Luke 21
21
Meingongnu ii Sumpi
(Matthew 12:41-44)
1Jesus in a kiim a et ciangin Biakinn sum kholna sungah sumhaute ii sumpi khiak a mu hi, 2tuaciang a zawng mama meingongnu khat ii dangkasan pheak nii a khiak zongh mu hi. 3Ama in, “A tatak kong ci ciang, hi a zawng meingongnu in ngual dang theampo sangin tamzaw khia hi. 4Banghang ziam cile a dangte in a nei vaal uh khia a, ahihang nupinu in zawng mama hikale a nuntakna tu teng theampo pia hi,” ci hi.
Jesus in Biakinn Lalthap natu Son
(Matthew 24:1-2; Mark 13:1-2)
5Nungzuite pawlkhat in, “Biakinn sia, a suangmanphate taw ahizong, Pathian tungah biakpiakna vanhte taw ahizong bangzata in etlawm ziam,” ci uh hi. 6“Hite theampo na mu uh hi — suangtum khat zongh ama omna munah a om nawn ngawl hun khat hong theng tu hi; suangtum khat sim kilawn suk tu hi,” ci hi.
Ngimna le Vawtsiatna
(Matthew 24:3-14; Mark 13:3-13)
7Amate in, “Syapa awng, hi thu bang hun ciang hong piang tu ziam? Hi thu hong pian ciangin bang lim teng taw hong kilak tu ziam?” ci in dongh uh hi.
8Jesus in, “Kinging ta khol vun, ngual in theamsak heak vun. Mihing tam mamate in kei min taw hong pai tu a, ‘Kei in ama ka hi hi! A hun hong theng zo hi!’ hong ci tu hi. Ahihang amate ii nung na zui heak vun. 9Ngal thu le tualngal thu na zaak uh hangin lau heak vun. Tuabangte hong piang phot tu hi. Ahizong hun bo natu hong nai zo cina hi ngawl lai hi,” ci hi.
10A thuson zomto a, “Ngam khat le ngam khat kido tu a, kumpi khat le khat kisim tu hi. 11A lauhuai zinliinna, kialpi tunna, pulpi tunna sia mun theampo ah om tu a, a lamdang a lauhuai nate van panin piang tu hi. 12Ahizong, hi thute theampo a pian ma in, note hong kiman tu a, hong kivawtsia tu hi; synagogue te ah thu kisit tu in, hong ki aap tu a, tuaciang thong sungah hong kikhum tu hi; keima hu in no sia kumpite le ngamukte mai ah hong kithen tu hi. 13Hi hun sia no atu in Lungdamna Thupha na son thei natu hunpha hong hi tu hi. 14No le no na kidal natu, na thinngim ngawl natu in a hun hong tun ma in, na thin uh khensat khol tavun;#Lk 12:11-12 15banghang ziam cile na ngalte ii hong nial thei ngawl natu le hong nalh thei ngawl natu in, kammalte le ciimnate kong pia tu hi. 16No sia na nu na pate, na suapui pate, na mealheakte le na ngualtamhte in hong aap tu a, note pawlkhat thina na thuak tu uh hi. 17Kei hu in no sia mihing theampo in hong ensan tu hi. 18Ahihang na lu tung pan samzam khat zong a sumsi buatu hi. 19Kip takin ding vun, tuasia ciang noma le noma na kingum tu uh hi.
Jerusalem Lalthap natu Jesus in Son
(Matthew 24:15-21; Mark 13:14-19)
20“Jerusalem sia ngalkaphonpite in hong kim uum na mu uh ciang, tua khuapi lalthap natu nai hi, ci in na he tu uh hi. 21Tua hun ciangin Judea ngam a omte in, mualtung tu in tai tahen; khuapi sung a omte in khua a nusiat uh kul tu a, ngamsung a omte in khuapi sung zuan heak hen. 22Banghang ziam cile tua hun “Daan piak hun” a kici Laithiangtho ii son sia a tun natu ahi hi.#Hos 9:7 23Tua hun laitakin, naungaite le nau noailuai neite atu in bangza in haksa tu ziam! Hi ngam ah a kiitakhuai mama ngimna tung tu a, hi mihingte tungah Pathian daan tung tu hi. 24Pawlkhat namsau taw kithat tu a, a dangte ngam theampo ah thongtaak tu in kipaipui tu hi; tuaciangin amate ii hun a cin mateng in Gentile te in Jerusalem sia a peang taw tuanhcil tu hi.
Mihing Tapa hong Pai natu
(Matthew 24:29-31; Mark 13:24-27)
25“Ni le tha le aksite tungah nalamdangte piang tu hi. Leitung ngam bupte sungah thin lalna om tu a, tuipi tuihawkte le tui kihualte kiita tu uh hi.#Is 13:10; Eze 32:7; Jol 2:31; Tpl 6:12-13 26Leitung ah bang teng tak hong piang ziam ci in a ngak mihingte in launa taw butthi tu hi, banghang ziam cile vantung a om nate sia amate ii zin tek panin pial mang siat tu uh hi. 27Tuaciang Mihing Tapa hong kilangh tu a, vaangletna le minthanna taw meeikaai sungah hong pai tu hi.#Dan 7:13; Tpl 1:7 28Hi thute piang tu in hong kipat ciangin, dingto vun a, vandak vun, banghang ziam cile hong kingup tu hun hong nai zo hi,” ci hi.
Theikung Pianzia taw Thuheak theina
(Mt 24:32-35; Mk 13:28-31)
29Tua zawkciang Jesus in hi thusonteena, amate tungah son hi. “Theikung le thingkung dangte ngaisun vun. 30Tuate ii teenote hong suak na mu uh ciang, khuakhaal hun hong nai zo hi, ci in na he uh hi. 31Tuasia bangma in hi nalamdangte na mu uh ciang, Pathian Ngam hong theng dektak hi, ci in na he tu uh hi.
32Tu laitak a nungta teng ii thi siat ma in, hi thute hong piang tu hi, ci in ciamtee tavun. 33Van le lei zongh hong bo tu hi, ahizong ka kammalte bo thong ngeingawl tu hi.
Kingingta sa in Om natu
34Na kidawm tavun, no sia a vaalkaai neakna dawnnate le leitung nuntak natu thinngimnate taw na hun uh na bosak heak vun, ahibuale tua Ni sia in nang sia thakhat thu in thaang sungah mat bangin na awk tu hi. 35Banghang ziam cile, leitung mun theampo ah mihingte tungah tua thusia hong tung tu hi. 36Hong piang tu hi thute pan suatakna taw na kaantan zawk natu uh le, Mihing Tapa mai ah na din natu in, thahatna na nei natu kinging kholsa in, om in thungen tawntung tavun,” ci hi.
37Tua hunsung Jesus in ni simin Biakinn sungah thuhilna hun zangh a, zan hun ahile Olive Mual tungah zangh hi.#Lk 19:47 38Zing tuungin mihing theampo in ama ii hilna ngai tu in Biakinn ah pai uh hi.
Currently Selected:
Luke 21: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016