Pianciilna 13

Abram le Lot Kikhen

1Abram sia a zi, a neisa theampo le Lot taw Egypt panin saksang zuanin Canaan thangsang mun khat ah pai hi. 2Abram sia a hau mama khat hi a, tuute, kealte le khuite bek dom ngawlin khamh le ngunn zongh nei hi. 3Tua zawkciang tua mun nusia in mun khat pan mun khat ah kikhiin in Bethel sang zuan hi. Bethel le ama ii ngiaphual a saat maksakna, biaknatau khat a sak ngeina mun Ai kilaklaw ah ama theng hi. 4Tua munah ama in Topa bia hi.

5Lot zongh in tuute, kealte le khuite a nei bek dom ngawlin innkuanpui le naseamte zongh nei hi. 6Tua hi a, ngan tha natu mun kicing ngawl ahikom mun khat ah a nii in teenkhop tu suak thei ngawl hi, banghang ziam cile amate in nganno hau mama uh hi. 7Tua hikom Abram ii ngancingte le Lot ii ngancingte kilaklaw ah kihauna piang hi. (Tua hunin Canaan te le Periz te tua ngam ah teang lai uh hi.)

8Tuasia ciang Abram in Lot tungah, “Eite sia mealheak khat ih hikom, na mite le ka mite a kihau tute hi ngawl hi. 9Tua ahikom kikhen zaw heu tawng. Na deina ngam pawpo teal in. Nang mun khat sang na zuan le kei mundang khat ka zuan tu hi,” ci hi.

10Tuaciang Lot khuadak a, Topa ii Huan ahibuale Egypt ngam taw a kibang Jordan kuam buppi le Zoar sang theampo, tui tam mama a omna mun teng mu hi. (Tua hun sia Sodom le Gomorrah khuapite Topa ii a lalsak ma ahi hi.) #Pian 2:10 11Lot in Jordan kuam buppi ama atu in teal a, nisuana sangah kikhiin hi. Tuabangin amate nii kikhen hi. 12Abram sia Canaan ngam ah teang a, Lot sia tua ngam kuam sung khuapite sungah teangin, Sodom khua hui ah ngiaphual saat hi, 13Sodom mite sia seksol a, Topa tungah nasia takin a maw a khialte ahi uh hi.

Abram Hebron ah Kikhiin

14Lot ii a nusiat zawkciang Abram tungah Topa in, “Na omna mun panin mun theampo pha tak en in. 15Na muna ngam theampo nang le na suan na paalte tungah kong pia tu a, a tawntungin noma aa hi tu hi. #Sawl 7:5 16Suan le paal tam mama kong pia tu a, kuama in sim siat zo ngawl tu hi; tua sia sim tu sia leitung ah leivui theampo sim siat tu ol zaw tu hi! 17Tu in, pai ta'n a, ngam buppi va en ta'n, banghang ziam cile a vekpi nang tungah kong pia siat tu hi,” ci hi. 18Tua ahikom Abram in a ngiaphual khiinin, Hebron ngamsung Mamre thingkung thiangthote kungah teang a, tua munah Topa atu in biaknatau khat sa hi.

Currently Selected:

Pianciilna 13: SCB2

Highlight

Copy