1 John 4
4
A maan le A maan ngawl Thaa
1Ka it lawmte awng, Thaa ka nei a ci theampo na um heak vun, ahihang amate nei thaa sia Pathian kung pan hong pai ahile ahi ngawl na sittel tavun. Banghang ziam cile mun theampo ah kamsaang maan ngawlte pai kawkoai zo uh hi. 2Pathian Thaa ahile ahi ngawl sia hi bangin na tel thei tu uh hi: Jesus sia mihing khatin hong pai hi a ci pawpo in Pathian kung pan hong pai Thaa nei hi. 3Ahihang Jesus huvau hi thu a nial khat pawpo sia Pathian kung pan hong pai Thaa a nei bua hi. Ama nei tua thaa sia Christ ii Ngalpa kung pan hi; tuasia pa hong pai tu hi ci in na za zo uh a, tu in ama sia hi sung leitung ah om zo hi.
4Ahihang ka tate awng, note sia Pathian neisa na hi uh a, kamsaang maan ngawlte na zothal zo uh hi, banghang ziam cile no sungah a om Thaa sia leitung neisa ahite ii sung a om thaa sangin thahat zaw hi. 5Tua kamsaang maan ngawlte in leitung nate thuson in nei uh hi, tuaciang leitung mite in amate thusonte ngai uh hi, banghang ziam cile amate sia leitung ii neisa ahi uh hi. 6Ahihang ei sia Pathian neisa ih hi hi. Pathian a he peuma in ei thuson hong ngai hi. Pathian neisa ahi ngawl peuma in ei thuson hong ngai bua hi. Tua ahiciang thumaan thutak ii Thaa le a maan ngawl thaa kilamdanna sia, tu sia panin ih khentel thei hi.
Pathian sia Ki itna
7Ka it lawmte awng, eite khat le khat ki it tawng, banghang ziam cile itna in Pathian kung pan hong pai hi. Ngual a it thei pawpo sia Pathian ta hi a, Pathian he hi. 8Ngual a it ngawl peuma sia Pathian a he bua hi, banghang ziam cile Pathian in itna ahi hi. 9Tuaciang ama tungtawnin nuntakna ih nga thei natu in Tapa khat bek a nei sia leitung ah hong paisakna taw, Pathian in eite hong itna hong lak hi. 10Itna ih ci sia in hisia ahi hi: eite in Pathian a it ih hi bua a, Pathian in eite hong it manin ih mawna a mai natu in a Tapa hong paisak hi.
11Ka it lawmte awng, hi bangin Pathian in hong it ahile, eite khat le khat ih ki it tu ahi hi. 12Kuama in Pathian mu ngeingawl hi, ahihang eite khat le khat ih ki it le, Pathian sia ei taw pumkhat in hong omkhawm a, tuaciang ama ii itna ei sungah hong cialcingsak hi. #Jn 1:18
13Eite Pathian taw pumkhat in kinungta a, ama sia ei taw pumkhat in nungta hi ci in maan takin ih tel hi, banghang ziam cile ama in ei tungah ama Thaa hong pia zo hi. 14Tuaciang Pa in a Tapa sia leitung Hunpa tu in hong paisak hi ci in ih mu a, ngual tungah ih son hi. 15Khat po in Jesus sia Pathian Tapa hi ci in a pualaak le ama in Pathian taw pumkhatin nungta a, Pathian in ama taw pumkhatin nungta tu hi. 16Tuaciang Pathian ii ei atu a nei itna sia eima mama in ih he a, ih um hi.
Pathian in itna hi, tuaciang ki itna sungah a nungta peuma Pathian taw pumkhatin nungta a, Pathian zongh ama taw pumkhatin nungta hi. 17Thukhenna Ni in thinhanna ih nei natu in eite sungah ki itna hong cialcingsak hi; hi leitung ah ih nuntakna sia Christ ii nuntakna bangma ahikom, eite tuabang thinhanna ih nei tu ahi hi. 18Itna sungah launa om ngawl a, a cialcing itna in launa theampo hawlkeak hi. Tua ahiciang, launa sia daan thuakna taw kizom ahikom kiitakna a neite sungah itna kicing om ngawl hi.
19Pathian in ei hong it masa ahikom eite in ama ih it hi. 20Khat po in Pathian ka it hi ci napi in a suapuite a ensan le ama sia leilot thusonpa ahi hi. Banghang ziam cile a mu thei a suapuite a it buale a mu thei ngawl Pathian a it thei buatu hi. 21Christ ii eite hong thupiakna in hi sia hi: Pathian a it peuma in a suapuite zongh a it kul tu hi.
Currently Selected:
1 John 4: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
