1 Khangtaanghthu 9
9
Saltanna pan A heakkik Mite
1Israel mite theampo a innkuan zui in kiciamtee a, tuate Israel Kumpite Laibu sungah kikhum hi.
Judah mite sia amate mawna hangin daan piakna in Babylon ah saltaang tu in kihawlkhia hi. 2Khuapi te sung amate ii neisa omna ah a heakkik masa belte sia Israel ngammite, thiampite, Levi te le Biakinn naseamte ahi uh hi. 3Judah, Benjamin, Ephraim le Manasseh nam te sung pan mihingte Jerusalem ah teang tu in pai uh hi. #Ezra 2:27; Neh 7:73
4-6Jerusalem ah a teang Judah nam pan innkuan 690 pha hi.
Judah ii tapa Perez suan le paalte ii lampuipa sia Uthai hi a, Uthai sia Ammihud ii tapa, Omri ii tupa hi. Ama taanghpupi dangte sungah Imri le Bani te kihel hi.
Judah ii tapa Shelah suan le paalte lampuipa sia Asaiah hi a, amate innkuan ii lutang hi.
Judah ii tapa Zerah ii suan le paalte lampuipa sia Jeuel hi.
7-8Benjamin, nam sung panin a nuai a teng Jerusalem ah teang a:
Meshullam ii tapa Sallu hi a, ama sia Hodaviah ii tapa hi,
Hodaviah sia Hassenuah ii tapa hi.
Jeroham ii tapa Ibneiah
Elah sia Uzzi ii tapa, Michri ii tupa
Shephatiah ii tapa Meshullam hi a, ama sia Reuel ii tapa hi
Reuel sia Ibnijah ii tapa hi.
9Tua mun ah teang hi nam sung pan innkuan 956 om hi. A tungah min a ki atte theampo sia innkuan lutangte ahi hi.
Jerusalem ah A teang Thiampite
10-12A nuai a thiampite Jerusalem ah teang a:
Jedaiah, Jehoiarib, le Jachin,
Hilkiah ii tapa Azariah (Biakinnpi a ukpipa) a taanghpupite sungah Meshullam, Zadok, Meraioth le Ahitub te kihel hi.
Jeroham ii tapa Adaiah, a taanghpupite sungah Pashhur le Malchijah kihel hi.
Adiel ii tapa Maasai, a taanghpupite sungah Jahzerah, Meshullam, Meshillemith le Immer te kihel hi.
13Innkuante ii lutangte ahi thiampite a vekpi in 1,760 pha uh hi. Amate sia Biakinnpi taw kisai nasep theampo a thiam mamate ahi uh hi.
Jerusalem ah a Teang Levi te
14-16A nuai a Levi te Jerusalem ah teang a:
Hasshub ii tapa Shemaiah, a taanghpupite sungah Merari bee le phung sung pan Azrikam le Hashabiah kihel hi.
Bakbakkar, Heresh, le Galal
Mica ii tapa Mattaniah, a taanghpupite sungah Zichri le Asaph te kihel hi.
Shemaiah ii tapa Obadiah, a taanghpupite sungah Galal le Jeduthun te kihel hi.
Berechiah sia Asa ii tapa, Elkanah ii tupa sia hi a,
Netophah khua ii ngam sungah teang hi.
Jerusalem ah a Teang Biakinnpi Cingte
17A nuai a biakinn cingte Jerusalem ah teang a: Shallum, Akkub, Talmon, le Ahiman te hi. Shallum sia amate lampuipa hi. 18Tua hun dongin amate ii bee le phung teng Kumpipa Kongpi tumna nisuana sangah ki omsak hi. Amate in nidang in Levi te ngiaphual kongpite cing uh hi.
19Kore ii tapa le Ebiasaph ii tupa, Shallum sia Korah ii bee le phung puite taw Topa ompuina Puanbuk tumna a cingpa hi a, a taanghpupite ii Topa ngiaphual a uk hunlai bangma in cing uh hi. 20Eleazar ii tapa Phineas in amate khatvei lai in uk hi. — Topa in ama taw om tahen!
21Meshelemiah ii tapa Zechariah zongh Topa ompuina Puanbuk tumna a cingpa hi.
22Tua tumna te le kongpite a cing tu a vekpi in mihing 212 kiteal hi. Amate sia a teenna khuanote zui in kiciamtee hi. David kumpipa le kamsaang Samuel in a taanghpupite hi bang nasep thupite seamsak hi. 23Amate le a suan a paalte in Biakinnpi kongpite cing tawntung uh hi. 24Saksang, thangsang, nisuana le nitumna sangah kongpi khat tek om in, a cing a ukpi zongh khat tek om hi. 25Hi kongcingte sia khuano a teang amate mealheak te in hu a, ni sali ciang khatvei kilaih hi. 26Kongcing ukpi li sia Levi te hi a, vaipuak nei belte ahi uh hi. Amate in Biakinnpi sung inndoite le a sungah a om vanhte kep tu zongh vaipuak nei uh hi. 27Amate in Biakinnpi cin tu le zing sim kongpite hon tu vaipuak nei ahikom Biakinnpi nai ah teang uh hi.
Levi Dangte
28Levi dangte in biakna ah a kizangh uum le bealte kep tu vaipuak nei uh hi. Amate in tua vanhte a kizak sim le a koi kik ciangin sim vaciat hi. 29A dangte in biakna taw kisai a thiangtho vanh le, anvui, sapittui, olive thau, ngimnamtui le hel namtuite keam hi. 30Ahihang hel namtuite hel tu sia thiampite vaipuak hi.
31Korah ii bee le phung pan Shallum ii tapa lianbel Mattithiah kici Levipa ii nasep sia anluum em biakpiakna sia vawtkhol tu ahi hi. 32Kohath bee le phung sung pan mite in Sabbath ni sim Biakinnpi atu anluum thiangtho vawt tu vaipuak nei uh hi.
33Levi innkuan pawlkhat in biakinn ah tumtheite tum tu vaipuak nei hi. Hi innkuan te ii lutangte biakinn huang sung inn pawlkhat te sungah teang uh a, a sun a zanin nasep a nei uh hu in nasep dang bangma kipia ngawl hi.
34A tung a, a kison pasal te sia a pu a pa khangngui zui in Levi te ii innkuan lutangte veu ahi uh hi. Amate sia Jerusalem ah a teang lampuite hi.
Saul Kumpipa ii Taanghpupite le Suan le Paalte
(1 Khangtaanghthu 8:29-38)
35Jeiel in Gibeon khuapi saatin tua munah teang hi. A zi sia Maacah hi. 36A tapa lianbel Abdon hi in, a tapa dangte Zur, Kish, Baal, Ner, Nadab, 37Gedor, Ahio, Zechariah, le Mikloth te hi a, 38Mikloth sia Shimeah ii pa hi. A suan a paalte amate bee le phung pan innkuan dangte naina Jerusalem ah teang uh hi.
39Ner sia Kish ii pa hi a, Kish sia Saul ii pa hi. Saul in tapa li nei a: Jonathan, Malchishua, Abinadab le Eshbaal te ahi hi. 40Jonathan sia Meribbaal ii pa hi a, Meribbaal sia Micah ii pa hi. 41Micah in tapa li nei a: Pithon, Melech, Tarea, le Ahaz te ahi hi. 42Ahaz sia Jarah ii pa hi a, Jarah sia tapa thum ii pa hi a: Alemeth, Azmaveth, le Zimrite ahi hi. Zimri sia Moza ii pa, 43Moza sia Binea ii pa, Binea sia Rephaiah ii pa, Rephaiah sia Eleasah ii pa, Eleasah sia Azel ii pa hi.
44Azel in tapa luk nei a: Azrikam, Bocheru, Ishmael, Sheariah, Obadiah, le Hanan te ahi hi.
Currently Selected:
1 Khangtaanghthu 9: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
