Esther 2
2
Esther, Kumpinu Suak
1Tua nungciang kumpipa ii thin uukna a thai zawkciang ngawngawnin ama in Vashti ngamtatna le a tungah a thu thansakna sia ngaisun top hi. 2Tua ahiciang kumpipa kung a om a thudok pawlkhatte in, “Banghangin ngaknu thiangtho mealpha pawlkhat zongsak ngawl ni ziam? 3Na ukna ngamke theampo ah ngaknu mealpha teng hi lai Susa khuapi sung numeite teenna munah hong puak tu in uliante panmun pia thei ni hi. Na numeite a uk cilnge sa Hegai ii kep tu in koi in a, amate tualai ah a mealphat natu in kipuuasak in. 4Tuasia ciang pha na sakbel numei sia la in a, Vashti taangin kumpinu suaksak in” ci in ngaisutna pia uh hi.
Kumpipa in hi ngaisutna sia phasa in zui hi.
5Tualai Susa khuapi ah Jew te Jair tapa Mordecai kici khat teang hi; ama sia Benjamin minam hi a, Kish le Shimei ii suan khat hi. 6Babylon kumpipa Nebuchadnezzar in Judah kumpipa Jehoiachin le a ngalmat honkhat Jerusalem pan saltaang tu in a paipui lai in Mordecai kihel hi. #2 Kum 24:10-16; 2 Khang 36:10 7Ama in suapuiseal khat nei in, Hebrew min, Hadassah kici Esther hi a; tua nu a mealpha in a khanhoi hi. A nute a pate a thi ciang Esther sia Mordecai in la a, ama tanu tatak bangin khoi in khangsak hi.
8Kumpipa in tua thu thansakna thak a suasak ciang Susa ah ngaknu tam mama hong kipaipui a, Esther kihel hi. Ama zongh numeite teenna a uk Hegai khutnuai kumpi inn sungah kikoi hi. 9Hegai in Esther diksa in maipha pia hi. Ama in Esther mealphat natu in kin vawt a, kimetsak in, an tuam taw vaak hi. Ama in tua nu numeite teenna munah omna phabel pia a, kumpi inn pan a kitealtuam numei salite in khoisak hi.
10Tu in Mordecai ii ngaisutna a piak bangin Esther in Jew te a hina thu iimcip hi. 11Ni simin Mordecai in Esther bang bang in om a, bang suak lai tu ci in a heak natu in numeite teenna leitual mai ah kilee nithi hi.
12Numeite mealphat natu a kipua hun kum khat sung hi a — myrrh sathau namtui taw tha luk sung le balsam sathau taw tha luk sung kimet hi. Tua zawkciang numeite khat zawkciang khat kumpi Xerxes kungah kipaipui tu hi. 13Numeite teenna pan kumpi inn sungah ama a pai ciang puan a silh nop po silh thei hi. 14Tualai ah ama nitak sang in pai a, a zingsang ciang numeite teenna mundang ah kipaipui kikin kumpipa zinote a uk cil kingetpa Shaashgaz tungah ki aap tu hi. Kumpipa in diksa a, a min taw a sam kik buanale ama sia kumpipa kung pai kik ngawl tu hi.
15Kumpipa kungah Esther a pai tu hun hong theng hi. Esther sia Abihail ii tanu hi a, a tanu tu in a la Mordecai ii suapui sealh hi; Esther sia a mu pawpo in hoisa hi. Ama pai hun a thet ciang numeite teenna a uk, cil kingetpa Hegai ii a sawl bang linlian in puansilh hi. 16Tuabangin Xerxes ii kumpi a sep a kum sali kum, a tha sawmna, Tebeth tha in Esther sia kumpi inn sung Kumpi Xerxes kungah kipaipui hi. 17Kumpipa in ngaknu dangte sangin ama hoi sa zaw a, a dangte sangin maipha pia zaw in, it zaw hi. Ama in a lu tungah kumpilukhu khusak a, Vashti dinmun ah kumpinu suaksak hi. 18Tua zawkciang kumpipa in Esther patoaina in anneakpoai lian khat vawt a, a uliante le zum nasep uk theampo sam siat hi. Ama in kumpi ukna ngamsung bup zum kha ni khat tu in thangsak a, kumpipa taw a kiphu, a kilawm letsongte hawm hi.
Mordecai in Kumpipa Nuntakna Hun
19Tua hun sungin kumpipa in Mordecai sia nasep uk dinmun khat pia hi. 20Esther in ahile Jew te a hina kihesak ngawl lai hi. Mordecai in kuama tung a son ngawl natu sawl a, a no lai a thu a nit bangma in hi thu huvau zong ah a thu ni hi.
21Mordecai in kumpi inn ah zum na a sep hun sungin, kumpipa inndoi sung tumna a cing numei uk cil kinget niite ahi, Bigthana le Teresh in Xerxes kumpipa ngalvawtin, thalup sawm ku uh hi. 22Mordecai in tua thu a heak ciang Esther kumpinu tungah son a, Mordecai ii a heak thute ama in kumpipa tungah son hi. 23Hi thute a kat ciang thumaan a hina mu ahikom tuate ngeal sia ngui ki awklumsak hi. Hi thu teng theampo kumpi ukna ngamsung zum thu tepteena te sungah a kikhum natu in kumpipa in thupia hi.
Currently Selected:
Esther 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
