keima in, “Na ngamtatna uh khial nu hi! Pathian ii thu ni in, a maan bang na sep kul hi. Tua hile ih ngalte ahi Gentile te in ei hong selno natu thu om ngawl tu hi. 10Mipite in keima tung pan sum le antang ka pusak hi, ka lawmte le ka na a seamte zongh tuabang ma in sum le antang keima tung pan ka pusak hi. Tu in leibate ih not nawn buatu hi. 11No tungah amate hong bat — dangka, antang, sapittui ahibuale olive thau teng theampo maisak siat tavun. A lote, a sapithuante, a olive huante le a innte thakhat ma in amate pia kik paih vun!” ka ci hi.
12Lampuite in, “Na ci bangin ka vawt tu uh hi. A neisate ka pia kik tu uh a, leibate zongh ka siik buatu uh hi,” ci in zo kik hi.
Thiampite ka sam a, lampuite ii tu mama a, ka kamciam sia a zui natu in, thiampite mai ah lampuite ka kiciamsak hi. 13Tua zawkciang ka kawngsawmna dial suutin ka thing hi. Keima in, “Na kamciam bang a zui ngawl peuma Pathian in hi bangin hong thing tu a, Pathian in na innte le na neisa theampo la in, bangma hong nusiat ngawl tu hi,” ka ci hi.
Tualai ah a omte theampo in, “Amen!” ci in Topa pok uh hi. Tuaciang lampuite in a kamciam len uh hi.
Nehemiah ii A duhop Ngawlna
14Artaxerxes ii kumpilian a sep zawk kum kulna pan kipan kum 32 dong, kum sawm le kum nii sung theampo Judah ngam uk ka sep sungin ngamukmang khat ka hina taw ka nga an sia keima le ka mealheakte in ka ne bua uh hi. 15Ka mai ah ngamukmang a seam peuma mipite ii vanhngit hi a, ni simin a an tu le a sapittui tu in ngunn dangkatang 40 veu ngen uh hi. A naseamte ngawngawn in mipite nengcip hi. Ahizong keima in Pathian zakta ka hikom tuabangin ka ngamta bua hi. 16Ka tha ka ngal teng luphung cian kikna ah ka zangh a, keima atu in vanh bangma ka la bua hi. Keima atu na a seam pawpo luphung cianna ah kihel uh hi. 17Kiim le paam ngam pan ka kungah hong pai mi theampo dom ngawlin, ka an neakna sabuai ah Judah te le a lampuite 150 hunmaanin an ka vaak hi. 18Ni simin a neak tu khuital khat, tuu limcibel luk, le ak tam mama ka pia a, ni sawm simin sapittui thak ka pia hi. Ahihang mihonpite ii haksatna he ka hikom, ngamukmangpa ii nga tu hamphatnate ka la bua hi.
19Pathian awng, nang tungah thu kong ngen hi, hi mipite atu in ka septe theampo, keima noptuam natu in hong tepteesak ta'n.
Currently Selected:
Nehemiah 5: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
