Esther 8
8
A do Kik tu in Jew te Kisawl
1Tua ni ma in Xerxes kumpipa in Esther kumpinu tungah Jew te ngalpa Haman neisa theampo pia hi. Esther in Mordecai taw mealheak khat a hina thu kumpipa tungah son a, tua hun a kipan Mordecai sia kumpipa omna ah kitumsak thei hi. 2Kumpipa in a min tupna a om a khutzungbu suutin, (Haman tung pan a laak kik sia ahi hi.) Mordecai pia hi. Esther in Haman neisa teng a keam tu in Mordecai koi hi.
3Tua zawkciang Esther in kumpipa paupui kik a, a peang ah kisepsuk in kap hi. Ama in kumpipa tungah Agag suan Haman ii Jew te tungah thusia vawt in a thasawm nopna thu a tawlngaksak natu in ngen hi. 4Kumpipa in a khamh ciangkhut Esther sangah laamto ahikom ama dingto in, 5“Kumpipa awng, na lung a kim na le kei nong khualna in, hi thu maan tuak na sa le, nong hesuakna in Haman thupiak nate bangin a kisep suak ngawl natu — Agag suan Hammedatha tapa ii na kumpi ngamsung tengah Jew te theampo suksiat natu in tua thupiaknate khaktan natu thu thansakna hong suaksak ta'n. 6Ka mite tungah hi tuasiatna tungin, ka mealheakte kithat le, bangbangin thuak zo thong tu khi ziam?” ci hi.
7Tuasia ciang Xerxes kumpipa in Esther kumpinu le Jew mi Mordecai tungah, “En vun, keima in Jew te a thasawm hu in Haman ka awklumsak zo a, a neisa teng Esther tungah ka pia zo hi. 8Ahizong kumpipa min taw kumpi tazeik kituum in a suaksa thu thansakna sia kidawk kik thei ngawl tu hi. Ahizong Jew te tungah na dei bang po in lai at thei tu nu hi; tuaciang ka min taw lai at vun a, tua lai tungah kumpipa tazeik tuum thei tu nu hi,” ci hi.
9Sivan tha, a tha thumna, ni 23 ni in hi thu piang hi. Mordecai in kumpipa ii thuzeakte samin India pan Ethiopia dong ngamke 127 teng ah Jew te, ngamukmangte, zum vaihawmte le uliante tungah a laithak tu teng khaw hi. Tua laithakte sia ngamke sim ah a zak kampau tek le a lai tek taw ki at a, Jew te tungah amate kam le a lai taw in ki at hi. 10Mordecai in tua laithakte Xerxes kumpipa min taw atsak a, ama in tua laite kumpi tazeik tuum hi. Tua laite kumpi siphu buk pan siphu tai ngaangte tung a tote in hawmsak hi.
11Tua laithakte sungah kumpipa in khuapi theampo ah Jew te kipawl in amate le amate a kihuuk thei natu thu a omsakna thiang son hi. Ngamke khat pawpo ah ngam minam khat pawpo in ngalhiamte taw Jew pasalte, a patangte, a numeite a sim le Jew te in a simte do kik thei a; tuate khat zongh khoaikhe ngawlin thatlum thei tu a, a neisa teng laaksak thei tu hi. 12Hi thutanna sia Persia ngamsung theampo ah Jew te a kithalup tu ni, tha sawm le tha niina, Adar tha ni sawm le ni thum ni pan kisimin, taangtunsak natu ahi hi. 13Hi thu sia upadi in kithangsak tu a, tua ni a thet ciang Jew te in a ngalte tungah phulam tu in a kingin khol thei natu in ngamke theampo ah mi theampo ii heak tu in kizasak tu hi. 14Kumpipa thupiak bangin kumpi siphu tungto laitaite a manlang thei tawpin kipaisak hi. Tua thutanna sia Susa khuapi sung zongh ah kithangsak hi.
15Mordecai sia vancii le a kaang ngelh kumpi puantual le a sa pha puanneal sandup te silh in, a etlawm mama khamh lukhu khu in kumpi inn pan pusuak hi. Tuasia ciang Susa khuapi lamdung teng ah patoaina aw te le lungdam in aunate hong nging hi. 16Jew te atu in thinnopna le suatakna, lungdamna le ngualzawna hong om hi. 17Kumpipa ii thu thansakna lai a kisimna mun theampo, khuapi sim le ngamke sim ah Jew te in lungdam anneakpoai vawtin, lungdam poaikham ni nei kawkoai uh hi. A tatakin ci leang tu in midang tam mama in Jew te a kiitak hu in, Jew te suak uh hi.
Currently Selected:
Esther 8: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
