Luke 15

A Kibosua Tuu

(Matthew 18:12-14)

1Ni khat shiadongte le ngual ii puavawk mihing pawlkhatte in, thu ngai tu in Jesus kungah pai a, #Lk 5:29-30 2tuasia ciangin Phariseete le Thukham hil syate phun lialua uh hi, “Hisia pa in ngual ii puavawkte taw in an ngawngawn zongh nekhawm hi!” ci uh hi. 3Tua ahikom Jesus in amate tungah hi thusonteena son hi.

4“No sungah khat in tuu zakhat nei hen a, tuu khat bosua le bang law tu ziam? Ama in tuu sawmkua le kua teng ngantatna ah nusia in a kibosua sia a mu dawdong zong tu hi. 5A mu ciangin lungdam mama in a liangko mualsuan in, 6inn ah ciapui tu hi. Tua zawkciang a lawmte le a innpaamte sam in, ‘Ka lungdam mama hi, ka bosua tuu sia ka mu zo hi. Lungdam poai vawt tawng,’ ci tu hi. 7Tuasia bangma in kei kong ci ciang, a kisiik kik ngawl mihing zatak huai sawmkua le kua te sangin a kisiik kik mawnei khat hu in vantung ah lungdamna lian zaw tu hi.

A Kibosua Sumtang

8“Tua ahibuale numei khat in dangkatang sawm a nei sung pan, khat bosua le — bang law tu ziam? Ama in mei de tu a, a inn sung phiat in, a mu mateng mun theampo ah pha takin zong tu hi. 9A mu ciang a lawmte le a innpaamte kaikhawm in, ‘Ka lungdam mama hi, ka bosua dangkatang sia ka mu zo hi. Lungdam poai vawt tawng!’ ci tu hi. 10Kei kong ci ciang, tuasia bangma in, mihing mawnei khat a kisiik kik hu in, Pathian vantunglalangte lungdam hi.”

Tapa Taimang Thu

11Jesus in a son lai na pan, “Khatvei lai in pasal khat in tapa nii nei hi. 12A nauzaw sia in a pa tungah, ‘Pa awng, kei ii ka lua tu neisate tu in hong khen ta'n,’ ci hi. Tua ahikom a pa in a neisate a tapate nii khensak hi. 13Ni tawmvei zawkciangin, a tapa nozaw sia in, ama ii neisa teng zuak siat a, inn nusia in a sum teng taw pusuak hi. Ngam khualana khat ah pai a, tua munah a sum teng zangh maai siat hi. 14A nei theampo zangh khawng hi. Tuaciangin tua ngam ah kialpi lian khat tung a, ama bangma nei nawn ngawlin om hi. 15Tuabang ahiciangin, tua ngammite khat ii kungah naseam tu in pai a, tua pa in lo sungah vokte cing tu in sawl hi. 16Vokte ii neak bengapte ne nuam liang ahihang kuama in a neak tu bangma a pia bua uh hi. 17A khakbel ciangin khua phawk a, ‘Ka pa inn ah a cial naseamte zongh in, a khawn laak tu dongin an nei a, kei sia hi munah pukthi tu in ka om hi! 18Ding in ka pa kungah zuan tong, Pa awng, Pathian tung le nang tungah kong khial zo hi. 19Na tapa ci tu in ka kilawm nawn bua hi; na naseam khat bangin hong omsak ta'n ci tong,’ ci hi. 20Tua ahikom ama dingto in a pa kung zuan kik tu in kipan hi.

“A inn a thet natu khuala ma samh lai kasap, a pa in mu hi; khuangai huai sa in del a, ngawngkoai in namh hi. 21‘Pa awng, Pathian tung le nangma tungah hong khial zo khi hi. Na tapa ci tu in ka kilawm nawn bua hi,’ ci hi. 22Ahihang a pa in naseamte sam a, ‘Hong manlang tavun! Puantual phabel sia la tavun a, silhsak vun. A khutme ah khutzungbu bulsak vun a, peangdap thuasak vun. 23Tua zawkciang khuino thau sia hong kai tavun a, ngoin anneakpoai vawt tawng! 24Banghang ziam cile hi ka tapa sia thi zo a, ahizong tu in hong nungta kik hi; ama bo a, tu in kimu zo hi.’ Tua hu in, poai vawt tu in kipan hi.

25“Tua laitakin tapa lianzaw sia lokuan hi. Hong cia lam inn hong thet dektak ciang, lapna le lasakna awte za hi. 26Tua ahikom naseamte khat sam a, ‘Bang thu bang la ziam?’ ci in dongh hi. 27‘Na naupa hong cia kik a, khui thau sia na pa in ngo hi, banghang ziam cile ciidam ludam a, a tapa a nga kik hang ahi hi.’ 28A tapa lianzaw sia thin uuk mama a, inn sung zongh ah a tum nuam bua hi; tua ahikom a pa pusuak a, a tapa ii hong sungtan natu kun hi. 29Ahihang a pa ii kam zo a, ‘En in kum hi tanvei sal bangin na na hong sepsak a, na thu piakte hong nial ngeingawl khi hi. Kei bang nong pia ngei ziam? Keal khat beak zongh ka ngualtamhte taw ka neak tu nong pia ngei bua hi! 30Ahihang hi na tapa in pumpi zuak numeite tungah a sum teng zangh tum siat a, tuaciang inn hong thet ciangin khuino thau sia ngaw ni hi!’ ci hi. 31A pa in, ‘Ka tapa awng, nang sia a tawntungin keima taw hi sungah a om ni hi. Ka neisa theampo nangma aa, ahi hi. 32Ahihang na naupa sia thi zo a, tu in hong nungta kik hi; ama bo a, tu in kimu zo hi. Tua ahikom lungdam in poai ih vawt kul hi,’ ” ci hi.

Currently Selected:

Luke 15: SCB2

Highlight

Copy