Colossae te 3

1Note nuntakna sungah Christ taw hong kithosak kik zo ahikom Pathian ii ziatsang kumpi tokhum tung Christ tona mun vantung ah a om nate thangai vun. #Ps 110:1 2Tua munah na ngaisutna uh phut vun a, hi leitung ah phut heak vun. 3Banghang ziam cile note thi zo a, tuaciang na nuntakna uh sia Pathian sungah Christ taw kiseal zo hi. 4Na nuntakna tatak uh sia Christ hi a, tuaciang ama hong kilangh ciangin note zongh ama taw na kilangh khawm tu uh a, ama ii vaangletna na siim tu uh hi!

Nuntakna Lui le Nuntakna Thak

5Note in na sungah na hong seam leitung deinate na thisak uh kul tu hi, tuate sia numei le pa khialna, kiihuai ngamtatna, cii le sa deina zui nopna, ngamtat sia tatnopna, duhopna (duhopna sia milim biakna nam khat ahi hi) te ahi hi. 6Tua bangte hu in ama thu a ni ngawlte ii tungah Pathian thin uukna hong tung tu hi. 7Na nuntakna uh tuate ii hong huknelh hunlai in noma mama zongh tuabang uukna deinate taw kipawl in na nungta ngei zo uh hi.

8Ahihang tu in note in, thin uukna, a sia thangaina, etsatna thin neina, hite theampo na vawk siat vun. Kiselnona le a kiihuai kammalte na muk uh pan pusuaksak ngei heak vun. 9Khat le khat na kitheam heak vun, banghang ziam cile na nuntakna lui taw a kikop zongsang nate na suut zo uh a, #Eph 4:22 10a thak nuntakna zia na silh zo uh hi. Tua in, a kicing takin ama ih heak seseam natu in, Bitphuapa Pathian ii ama a suun tu in hong thaksua tawntung nuntakna thak ahi hi. #Pian 1:26; Eph 4:24 11Tua hu in Gentile le Jew, vunteap at le at ngawl, khualmi le tualmi, sila le sila ahi ngawlte ci bangin kidoidanna om ngawl hi. Ahihang Christ sia na theampo hi a, na theampo sungah Christ om hi.

12Note sia Pathian ii mite na hi uh hi, ama in hong it a ama atu in hong teal hi. Tua ahikom note sia kiciliapna, cikna, kiniamkhiakna, thinneamna le thinsau nate puan bangin na silh uh kul hi. #Eph 4:2 13Khat le khat na kidual vun a, a dang khat ii tungah lungkim ngawlna a nei khat po na om uh ciangin, khat le khat kimaisak vun. Topa in note mawna hong maisak bangma in note zongh khat le khat na kimaisak vun. #Eph 4:32 14Tuaciangin hi kicinna tungsia ah ki itna belap vun, tua in na theampo a cingin pumkhat suak tu in hong hencip hi. 15Christ ii thinnopna hong piak sia bang tu ziam cile na thukhensat nate sungah lam hong lak tu in, hong piak ahi hi. Banghang ziam cile hi thinnopna sungah note theampo pumkhatin a omkhawm tu, Pathian in hong sam hi. Tuaciangin lungdamko na thiam tavun. 16A kicing Christ ii thu na thinsung uh ah hong teang tahen. Khat le khat ciimna theampo taw kihil kilak tavun. Psalm late, pokna late le la thiangtho te na thinsung uh ah lungdamkona in Pathian tungah na sa vun. #Eph 5:19-20 17Na sep, na son uh theampo hu in, Pa Pathian tungah lungdam na ko uh ciangin, Topa Jesus min taw na vawt tu uh hi.

Nuntakna Thak sungah Aituam Kizopna

18Zite awng, na pasalte thu ni tavun, banghang ziam cile Tapidaw na hina uh taw hi bangin na ngamtat tu uh ahi hi. #Eph 5:22; 1 Pe 3:1

19Pasalte awng, na zite uh na it vun, amate tungah na ngongtat heak vun. #Eph 5:25; 1 Pe 3:7

20Tate awng, nute pate ii thu na nit tawntung tu uh sia Tapidawte vaipuak hi a, tua in Pathian ii lungkim thu ahi hi. #Eph 6:1

21Nute pate awng, na tate uh a thin na uuksak heak vun, a thin na uuksak uh le a thin kiam tu hi. #Eph 6:4

22Silate awng, thu theampo ah na tote thu ni vun, pha hong sak tu deina taw amate hong etcik laitak bek hi ngawlin, Topa na thasia uh hu in, thin tak taw a thu ni vun. #Eph 6:5-8 23Na nasep uh theampo sungah mihing atu hi ngawlin Topa atu a seam bangin kingaisunin na thin theampo taw naseam vun. 24Topa in ama ii mite atu a khealsia thamante note hong pia tu hi ci in na phawk tavun. Banghang ziam cile na Topa tatakin Christ ahi hi. 25Tuaciangin ngamtat khialna a nei theampo sia a khialna bangin thuak tu hi, banghang ziam cile Pathian in mihing sim a kibangin thukhen tu hi. #Thkna 10:17; Eph 6:9

Currently Selected:

Colossae te 3: SCB2

Highlight

Copy