Pianciilna 45
45
A Suapuite tungah Joseph Kison
1Joseph in a naseamte mai ah a nenona khaam zo ngawl ahikom a inndoi sung pan a naseam theampo a pusua natu in thupia hi. Joseph in a suapuite tungah ama akua ci in a kison laitak kuama dang om ngawl hi. #Sawl 7:13 2Joseph nasia tak kap ahikom Egypt te in za a, tua thu kumpi inn sungah thang hi. 3Joseph in a suapuite tungah, “Keima Joseph khi hi. Ka pa nungta lai ziam?” ci hi. Ahizong hi thu a suapuite in a zaak ciang amate lau mama ahikom zo thei ngawl uh hi. 4Tua zawkciang Joseph in amate tungah, “Hesuakna taw hong neak tavun,” ci hi. Amate in neak a, ama in, “Egypt te tungah na zuak uh na suapuipa Joseph khi hi. 5Hi lai ah nong zuak uh manin nuammaw sa in kimawsiat heak vun. Mihingte nuntakna ngum tu in note mai ah Pathian in kei hong paisak khol hi. 6Tu kum sia ngam sungah kialpi tun kum niina hi pheang a, lotho ngawl, anlaak ngawl tu hun kum nga sung om lai hi. 7Note le na suan na paalte nuntak thei natu le hi bang a lamdangin note kong suatak thei natu in note mai ah Pathian in kei hong paisak khol hi. 8Tua hi a, hi munah kei hong then sia no hi ngawl het a Pathian ahi hi. Pathian in kumpipa ii ulianbel in hong koi hi. Ama ngam bup thuzeakpa ka hi a; Egypt ngam theampo a ukpa ka hi hi.
9“Tu in, ka pa kungah manlang in cia tavun a, na tapa Joseph in hi bang hong ci hi ci in son tavun: ‘Pathian in Egypt ngam theampo a ukpa in hong koi zo hi; kei kungah hai ngawlin hong pai ta'n. #Sawl 7:14 10Kei taw nong kinai thei natu in Goshen ngam ah — nangma, na tate, na tute, na tuute, na kealte, na khuite le na neisa theampo taw na teang thei tu uh hi. 11Goshen ah nong om le kong khoi thei tu hi. Kialpi hun kum nga bang om lai hi; nangma, na innkuanpuite le na ngannote na pukthi tu uh ka dei bua hi” ci hi.
12Joseph in a thuson zom a, “Tu in note theampo le Benjamin awng, nang zongh in Joseph tatak ka hi sia nong mu thei hi. 13Hi lai Egypt ngam sungah ka vaang neizia le na mu theampo ka pa tungah son tavun. Tua zawkciang manlang in ama hi munah hong paipui tavun,” ci hi.
14Joseph in a suapuipa Benjamin koai in kap a; Benjamin zongh in koai in kap hi. 15Tuaciang Joseph in a suapui teng khat zawkciang khat kap kawmin ngawngkoai in namh hi. Tua zawkciang a suapuite ama taw thuson tu kipan hi.
16Joseph suapuite hong paina thu kumpi inn sung dongah theng a, kumpipa le a uliante lungdam hi. 17Kumpipa in Joseph tungah, “A ngante vanh suanhin, Canaan ngam ah a heak kik natu in na suapuite sawl in. 18A pa le a innkuanpuite puisak in a, hi lai ah pai kiksak in. Egypt ngam sungah leitang phabel sia amate ka pia tu a, amate nuntak khomna za sangin a tamzaw nei tu uh hi. 19A zite, a tanote le a pa to natu in Egypt pan leang a ken natu zongh son in. 20Amate in a neisa te a nusiat tu sia thinbot heak hen; Egypt ngam bup leitang phabel sia amate aa hi tu hi,” ci hi.
21Jacob tapate in a kisawl bangin ngamta hi. Kumpipa thupiak bangin Joseph in leangte le lampi a neak tu nguai an pia hi. 22Joseph in amate puan laih natu zongh puansilh khat tek pia a, ahizong Benjamin sia ngunn dangka 300 le puan laih natu silh nga pia hi. 23Ama in Egypt ngam pan a piang na phabelte laa sawm ii puakkhop le antang, anluum le lampi a neak tu nguai an laa sawm ii puakkhop ma a pa thaak hi. 24Ama in a suapuite tha a, amate tungah, “Lampi ah kihau heak vun,” ci in vaitha hi.
25Amate Egypt ngam pan dingin Canaan ngam a pa Jacob inn ah cia kik uh hi. 26Amate in a pa tungah, “Joseph nungta lai hi! Ama sia Egypt ngam theampo ukpa hi!” ci in son hi. Jacob in lamdangsa mama in um zo ngawl hi.
27Ahizong Joseph ii kam vaithak teng a son ciang le ama Egypt ngam ah a pai natu in a kipuak, leangte a mu ciang, a pa ingh liangin a omna teng veng hi. 28A pa in, “Ka tapa Joseph nungta tatak lai ziam! Ka kat sia tu teng ma hi ei! Ka thi ma in pai in va kimu nanak tong,” ci hi.
Currently Selected:
Pianciilna 45: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
