Sawltakte 6

Hupa Salite

1Tua zawk hun khat ciangin, a nungzuite khakhang a, Greek kampau Jew te le innteak Jew te kilaklaw ah kihau na khat piang hi. Greek kampau Jew te in ni sim sum a kihawm ciangin, amate ii meingongte sia, kingaingon hi, ci uh hi. 2Tua ahikom sawltak sawm le niite in, nungzui theampo khawmtua a, “Ko sia sum vai taw komlaak hu in, Pathian kammal taw thuhilna, ka ngaingon tu uh sia maan ngawl hi. 3Tua ahiciang, suapuite awng, Thaa Thiangtho le ciimna taw a kidim hi ci in a kitel pasal sali noma sung pan hong teal tavun a, amate khut sungah, hi nasep sia ih aap tu hi. 4Ko ka hi uh le tuasia ciangin ka hun uh a bit in thungetna le thuhilna in, ka zangh tu uh hi,” ci uh hi.

5Pawl buppi ma in sawltakte ii ngaisut piakna bangin, lungkim uh ahikom, amate in, Thaa Thiangtho le upna taw a kidim Stephen, Philip, Prochorus, Nicanor, Timon, Parmenas, le Nicolaus a kici Antioch khua pan, Jew biakna ah tu mahiat in a kikheal Gentile mi khat teal uh hi. 6Tua pawlte in tua mite teng sia sawltakte tungah aap uh a, sawltakte in amate lu tungah a khut nga in thungetsak uh hi.

7Tuabangin Pathian kammal hong kizel to hi. Jerusalem khua ah a nungzuite khang vaial a, thiampi tam mamate in hi upna saang uh hi.

Stephen ii Kimatna

8Pathian ii a thupha nasia takin a piak, vaangletna taw a kidim Stephen in, nalamdangte le a lamdangte tam mama mipite sungah vawt hi. 9Ahihang pasal pawlkhat in langpan uh a, tua mite sia A Kisuatak Mite #6:9 A Kisuatak Mite: Amate sia sila ahi ngei Jew te hi a, ahihang a kilei sa, ahibuale suatakna a kipia sa te ahi hi. ii synagogue sungah pawlmite hi a, Cyrene pan le, Alexandria pan Jew te kihel hi. Amate sia Cilicia ngamkhen le Asia ngamkhen te pan Jew dangte taw kikopin, Stephen taw kam kinial hong kipan uh hi. 10Ahihang Thaa in Stephen sia tuabang ciimna pia ahikom ama a pau ciangin a nalh zo bua uh hi. 11Tua ahiciang amate in, pasal pawlkhat sumnguk pia a, “Moses le Pathian langpan in, a pauna za khu hi!” cisak hi. 12Hi bang danin mihonte, upate le Thukham hil syate hol uh hi. Amate in Stephen manin Council mai ah paipui uh hi. 13Tua zawkciangin, leilot tetti pang tu in, mihing pawlkhat sungtangsak hi. Amate in, “Hisia pa in, a thiangtho ih Biakinnpi le Moses Thukham sia langpan tawntung hi. 14Nazareth mi Jesus in, hi Biakinnpi sutham tu a, Moses tung pan hong paisuk ih ngeina theampo hong khealsak tu hi, ci in a son laitakin za khu hi!” ci uh hi. 15Council sungah a to te theampo in, Stephen en tek uh a, a maitang sia vantunglalang maitang taw kibangin mu uh hi.

Currently Selected:

Sawltakte 6: SCB2

Highlight

Copy