Mark 12

Sapit huan A Saapthawte taw Thu Thusonteena

(Matthew 21:33-46; Luke 20:9-19.)

1Tuaciang Jesus in amate tungah thusonteena taw thu son hi. “Khatvei lai in pasal khat in sapithuan vawt a, dal taw uum in, a tuisuukna set atu leidum a taw zawkciang lo hun natu teitaan daw hi. Tua zawkciang, a saapthaw nuamte in saapsakin ama khualhaw hi.#Is 5:1-2 2Sapit nga law hun ciangin, ama tan tu tel teng a la tu in, a silate khat paisak hi. 3Lo saapte in tua silapa manin, saat a, a ngawlnguak in ciasak hi. 4Tua zawkciang huan neipa in, sila dang khat ma paisak hi; lo saapte in a lutang pan vel a, a maizumhuai dongin vawt uh hi. 5Huan neipa in sila dang khat ma paisak lai hi; tuasia pa thatlum uh hi; a dang tam mama zongh tuabang ma in vawt uh a, pawlkhat vel in, pawlkhat thatlum uh hi. 6Tuabang a sawl thei tu a taanglai mihing sia a it a tapa bek ahi hi. A khakbel ciangin ama in a tapa lo saapte munah paisak hi, ‘Ka tapa hi buang ahiciang, thasia hamtang vak’ ci hi. 7Ahihang tua lo saapte in, “Hisia pa lo neipa tapa hi. Hong pai tavun, that tawng, tua hile a neisate eima aa suak tu hi!’ ci uh hi. 8Tua ahiciang amate in lo neipa tapa manin thatlum uh a, a luang sapithuan pua sangah vawk hi.

9“Tua hile huan neipa in bang a law tu ziam?” ci in Jesus in dongh hi. “Ama hong kuan tu a, tua mihingte a thalup zawkciang, sapithuan sia lo saap dangte tungah aap tu hi. 10Laithiangtho sungah hi bangin a ki at sia sim ngeingawl lawlawm nu ziam?#Ps 118:22-23

‘Inn sate ii mannung ngawl hi ci a, a nil suangtum sia

a thupibel suangtum suak hi.

11Hi thu in Topa ii zeakna ahi hi;

ih et ciang lamdang hi ngawl ziam!’ ”

12Jew lampuite in Jesus mat sawm uh hi, banghang ziam cile amate in hi thusonteena sia amate huvau a sonna hi ci in tel uh hi. Ahihang mipite kiita ahikom amate in paisan uh hi.

Shia Piakna huvau Kidokna

(Matthew 22:15-22; Luke 20:20-26)

13Phariseete pawlkhat le Herod ii pawlmite pawlkhat in thudokna taw Jesus aitaa tu in paisak uh hi. 14Amate Jesus kungah hong pai uh a, “Syapa awng, ngualdang ii ngaisutnate awlmawk ngawlin thumaan a son pa hi, ci in kong he uh hi. Mihing min le zate zongh thupi sim tuan ngawlin Pathian ii mihingte atu a deisak thute hil hi, ci in kong he uh hi. Ih thukham in Rome Kumpilianpa, shia ih piak tu khaam ziam? Pia tu hi ziam, pia ngawl tu hi ziam, hong son ta'n,” ci uh hi.

15Ahihang Jesus in amate ii thimthel pilna teng tel a, ‘Banghangin kei thaang hong sia nuam nu ziam? Ngunn dangka khat hong paipui tavun, hong en sin tong,” ci hi.

16Amate in khat paipui a, ama in “Hite akua ii maitang lim le akua ii min ziam?” ci hi.

“Kumpilianpa aa hi,” ci in a zo kik uh hi.

17Tua ahikom Jesus in, “Tua ahile pha hi, Kumpilianpa ii neisa sia Kumpilianpa ma pia vun, Pathian ii neisa sia Pathian ma pia vun,” ci hi.

Tuasia ciangin amate in Jesus sia lamdang sa uh hi.

Thina pan Thawkikna Thu Dokna

(Matthew 22:23-33; Luke 20:27-40)

18Mihingte thina panin tho kik ngawl tu hi a ci Sadducee te pawlkhat Jesus kungah hong pai in, #Sawl 23:8 19“Syapa awng, hi thukham sia Moses in ei atu in a at ahi hi: ‘Pasal khat in a zi thi san in ta a nei buale, a pasal ii suapuipa in meingongnu sia teenpui tahen, tua hile ta a nei uh ciangin mithipa ta hi ci in kingaisun tu hi,’ ci hi.#Thkna 25:5 20Khatvei lai in unau pa sali om hi: a lianbel sia in zi nei a, ta nei ngawlin thi hi. 21Tua zawkciang a niina pa in, tua numei teenpui a, tuaciang ama zongh ta nei ngawlin thi hi. A thumna pa zongh tuabang ma ahi hi, 22tuaciang a dangte theampo zongh tuabang hi siat hi: unau sali bupin tua numei teenpui tek a, ta nei ngawlin thi tek hi. A khakbel in tua numei zongh thi hi. 23Tu in thaw kik ni ciang, tua nu sia akua zi hi tu ziam? A sali in teenpui tek hi,” ci uh hi.

24Jesus in, “Bangza in telkhial nu ziam! Na telkhial uh sia banghang ziam, ci in na he uh ziam? Banghang ziam cile no sia Laithiangtho ahizong Pathian vaang ahizong na he bua uh hi. 25Banghang ziam cile a thite sia nuntakna sungah a thaw kik ciangin, amate vantunglalangte bang hi tu a, a kiteang buatu hi. 26Tu in a thite phoktona taw kisai in: Moses ii Laibu sungah sawlpaang kuang sia ii thu, sim ngeingawl nu ziam? Tua ii sungah ki at a, Pathian in Moses tungah, ‘Kei sia Abraham ii Pathian, Isaac ii Pathian, Jacob ii Pathian ka hi hi,’ ci hi.#Pu 3:6 27Ama in a nungtate ii Pathian hi a, a thisate ii Pathian ahi bua hi. Telkhial mama nu hi!” ci in zo hi.

A Lian Thupiak

(Matthew 23:34-40; Luke 10:25-28)

28Thukham hil sya khat, tua kam kikupna sungah om hi. Jesus in Sadducee te pha takin zo kik thei ahi sia mu hi, tua ahikom ama in, thudok nop khat taw Jesus kungah pai hi, “Thupiak sung teng pan koisia thupibel ziam,” ci hi.#Lk 10:25-28

29Jesus in zo a, “A thupibel sia hisia hi, ‘Israel awng, ngai vun! Topa ih Pathian sia ama bekma Topa ahi hi.#Thkna 6:4-5 30Topa na Pathian sia na thin theampo, na thaa theampo, na ngaisutna theampo le, na thatang theampo taw it in.’ 31A niina a thupibel thupiak sia, ‘Nangma le nangma na ki it bangin na innpaamte it in’ Hite nii sangin a thupizaw thupiak dang om ngawl hi,” ci hi.#Thiam 19:18

32Thukham hil syapa in, Jesus munah, “Pha mama hi, Syapa awng, na ci bangin Topa bekma Pathian hi a, ama ngawl pathian dang om ngawl hi na ci sia thumaan hi.#Thkna 4:35 33Tuaciangin mihingte in Pathian sia a thin theampo, a ngaisutna theampo, le a thatang theampo taw a it tu uh kul hi; tuaciangin ama a ki it bangma in a innpaamte a it tu kul hi. Pathian tungah nganhing taw biakpiaknate le a dang biakpiaknate sangin, hi thukham niite zui tu thupi zaw hi,” ci hi.#Hos 6:6

34Jesus in tua pa ii zo kikna sia ciim kammal hi ci in mu ahikom, ama munah, “Nang sia Pathian ngam taw kikhuala ngawl ni hi,” ci hi.

Hisia zawkciang kuama in Jesus thudang a dongh ngam nawn bua uh hi.

Messiah taw kisai Thudokna

(Matthew 22:41-46; Luke 20:41-44)

35Biakinn sungah hilna a nei laitak Jesus in, “Thukham hil syate in bangbangin Messiah sia David ii suan hi ci thei ziam? 36Thaa Thiangtho in David sia hi bangin pausak hi:

‘Topa in ka Topa tungah:

Na ngalte na peang nuai ah kong koisak mateng,

hi sung ka ziatsang ah hong to ta'n ci hi.’#Ps 110:1

37“David mama in, ‘Topa’ ci hi; tua ahile Messiah sia David ii suan hi thei tu ziam,” ci hi.

Jesus in Thukham hil Syate kung pan Kikep natu Hil

(Matthew 23:1-36; Luke 20:45-47)

Mihon khat in Jesus ii thuson lungdam takin ngai uh hi. 38Amate a hil kawmin hi bangin ci hi, “Puantual silhin sumzuakna munah, ngual in zatak vawtin a biak tu thangai in, a vak thanuam Thukham hil syate kung panin kikeam vun, 39synagogue sungah a kikoituam tokhumte le poai sungah a nuambel na munah to thanuam uh hi, 40Amate in meingongte zothaw in, a inn uh suttol in, a sau pupui a thungetna taw amate ngamtatna phualseal uh hi. Tua hu in amate daan thuak tu nasia seseam tu hi!” ci hi.

Meingongnu ii Sumkhiak

(Luke 21:1-4)

41Biakinn sum kholna hui ah Jesus a to laitak, ama in mihingte sumkhiak zia en hi. Sumhau tam mama in sum tam ma khia uh hi; 42tuaciangin a zawng meingongnu khat hong pai a, pya khat tang taw a kikim dangkasan pheak nii khia hi. 43Ama in nungzuite sam in, “A tatakin ka ci ciang midangte sangin, hi meingongnu in tam khia zaw hi. 44Banghang ziam cile a dangte in a nei vaal a lamh vaal uh teng khia uh hi, ahihang hi meingongnu in a zawn kawm pan, a nei theampo khia siat hi — a nuntak a kivaak natu a nei sun teng pia siat hi,” ci hi.

Currently Selected:

Mark 12: SCB2

Highlight

Copy