Pianciilna 11

Babylon Tausaang

1A masa phitin leitung buppi mihingte in kampau khat bek kinei a kammal kibang zangh uh hi. 2Amate nisuana sangah vak kawkoai a, Babylon ngam zaanglei mun khat a thet ciang tua munah khua saat uh hi. 3Amate khat le khat, “Hong pai tavun! uksuang seakin a sahin hal tawng” kici uh hi. Tua hi a, amate inn sak natu in uksuang te a kimat natu in kattaza zangh uh hi. 4Amate in, “Eite ii min nga thei natu le leitung theampo ah ih kithethaang ngawl natu in khuapi khat saatin van a baan tu tausaang khat ciang to tawng,” ci uh hi.

5Tuasia ciang tua mite ii a vawt khuapi le tausaang a en tu in Topa hong paisuk a, 6ama in, “Tu ciangin, hite sia a vekpi in mihing ci khat sa khat hi a, amate kam nam khat pau hi; a nasep tute a kipatna hi pheang hi. Hai ngawlin a nasep nop pawpo hong seam suak thei tu uh hi! 7Eite paisuk in khat le khat a kam kitel ngawl natu in a kampau toknoaisak tawng,” ci hi. 8Tua ahiciang Topa in amate leitung mun theampo ah kithethaangsak hi, tuaciang amate in a khuapi saat tawlnga hi. 9Tua khuapi sia Babylon ci uh hi, banghang ziam cile Topa in tua munah mihingte theampo ii kampau kitoknoai a, tua mun panin leitung mun theampo ah amate kithethaangsak hi.

Shem ii Suan le Paalte

(1 Khangtaanghthu 1:24-27)

10Hite sia Shem ii suan le paalte hi. Shem kum 100 a phak, tuipi liim zawk kum nii a phak ciangin ama in Arpachshad kici tapa khat nei hi. 11Tua zawk in ama kum 500 nungta lai a, ta dangte zongh nei hi.

12Arpachshad kum 35 a phak ciang, ama in Shelah kici tapa khat nei hi; 13Tua zawk in, ama kum 403 nungta lai a, ta dangte zongh nei hi.

14Shelah kum 30 a phak ciang, ama in Eber kici tapa khat nei hi; 15tua zawkciang, ama kum 403 nungta lai a, ta dangte zongh nei hi.

16Eber kum 34 a phak ciang, ama in Peleg kici tapa khat nei hi; 17tua zawk in, ama kum 430 nungta lai a, ta dangte zongh nei hi.

18Peleg kum 30 a phak ciang, ama in Reu kici tapa khat nei hi; 19tua zawk in, ama kum 209 nungta lai a, ta dangte zongh nei hi.

20Reu kum 32 a phak ciang, ama in Serug kici tapa khat nei hi; 21tua zawk in, ama kum 207 nungta lai a, ta dangte zongh nei hi.

22Serug kum 30 a phak ciang, ama in Nahor kici tapa khat nei hi; 23tua zawk in, ama kum 200 nungta lai a, ta dangte zongh nei hi.

24Nahor kum 29 a phak ciang, ama in Terah kici tapa khat nei hi; 25tua zawk in, ama kum 119 nungta lai a, ta dangte zongh nei hi.

26Terah kum 70 a phak zawkciang, ama sia Abram, Nahor le Haran ii pa suak hi.

Terah ii Suan le Paalte

27Hite sia Terah ii suan le paalte hi a, Terah sia Abram, Nahor le Haran te ii pa ahi hi. Haran sia Lot ii pa hi a, 28ama ii pa Terah a nuntak lai in, a suana Babylon ngam Ur khuapi ah Haran thi hi. 29Abram in Sarai teenpui a, Nahor in Haran ii tanu Milcah teenpui hi. Haran sia Iscah ii pa zongh ahi hi. 30Sarai in ta nei thei ngawl hi.

31Terah in a tapa Abram, Haran ii tapa ama ii tupa ahi Lot le a tapa Abram ii zi ahi a monu Sarai sam a, amate taw Canaan ngam ah pai tu in Babylon ngam Ur khuapi nusia uh hi. Amate Haran dong pai in tua munah teang uh hi. 32Terah kum 205 a phak ciang tua munah thi hi.

Currently Selected:

Pianciilna 11: SCB2

Highlight

Copy