1 Khangtaanghthu 18
18
David ii Ngalzawnate
(2 Samuel 8:1-18)
1Hun tawmvei zawkciang David kumpipa in Philistine te sim kikin zo hi. Ama in amate ii a uk Gath khuapi le a kiim ah khuanote la hi. 2Moab te zongh zo a, a khutnuai suak in David tungah shia pia uh hi.
3Tua zawkciang David in Syria ngamsung Zobah ngam ukpa Hadadezer kumpipa sia Hamath ngam nai na ah sim hi. Banghang ziam cile ama in Eupharates ngunnaak sangah a om ngam sia uk tu hanciam hi. 4David in a siphu ngalleang tulkhat, siphu ngalkap 7,000 le lei ngalkap 20,000 man hi. Ama in leang zakhat kai tu siphu kisam za khe in a dangte theampo a peangbaisak siat hi.
5Damascus ah a om Syria te in Hadadezer kumpipa hu tu in a ngalkaphonpi a paisak ciang, David in simin, 22,000 thatlum hi. 6Tua zawkciang ama in amate ii ngam sungah ngalkap ngiaphualte saat a, amate a khutnuai suaksakin phiangshia piasak hi. Topa in David sia mun theampo ah zawna pia hi. 7Hadadezer ii uliante puak khamh ngaldalna lumte David in matsakin Jerusalem ah ciapui hi. 8Ama in Hadadezer ukna Tibhath le Kun khuapite panin taau tam mama zongh la hi. (Solomon in a khaksang ciang, tuate taw Biakinnpi atu kuang le beal te, khuam te le tuikuang vawt hi.) #1 Kum 7:40-47; 2 Khang 4:11-18
9David in Hadadezer ii ngalkaphonpi bup zo siat ci thu Hamath kumpipa Toi in za hi. 10Tua ahiciang David kumpipa muak tu le Toi ii tamvei mama a sim bul Hadadezer a zawna lungdamko tu in ama in a tapa Joram paisak hi. Joram in khamh, ngunn, le taau taw a kivawt letsongte David puak hi. 11Tua te sia David kumpipa in a zawthal ngamte — Edom, Moab, Ammon, Philistia le Amalek pan a laak ngunn le khamhte taw biakna ah zak tu in aap khawm hi.
12A nu Zeruiah ahi Abishai in Ci Kuam ah Edom te zo in 18,000 that hi. #Ps 60 (Thulu) 13Ama in Edom ngamsung theampo ah ngalkap ngiaphualte saat in tua munah a teang mite David kumpipa khutnuai suak hi. Topa in David sia mun theampo ah ngalzosak hi.
14David in Israel ngam bup ukin, a mite a tawntungin a kilawm bang le thumaan thutang taw a kithupi vawt natu in vaihawmsak hi. 15Abishai ii suapui pa Joab sia ngalkaphonpi ukpa; Ahilud ii tapa Jehoshaphat sia thu theampo tepteena ukpa; 16Ahitub ii tapa Zadok le Abiathar ii tapa Ahimelech te in thiampi; Seraiah in zum thuzeakpi; 17Jehoiada ii tapa Benaiah sia David a cingte ukpa; tuaciang David kumpipa tapate in a kumpi sepna sungah a za lian te ahi uh hi.
Currently Selected:
1 Khangtaanghthu 18: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
