Joshua 22
22
Joshua in Nisuana sang Minamte Ciasak
1Tua zawkciang Joshua in Reuben, Gad, le nisuana Manasseh nam teng pan mipite sam khawm hi. 2Amate tungah, “Topa naseampa Moses thupiak theampo vawt siat zo nu hi, tuaciang keima thupiak theampo hong ni zo nu hi. #Mi 32:20-32; Jos 1:12-15 3Hi hun bup sungah na Israel mipuite khatvei zongh na taisan ngei bua uh hi. Topa na Pathian ii thupiakna pha takin na ni uh hi. 4Tu in ama kamciam bangma in, Topa na Pathian in na Israel mipuite kilemna hong pia zo hi. Tua ahikom Topa naseampa Moses ii hong piak Jordan nisuana sangah noma atu na laak na inn na lo uh ah cia kik tavun. 5Moses ii hong thupiak bangin thukham na zui natu khuangaisun hamtang tavun: Topa na Pathian it vun, ama deina bang ngamta vun, a thupiakte ni vun, ama tungah thumaan vun, tuaciang ama atu na thin theampo le na thaa theampo taw seam vun,” ci hi. 6-8Joshua in thupha pia in hi kammalte taw amate ciasak hi: “No sia a hau mama in nganno, ngunn, khamh, taau, thik, silh le teen tam mama taw cia kik nu hi. Na ngalte tung pan na laak uh vanhte sia na nam pui mite hawm tavun,” ci hi. Tua zawkciang amate inn ah cia uh hi.
Moses in Manasseh nam a khenlang sia Jordan nisuana sangah ngam pia zo hi, ahihang a dang khenlang sia Joshua in nam dangte taw Jordan nitumna sangah ngam pia hi.
9Tua hi a, Reuben, Gad, le Nisuana Manasseh nam teng sia inn ah cia kik uh hi. Amate in Israel mi a taanglai teng sia Canaan ngam Shiloh ah nusia uh hi, tuaciang amate in Topa ii Moses tungah a thupiakna tungtawnin a laak sa Gilead ngam le lei zuan uh hi.
Jordan hui ah Biaknatau
10Reuben, Gad, le Nisuana Manasseh te nitumna sang ma ahi lai Geliloth a thet uh ciang, tuasung ngun hui ah a lian a munophuai biaknatau khat sa uh hi. 11Israel mi a taang lai teng munah, “Ngai vun! Reuben, Gad, le Nisuana Manasseh namte in Geliloth, Jordan ii ei sangah biaknatau sa uh hi!” ci uh hi. 12Israel mite in hi thu a zaak uh ciang, a taangpi bup sia, nisuana sang minamte sim tu in Shiloh ah kikaikhawm uh hi.
13Tua zawkciang Israel mite in thiampi Eleazar ii tapa Phinehas sia Reuben, Gad, le Nisuana Manasseh te kung Gilead ah paisak uh hi. 14Lampui pasal sawm sia Phinehas taw paikhawm uh hi, nitumna sang a minamte khat ciang khat veu le bee le phung sungah a innkuan papi khat tek kihel uh hi. 15Amate in Gilead ngam ah Reuben, Gad, le Nisuana Manasseh namte kungah a pai uh hi, Topa ii huam taangpi bup taangin amate tungah hong pau hi. 16“Banghangin Israel te ii Pathian tungah hi bang ngamtatna siatna vawt nu ziam? Noma atu hi bang biaknatau na sak uh ciang Topa a langpan na hi uh hi. No in ama nung zui nawn ngawl nu hi! #Thkna 12:13-14 17Peor ah ih mawna te phawk kik vun, Topa in ama mite sia tua munah pul natna taw daan hong pia hi kana ngawl ziam? Tua hu in eite in tu dong ma in ih thuak lai hi. Tua mawna sia pha zo sa ngawl lai nu ziam? #Mi 25:1-9 18Tu in ama nung na zui tu uh nial lai nu ziam? Tu ni in Topa na langpan uh le ama in zing ciang Israel mi khat sim tungah hong thin uuk tu hi. 19Tu in, na ngam na lei uh sia biakpiak natu in citaak sa ngawl na hi uh le ama Puanbuk omna Topa ii leitang tungah hong pai tavun. Ko sungah leitang pawlkhat sia ko aa hi hong ci tavun. Ahizong Topa ih Pathian biaknatau sia belapna in biaknatau khat a kisakna taw in Topa langpanin leedo heak vun, ahibuale ko zongh a leedote hong suaksak heak vun. 20Zerah tapa Achan phawk vun, ama in a kiningkhiin nate taw kisai thupiakna sia ni nuam ngawl hi; Israel taangpi bup sia tua huvau in daan hong kipia hi. Achan mawna hu in a thi sia ama bek hi ngawl hi.” #Jos 7:1-26
21Nitumna sang minamte ii innkuan papi te munah Reuben, Gad, le Nisuana Manasseh te in: 22“A Thahatpipa sia Pathian hi! Ama sia Topa hi! A Thahatpipa sia Pathian hi! Ama sia Topa hi! Ama in hisia banghangin vawt khu ziam ci in hong he hi, tuaciang no zongh in he le uhte kong oai hi. Topa ka upna keamcing ngawlin, ka langpan uh le hong nungtasak heak vun! 23Topa thu ni ngawlin koma aituam atu hi biaknatau sia sa in, meihal biakpiakna ahibuale antang biakpiakna, pawlkhop biakpiakna tu in sa ka hi uh le Topa ama mama in daan hong pia tahen. 24Hi ngawl hi! Biaknatau ka sak uh ahang sia mai sangah noma suan le paalte in koma suan le paalte tungah, ‘Israel te ii Pathian Topa taw no bang kisai nu ziam? 25Ama in Jordan ngun sia no Reuben le Gad te taw ih kilaklaw ah ngamngi hong khen sa hi. No le Topa sia na kisaina uh om ngawl hi,’ hong ci thaak tu ka lau uh hang hi. Tuaciang noma suan le paalte in koma suan le paalte sia Topa biak tu hong khaam tu hi. 26Tua ahikom biaknatau khat sa khu hi, meihal biakpiaknate ahibuale piakkhiatnate atu hi ngawl hi, 27tua sangin, koma mite le noma mite atu, tuaciang khangkikte atu in ama ii a thiangtho Puanbuk mai ah koma in Topa sia meihal biakpiaknate, sangaw biakpiaknate le pawlkhop biakpiakna te taw bia tatak khu hi ci heaksakna lim khat hi tu hi. Hi sia in noma suan le paalte in koma suan le paalte tungah Topa sia no taw bang kisai ziam hong ci ngawl natu ahi hi. 28Ko ngaisutna pan hi bang thu hong piang zezen le, koma suan le paalte in, ‘En vun! ka taanghpupite in Topa biaknatau taw a kibang biaknatau khat vawt hi. Tua biaknatau sia meihal biakpiakna ahibuale sangaw biakpiakna vawt natu kici ngawl hi, koma mite le noma mite kilaklaw ah lim khat in kivawt hi,’ ci thei tu hi. 29Kote in Topa langpan ngawl het tu khu hi, tua ahibuale meihal biakpiaknate, antang biakpiaknate ahibuale sangaw biakpiaknate vawt natu in biaknatau khat a kisakna taw tu in ama nungzui tu a tawp hi ngawl khu hi. Ama hong ompuina Puanbuk mai ah Topa ih Pathian biaknatau sia ngawl a dang biaknatau khat pawpo vawt ngawl tu khu hi,” ci uh hi.
30Reuben, Gad, le Nisuana Manasseh nam pan mite ii pauna teng sia thiampi Phinehas le ama taw a paikhawm taangpi lampuite sawm le nitumna sang a teang namte ii innkuan papite in za a, a lung uh kim hi. 31Eleazar thiampipa ii tapa Phinehas in amate tungah, “Tu in ka heak uh thu pan Topa sia ei taw hong omkhawm hi, tua ahikom noma in Topa ii daan hong piak natu panin Israel mite hong suatak nu hi,” ci hi.
32Tua zawkciang Phinehas le lampuite in Reuben, le Gad mite Gilead ngam ah nusia uh a, Canaan ngam ah cia kikin Israel mipuite tungah thu a puak uh hi. 33Israel te lungkim in, Pathian pok uh hi. Reuben, le Gad mite teenna ngamte lalcipsak tu in ngalsim tu thu, a son nawn bua uh hi.
34Reuben le Gad mite in, “Topa sia Pathian hi ci in hi biaknatau in eite theampo atu tetti hi ci uh hi. Tua ahikom amate in a min sia “Tetti” a phuak uh hi.
Currently Selected:
Joshua 22: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
