Joshua 17
17
Nitumna sang Manasseh
1Jordan ii nitumna sang leitang khen khat sia Joseph ii tapa lianzaw Manasseh suan innkuan pawlkhat tan tu in kipia hi. Gilead ii pa Machir sia Manasseh tapa lianbel hi a, ngalhang khat ahi hi, tua ahikom Jordan nisuana sang Gilead le Bashan sia ama kipia hi. 2Jordan nitumna sang leitang sia Manasseh innkuan dang teng: Abiezer, Helek, Asriel, Shechem, Hepher le Shemida te kipia hi. Hite sia Joseph tapa Manasseh suan pasalte hi a, a innkuan tek ii pabel veu ahi hi. 3Zelophehad sia Hepher tapa hi a, a pu Gilead, Machir, Manasseh te ii suan hi, ahizong ama in tapa nei ngawlin tanu bebek nei hi. Amate min sia Mahlah, Noah, Hoglah, Milcah, le Tirzah ahi hi. 4Amate sia thiampi Eleazar le Nun ii tapa Joshua le lampuite kungah pai in, “Topa in Moses tungah, koma le ka mealheak pate zongh ii ka tan tu uh leitang khen khat hong kipiak natu thupia hi,” ci hi. Tua ahikom, Topa sawl bangma in, amate sia a mealheakte taw leitang kipia khawm hi. #Mi 27:1-7 5Tua hu in Manasseh in Jordan Ngun ii nisuana sangah Gilead le Bashan belapna in leitang tel sawm nga hi, 6ama suan le paal numeite le pate tel a kipiak khop hang ahi hi. Gilead ngam le lei sia Manasseh suan a taang laite kipia hi.
7Manasseh ngam sia Shechem nisuana sang Asher pan Michmethath dong ban hi. Tua zawkciang ngamngi sia Entappuah mite sungsuam tu in thangsang ah pai hi. 8Tappuah ii kiim a leitangte sia Manasseh neisa hi, ahizong Tappuah khua, ngamngi tung a om sia Ephraim suante neisa ahi hi. 9Ngamngi sia tua mun pan Kanah lui dong paisuk hi. A ngam sia Manasseh ngamsung ahisaap hang lui ii thangsang a om khuapite sia Ephraim te neisa ahi hi. Manasseh ngamngi sia lui ii saksang ah paitan a, Mediterranean Tuipi ah tawp hi. 10Ephraim sia thang sangah, Manasseh sia saksang ah om a, Mediterranean Tuipi sia amate ii nitumna sang ngamngi hi. 11Issachar le Asher ngamte ii sungsang ah Manasseh in Beth Shan le Ibleam, a kiim a om khuate taw, tuaciang Dor (tuipi hui a om sia), Endor, Taanach, Megiddo le a kiim a khuate taw zongh nei hi. 12Manasseh mite in tua khuapite ah a teang mite not zo ngawl ahikom Canaan mite sia tuasung ah teang suak uh hi. #Thkte 1:27-28 13Israel te a hat zawk hun ciang ngawngawn in Canaan mi theampo notkeak ngawl uh hi, ahizong amate atu in zawthawk thu taw naseamsak uh hi.
Ephraim le Nitumna sang Manasseh te in Ngam Ngen thua
14Joseph suan le paalte in Joshua munah, “Banghangin ko neisa tu leitang khen khat bek hong pia ni ziam? Topa in thupha hong pia a, ko mihing tam mama pha khu hi,” ci uh hi.
15Joshua in, “No mihing tam mama a Ephraim mualtung ngam sia no atu no leih ahile Periz te le Rephaim te ngam a thingtang sungah pai in noma atu in vaat tavun,” ci in zo hi.
16Amate in, “Mualtung ngam sia ko atu lian ngawlin kicing zo ngawl hi, ahihang zaanglei a teang Beth Shan le a kiim khuate le, Jazreel Kuam sungah teangte Canaan te in thik siphu ngalleang nei tek uh hi,” ci in zo kik hi.
17Joshua in Ephraim nam le nitumna Manasseh nam tungah, “No sia tam mama takpi a, hat zongh hat mama nu hi. Tel khat sangin a tamzaw nga tu nu hi. 18Mualtung ngam sia no neisa hi tu hi. Duithuk hikale na vaat tham tu uh a mong khat pan mong langkhat dong la in tang tu nu hi. Canaan mite ahile thik siphu ngalleang te nei in a hat mite ahitazong hawlkhia tu nu hi,” ci hi.
Currently Selected:
Joshua 17: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
