Joshua 20
20
Bukna Khuapite
1Tua zawkciang Topa in Joshua munah, 2Israel mite a son tu in, “Moses ii hong sonsawn tu ka sawl bukna khuapite teal vun. 3Mihing khat in ngual dang khat a thalup thaak ciang, a phulam tu in a zong pa khut pan a suatak natu in tua munah pai thei hi. 4Ama in hi khuapi te khat pawpo ah tai thei a, hi khuapi tumna kongbiang thukhenna munah a om lampuite tungah thupiang babang son thei tu hi. Amate in khuapi sungah a om thei natu in ama tumsak a, a teen natu mun khat pia tu hi. 5A phulam nuam pa in tua mun dongah a zuizen le khuapi mipite in ama ii khut sungah a tai pa sia aap ngawl het tu hi. Amate in ama hung nanak tu hi, banghang ziam cile ama thin uukna hang hi ngawlin a thalup thaak ahi man hi. 6Taangpi mai ah thu a kikhen dong le tua laitak Thiampi Lianbel a seam sia ii thi dong ama sia tua munah om thei tu hi. Tua zawkciangin tua pa hong taina a khua a inn ah cia kik thei tu hi,” ci hi.
7Tua ahikom amate in Jordan nitumna sang Naphtali mualtung ngamsung Galilee ngam ah Kedesh; Ephraim mualtung ngam ah Shechem; Judah mualtung ngam ah Hebron tuamkoi hi; 8Jordan nisuana, Jericho nisuana sang sennealngam mualtung, Reuben ngam sungah Bezer; Gad ngamsung Gilead ah Ramoth; Manasseh ngamsung Bashan ah Golan teal uh hi. 9Hi teng sia bukna khuapi tu in Israel te theampo le ngamdangmi amate sungah a teangte atu a kiteal teng ahi hi. Khat po in midang khat a thatlum tha le phulam tu in ama a zong sia ii khut pan dalna nga thei tu hi; taangpi mai ah thukhenna a thuak phot buale ama kithatlum thei ngawl hi. #Mi 35:9-34; Thkna 4:41-43; 19:1-13
Currently Selected:
Joshua 20: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
