1 Khangtaanghthu 5
5
Reuben ii Suan le Paalte
1Hite sia Jacob ii tapa lianbel Reuben ii suan le paalte ahi uh hi. (Reuben in a pa zinote khat khialpui ahikom taciil ii innlua za taan in, a lua tu teng sia Joseph kipia hi. #Pian 35:22; 49:3-4 2Ahizong Judah nam sia a hatbel hi a, a nam theampo atu ukpa khat ii pianna ahi hi.) #Pian 49:8-10 3Jacob ii tapa lianbel Reuben in tapa li nei hi: Hanoch, Pallu, Hezron, le Carmi te ahi hi.
4-6Hite sia khang khat zawkciang khang khat Joel ii suan le paalte ahi hi: Shemaiah, Gog, Shimei, Micah, Reaiah, Baal, le Beerah te ahi hi. Assyria kumpilianpa Tiglath Pileser in a nam lampuipa Beerah manin a ngam pan mun dangah hawlkhia hi. #2 Kum 15:29
7Reuben nam sungah a nuai a, bee le phung lampuite min teng innkuan khangngui sungah kiciamtee hi: Jeiel, Zechariah, 8tuaciang, Azaz ii tapa, Shema ii tupa Bela hi a, ama sia Joel ii bee le phung pan ahi hi. Hi bee le phung sia Aroer khua le a saksang Nebo le Baal Meon ngam sungah teang uh hi. 9Amate in Gilead ngam ah nganno honpite nei ahikom Euphrates ngundung suk theampo, nisuana sang sennealngam dongin sungsuam uh hi.
10Saul kumpipa hun sung Reuben namte in Hagri te ngal sungah a thalup zawkciang Gilead nisuana sang amate ngam teng la uh hi.
Gad Suan le Paalte
11Gad minamte sia Reuben namte ii teenna saksang Bashan ngam sungah nisuana sang Salecah dongin teang uh hi. 12Joel sia a puiding bee le phung pianna hi a, Shapham sia bee le phung a thupibel a niina sia ii pianna ahi hi. Janai le Shaphat te sia Bashan ngam ah a teang bee le phung dangte ii pian nate ahi uh hi. 13Tua Gad nam sung pan bee le phung dang salite a nuai a bang ahi hi: Michael, Meshullam, Sheba, Jorai, Jacan, Zia, le Eber te ahi uh hi. 14Amate Huri ii tapa Abihail ii suan le paalte hi in, a taanghpupite a nuai a bang ahi hi: Abihail, Huri, Jaroah, Gilead, Michael, Jeshishai, Jahdo, Buz te ahi hi. 15Abdiel ii tapa, Guni ii tupa Ahi sia hi bee le phungte ii lutang ahi hi. 16Amate Bashan le Gilead ngamsung khua teng le Sharon ngam nganthana munte theampo ah teang uh hi. 17(Hi thu tepteenate sia Judah kumpipa Jotham le Israel kumpipa Jeroboam II khan lai in a kikaikhawm thute veu hi.)
Nisuana sang Minamte ii Ngalkapte
18Reuben, Gad le Manasseh nisuana sang minamte sungah lum, namsau, le thal a zanghthiam ngalkap 44,760 om hi. 19Amate in Jetur, Naphish le Nodab nam ahi Hagri minamte sim uh hi. 20Amate in Pathian muangin a huu natu thungen ahikom Pathian in a thu ngetna sang a, Hagri le a pawlte zosak hi. 21Amate in ngalte ii kalaoh 50,000, tuu 250,000, le laa 2000 matsakin ngalte 100,000 man uh hi. 22Tua ngal simna sia Pathian ii deina ahikom amate in ngalte tam mama that uh hi. Amate sia saltaang tu in a kipaipui dong tua ngam ah teang suak uh hi.
Manasseh Nisuana Sang Mite
23Manasseh Nisuana sang mite sia Bashan ngamsung saksangah Baal Hermon, Senir, le Hermon mual dongin teang a, pung mama uh hi. 24Amate ii bee le phung lutangte sia: Epher, Ishi, Eliel, Azriel, Jeremiah, Hodaviah le Jahdiel te ahi hi. Amate theampo sia ngalkap mindok tuam te le bee le phung lampui minthangte ahi hi.
Nisuana Sang Minamte Kihawlkeak
25Ahihang hi mite in a taanghpupite ii Pathian tungah thumaan ngawlin a ngam pan Pathian ii a nawkeak minamte ii pathiante bia tu in Pathian taisan uh hi. 26Tua ahikom Pathian in Assyria kumpilianpa Pul (Tiglath Pileser zong kici) in a ngam simsak hi. Pul kumpipa in Reuben, Gad, le Manasseh Nisuana sang minam teng notkeak a, Halah, Habor, le Hara, tuaciang Gozan ngunhui ah teang suaksak hi. #2 Kum 15:19; 2 Kum 15:29; 2 Kum 17:6
Currently Selected:
1 Khangtaanghthu 5: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
