Pianciilna 48

Jacob in Ephraim le Manasseh Thupha Pia

1Hun khat zawkciang a pa dam ngawlna thu Joseph tungah kison hi. Tua ahiciang a tapate nii, Manasseh le Ephraim taw a pa ve tu in pai uh hi. 2Jacob tungah na tapa Joseph in hong ve tu in hong pai hi, ci in a kison ciang, ama in a tha saanin lupna tungah toto hi. 3Jacob in Joseph tungah, “Canaan ngam Luz khua ah Vaanglianbelpa Pathian in kei tungah hong kilangh a, thupha hong pia hi. #Pian 28:13-14 4Pathian in kei tungah, ‘Ta tam mama kong pia tu hi, tuabangin na suan na paalte sia minam tam mama te suak tu uh hi; keima in na suan na paalte tungah a tawntung a nei tu in hi leitang ka pia tu hi,’ hong ci hi,” a ci hi.

5Jacob in a pau zomin, “Joseph awng, hi lai ah kong pai ma in Egypt ah na nei na tapa niite keima aa hi; Reuben le Simeon bangma in Ephraim le Manasseh te sia keima tapate ma ahi hi. 6Tapa a tamzaw na nei lai le amate sia kei aa ci in kingaisun ngawl tu a; a nga uh ngamhluana sia Ephraim le Manasseh tungtawnin hong pai tu hi. 7Na nu Rachel hangin hi bangin ka vawt ahi hi. Mesopotamia pan ka heakkik lai in, Canaan ngamsung Ephrath khua taw kikhuala ngawlna ah ka khuangaibel natu in na nu hong thi hi. Ephrath paina lamhui ah ama ka phum hi,” ci hi. (Ephrath sia tu in Bethlehem kici hi.) #Pian 35:16-19

8Jacob in Joseph tapate a mu ciang, “Hi panote akua te ziam?” ci in dongh hi.

9Joseph in, “Ka tapate hi, hi lai Egypt pan Pathian hong piak hi,” ci in zo hi.

Jacob in, “Thupha ka piak thei natu in ka kungah hong paipui ta'n,” ci hi. 10A kum tam zo ahikom Jacob ii mitte mang zo a, pha takin khuamu thei nawn ngawl hi. Joseph in a tapano te a kungah paipui a, a pa in amate koai in namh hi. 11Jacob in Joseph tungah, “Nang hong mu kik tu in ka kimuangmaw ngei bua a, tu in Pathian in na tate ngawngawn hong musak hi,” ci hi. 12Tua zawkciang Joseph in Jacob kaang pan a amate la in, a pa mai lei ah kun hi.

13Joseph in Jacob veisang ah Ephraim, a ziatsang ah Manasseh koi hi. 14Ahizong Jacob in a khutte kithatheaksak in, a nau zaw hi napi Ephraim lu tungah a khut ziatsang nga in, a uzaw Manasseh tungah a khut veisang nga hi. 15Tua zawkciang ama in Joseph thupha pia hi;

“Ka pate ahi Abraham le

Isaac te ii a na a sepsak

Pathian in hi panote

thupha pia tahen!

Tuni dongin keima lam hong pui

Pathian in amate

thupha pia tahen!

16Natna satna theampo panin

keima hong suatak

vantunglalang in amate

thupha pia tahen!

Hi panote tungtawnin

keima min le ka pate ahi

Abraham le Isaac min

nungta top tahen!

Amate in ta tam mama nei in

suan le paal tam mama

nei tahen!”

17A pa in a khut ziatsang Ephraim lu tungah a koi, a mu ciang Joseph a thinnuam ngawl hi; tua ahikom Joseph in a pa khut, Ephraim lu tung pan Manasseh lu tungah khiin tu in la hi. 18Ama in a pa tungah, “Pa awng, tuabang hi ngawl hi. Hi sia ta uzaw hi a, na khut ziatsang a lu tungah koi in,” ci hi.

19A pa in nial a, “He khi hi, ka tapa awng, he khi hi. Manasseh ii suan le paalte zongh minam lian khat suak veve tu hi. Ahizong a naupa in ama sang in lian zaw tu a, ama suan le paalte minam liante suak tu hi,” ci hi.

20Tuabangin Jacob in tua ni in amate thupha pia a, “Israel mite in thupha a piak uh ciang na minte zangh tu hi. Amate in, ‘Ephraim le Manasseh taw kibangin Pathian in note hong siam tahen,’ ci tu uh hi,” ci hi. Hi bangin Jacob in Manasseh mai ah Ephraim koi hi. #Heb 11:21

21Tua zawkciang Jacob in Joseph tungah, “Nong mu bangin kei thi nai tu khi hi, ahizong Pathian in nang hong panpui tu a, na taanghpupite ii ngam le lei ah hong ciapui kik tu hi. 22Amor mite tung pan ka namsau le ka thal taw ka laak, leipha ngam Shechem sia na suapuipate atu hi ngawlin nangma atu kong piak ahi hi.

Currently Selected:

Pianciilna 48: SCB2

Highlight

Copy