Matthew 15

Taanghpupite ii Hilna

(Mark 7:1-13)

1Tua zawkciang Jerusalem panin, Thukham hil syate pawlkhat Jesus kungah pai in, 2“Banghangin na nungzuite in ih taanghpupite hilnate ni ngawl ziam? A anneak ma in a ngeina bangin a khut sil ngawl hi!” ci in dongh hi.

3Jesus in, “Tua ahile Pathian thupiakte banghang ni ngawlin, noma phuatawm kihilnate zui nu ziam? 4Banghang ziam cile Pathian in, ‘Na pa le na nu zakta vun’. Tuaciang ‘A pa ahibuale a nu a haamsiat pawpo sia thalupna thuak tahen,’ kici hi.#Pu 20:12; Thkna 5:16; Pu 21:17; Thiam 20:9 5Mihing khat in a pa ahibuale a nu a hu natu a, a kizangh thei na khat pawpo sia, ‘Hi sia Pathian atu a kipiasa hi’ ci pole, 6a pa zatak vawt kul nawn ngawl hi, ci in thuhil nu hi. Hi bangin noma le noma na kihilna te na zui uh ciangin, Pathian thupiaknate paltan na hi uh hi. 7No a kihitheamsakte awng! no huvau Isaiah ii sonkholnate bangza in maan ziam!

8‘Hi mite in a kammal uh taw

kei zatakna hong pia hi;

ahihang a thinsung sia

kei taw kikhuala hi,’

Pathian in ci hi.#Is 29:13

9Kei hong biakna sia amate atu in

kimanna om ngawl hi.

Banghang ziam cile

amate in mihingte ii vawttawm ngeina sia,

kei ii thukham bangin kihil uh hi!”

Mihing khat A Ninsak thei Nate

(Mark 7:14-23)

10Tuaciang Jesus in mihonpite samin hi bangin ci hi, “Ngai vun a, tel tavun! 11Mihing khat a kam sungah a tum suk sia in ama zeksa ngeina bangin ninsak ngawl hi, a kam sung pan hong pusuak sia in ama ninsak hi,” ci hi.

12Tua zawkciangin a nungzuite, ama kungah pai in, “Tu a na pau teng a zaak ciangin, Pharisee te ii maktak hunlam na he ziam?” ci in dongh uh hi.

13“Vantung a ka Pa ii suan ngawl peuma a kung simin kibotkeak tu hi,” ci in Jesus in zo hi. 14“Amate tungtaang ah thinngim heak vun! Amate sia mittawte lampui mittawte ma ahi uh hi; mittaw khat in a dang mittaw khat lam a lak le, a nii in dum sungah taak suk tu hi,” ci hi.#Lk 6:39

15Peter in, “Hi thu sonteena sia hong sonthiang ta'n,” ci hi.

16Jesus in, “No sia ngualdangte sangin ciimzaw tuan ngawl nu ziam? 17Tel ngawl nu ziam? Mihing khat a kam sung a tumsuk peuma sia a ngilpi uum sung thengsuk a, tuasung panin a pumpi puasia ah pusuak hi. 18Ahihang kam sung pan a pusuakte sia thinsung pan hong pai hi a, hite in mihing khat sia zeksa taw kisai in ninsak hi.#Mt 12:34 19Banghang ziam cile a thinsung panin, ngitlo ngaisutnate hong pai a, ama sia mihing thalup natu, palngul natu, numei le pa khial natu; sutol natu, leilot natu le ngual min siatsak natu, in lamlak ahi hi. 20Hite in mihing khat sia ninsak hi. Ahihang amate ci bangin, khut sil ngawlin anneakna in, mihing khat sia ninsak ngawl hi.”

Numei khat ii Upna

(Mark 7:24-30)

21Jesus in tua mun pan dingin, Tyre le Sidon khuapi taw a kinai ngam ah pai hi. 22Tua ngam ah a teang Canaan numei khat ama kungah hong pai hi. “David Tapa awng!” ci in au a, “Topa hong hesuak ta'n! Ka tanu doai vei in ngim mama hi,” ci hi.

23Ahihang Jesus in ama kam khat zongh a paupui bua hi. A nungzuite hong pai a, “Ama ciasak in! Ama in ei hong zui a, au tawntung hi!” ci uh hi.

24Tuaciang Jesus in, “Kei sia tuu mangthang Israel mite mun bek ah hong kipaisak hi,” ci hi.

25Ahihang numeinu in a peang kungah bok a, “Topa awng hong hu ta'n!” ci hi.

26Jesus in, “Tate ii anneak tu laaksak in uite ih piaksak tu sia kilawm ngawl hi,” ci hi.

27Tua ahikom tua nu in, “Tua thu in thumaan hi. Topa awng, ahihang uite ngawngawn zongh, a tote sabuai tung pan a taak annengte ne kana ngawl ziam?,” ci in zo hi.

28Tua hi a Jesus in, “Nang sia upna lian a nei numei khat na hi hi! Na deina bang nang tungah hong tung tu hi,” ci hi. Tua hun lian laitakin a tanu dam thiang hi.

Jesus in Mihing Tam mama Damsak

29Jesus in tua mun nusia in Galilee tuili hui ah pai hi. Mualtung khat ah kaato in to hi. 30Ama kungah mihon hong paite in peangbai, mittaw, a koncip, a pau thei ngawl le ciina dang tam mama te, Jesus kungah paipui uh a; Jesus in amate damsak hi. 31A pau thei ngawlte pau thei a, a koncipte dam in, peangbaite lampai thei a, mittawte in khua a mu thei uh ciang, tua munah mihingte in, lamdang sa in Israel te ii Pathian minthang pok uh hi.

Jesus in Mihing Tulli Vaak

(Mark 8:1-10)

32Jesus in a nungzuite samin “Hi mihingte hu in ka thinnuam ngawl hi, banghang ziam cile, tu in ni thum pha zo a, bangma neak tu nei ngawl hi. Anvaak phot ngawlin cia thongsak nuam ngawl khi hi, banghang ziam cile, a inn uh a zot ciang lampi ah ngilkial in pukhong siat tu hi,” ci hi.

33Nungzuite in, “Hi sennealngam sungah mihing hiza neakkhom tu an, koisung pan nga thong tu khu ziam?” ci uh hi.

34“Anluum bangza nei nu ziam?” ci in Jesus in dongh hi.

“Anluum sali le ngasa no tawm nei ung,” ci in zo uh hi.

35Tua ahikom Jesus in mipite lei ah tosak hi. 36Tuasia ciang Jesus in anluum sali le ngasate la in, Pathian tungah lungdam a ko zawkciang, balneen in a nungzuite pia hi; tuaciang in nungzuite in mipite pia sawn uh hi. 37Amate theampo in ne uh a, kham tek uh hi. Nungzuite in a kham vaal uh khum sali dimin seng lai uh hi. 38Numei patang sim ngawlin pasal an ne peuma mihing tulli pha uh hi.

39Tua zawkciang mipite sia Jesus in ciasak a, ama zongh ngunkuang tungah to in Magadan ngam ah pai hi.

Currently Selected:

Matthew 15: SCB2

Highlight

Copy