Pianciilna 29
29
Laban ii Inn ah Jacob Theng
1Jacob sia a pai natu mun nisuana ngam sang manaw in paisuak hi. 2Thakhatin lo sungah a om tuikhuk khat kung theng a, tuikhuk paam ah tuuhon, hon thum lum hi. Ngannote in hi tuikhuk pan tui ne hi, tuikhuk sitna suangtum sia lian mama hi. 3Tualai ah tuuhonte hong thet hon ciang tuucingte in tua suang liikin, tuute tui pia hi. Tua zawkciang amate in a omna ngei ah tua suang koi kik hi.
4Jacob in tuucingte tungah, “Ka lawmte awng, koisung pan nu ziam?” ci in dongh hi.
Amate in, “Haran pan hi ung,” ci in zo hi.
5Ama in, “Nahor ii tapa Laban na he uh ziam?” ci in dongh hi.
Amate in, “He khu hi,” ci in zo hi.
6Ama in, “Ama a ciidam ziam?” ci in dongh hi.
Amate in, “Ama a ciidam hi. En in, a tanu Rachel zongh a tuuhonte taw hi sungah hong pai hi,” ci in zo hi.
7Jacob in, “Ni sang lai a, ngan hawl hun ngawl lai ahikom, tuute tui pia in tha kik ngawl tu nu ziam?” ci hi.
8Amate in, “Tuuhon theampo hi lai ah om siat in, suangtum a kiliik kik mateng ngan ka tha thei buatu uh hi; tua zawkciang tuuhonte tui ka pia tu uh hi,” ci in zo hi.
9Jacob sia amate taw kipaupui in a om laitak, Rachel, tuuhon taw hong theng hi. 10Jacob in a pu Laban tuuhon le Rachel a mu ciang tuikhuk ah pai in, suangtum liik in, tuute tui pia hi. 11Tua zawkciang Jacob in ama namh a, lungdamin kap hi. 12Ama in Rachel tungah, “Keima in Rebecca ii tapa, na pa ii mealheak ka hi hi,” ci hi.
Ama sia a pa tungah thu ko tu in tai hi; 13Laban in a tupa Jacob ii thu a zaak ciang ama muak tu in tai a, koai in namh a, inn ah ciapui hi. Jacob in thupiang theampo Laban tungah a son zawkciang, 14Laban in, “Hi hi, nangma in keima chi le sa na hi tatak hi,” ci hi. Tualai ah Jacob tha khat bup taam hi.
Rachel le Leah atu in Jacob in Laban Na sepsak
15Laban in Jacob tungah, “Nangma sia ka mealheak na hi manpo in, a thongin ka na nong sepsak buatu hi. Thasum bangza dei tu ni ziam?” ci hi. 16Laban in ta numei nii nei a; a unu min Leah hi in, a naunu min Rachel ahi hi. 17Leah sia a mit haa ngaibaang a, Rachel ahile a khan pha in a mealhoi hi.
18Jacob sia Rachel taw ki it ahikom a pu tungah, “Rachel taw nong kiteangsak tu ahile, kum sali sung noma na kong sepsak tu hi,” ci hi.
19Laban in, “Midang khat po ka piak sangin ama nang kong pia nuam zaw hi; hilai kei kungah hong om ta'n,” ci in zo hi. 20Jacob in Rachel a nga thei natu in kum sali sung naseam a, ama a itna hangin tua hunte ni tawmno taw kibang sa hi.
21Tuaciang, Jacob in Laban tungah, “Ih hun cing hi; na tanu taw hong teangsak ta'n,” ci hi. 22Tua ahiciang Laban in mopoai vawtsakin ngual theampo sam hi. 23Ahizong tua zanin a pu in Jacob tungah Rachel taangin Leah pia a, Jacob in Leah luppui hi. (24Laban in ama ii silanu Zilpah, a tanu Leah tungah a naseam tu in pia hi.) 25A zingsang ciang Leah a hina thu Jacob in he pheang hi. Ama in Laban kungah pai in, “Banghangin hi bang hong vawt thong ni ziam? Rachel nga nuam in hong thalaw hi ngawl khi ziam? Banghangin kei hong theam ni ziam?,” ci hi.
26Laban in, “A u kan in a nau pasal a nei tu sia ko ngeina hi ngawl hi. 27Nipi khat sung mopoai vawt hun ngak phot in a, tuaciang a dang kum sali sung ka na nong sepsak lai tu ahile, Rachel kong pia tu hi,” ci in zo hi.
28Jacob lungkim a, nipi khat sung mopoai hun a bo ciang, Laban in a tanu Rachel, Jacob zi tu in pia hi. (29Laban in a sila nu Bilhah sia a tanu Rachel tungah a naseam tu in pia hi.) 30Jacob in Rachel zongh luppui a, ama in Leah sang Rachel it zaw hi. Tuasia ciang ama in a dang kum sali sung Laban atu naseam thua lai hi.
Jacob ii Tate
31Rachel sangin Leah a it ngawl zawkna thu Topa in a heak ciang, Leah sia ta nei thei tu in siam a, ahizong Rachel sia ta neisak ngawl lai hi. 32Leah ngai in tapa khat nei hi. Ama in, “Ka thinngimna Topa in hong mu a, tu in ka pasal in hong it tu hi,” ci a, tua ahiciang a min Reuben phuak hi. 33Ama ngai kik a, tapa dang khat nei hi. Ama in, “Kei hong ki it ngawlna thu Topa in za zo ahikom Topa in hi tapa zongh kei hong pia zo hi,” ci a tua ahiciang a min Simeon phuak hi. 34Khatvei ma ama ngai kik a, tapa dang khat nei hi. Ama in, “Tu in ka pasal in kei hong kholet zaw tu hi, banghang ziam cile tapa thum ka neisak zo hi,” ci a, tua ahiciang a min Levi phuak hi. 35Tuaciang Leah hong ngai kik a, tapa dang khat nei hi. Ama in, “Tu hile Topa ka pok tu hi,” ci a, tua ahiciang a min Judah phuak hi. Tuasia ciang ama ta tawp hi.
Currently Selected:
Pianciilna 29: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
