1 Khangtaanghthu 16
16
1Amate in Thuciamna Thingkuang a koi natu in David ii a saksa puanbuk sungah tua in koi uh hi. Tua zawkciang amate in Pathian tungah sangaw biakpiaknate le kipawlkhop biakpiaknate pia uh hi. 2David in sangaw biakpiaknate a man zawkciang Topa min taw mipite thupha pia in, 3an zongh a vekpi in hawmsak hi. Ama in Israel mite theampo pasal, numei khat sim anluum khat tek, sa em bek khat tek le sapitngawm tawm tek pia hi.
4David in Thuciamna Thingkuang mai ah lasakna le ama pokna taw Topa Israel te ii Pathian biakna ah lampui tu in Levi mite pawlkhat panmun pia hi. 5Asaph sia lampui in koi a, a hupa tu in Zechariah koi hi. Jeiel, Shemiramoth, Jehiel, Mattithiah, Eliab, Benaiah, Obed Edom le Jeiel te sia tengtongh tum tu in koi hi. Asaph sia daalkopsai tum tu pa hi a, 6thiampi nii ahi Benaiah le Jahaziel sia Thuciamna Thingkuang mai ah a huhun in lemle a tum tu te ahi hi. 7Tua hunin David in Asaph le a Levi mipuite Topa tungah pokna late sa tu in nasep pia masa hi.
Pokna La
(Psalms 105:1-15; 96:1-13; 106:1,47-48)
8 Topa tungah lungdamko vun,
ama ii letna thangsak vun;
ama ii sepsate minamte tungah son vun.
9 Topa tungah pokna lasa vun;
a lamdang a nasep sate son vun.
10Ama aa ih hi sia lungdam vun;
ama a biate theampo lungdam thinnuam tahen!
11Huna ngen tu in Topa zuan vun;
tatsat ngawlin ama bia vun.
12-13No Pathian ii naseampa
Jacob ii suan le paalte,
Pathian ii teal Israel ii suan le paalte awng,
Pathian ii nalamdang laknate le a thukhennate phawk vun.
14 Topa sia ih Pathian hi;
a thupiakte sia leitung bup atu hi.
15A tawntung a kip tu a vawt
Pathian ii thuciamna
16Abraham taw a vawt thuciamna,
Isaac tungah a kamciamna
mangil ngei heak vun. #Pian 12:7; Pian 26:3
17 Topa in Jacob taw
thuciamna khat vawt a,
a tawntung a kip tu khat ahi hi.
18Ama in, “Canaan ngam nang kong pia tu a,
nangma aituam neisa tu hi,” ci hi. #Pian 28:13
19Pathian ii mite tawm a,
Canaan ngam ah khualmi suak uh hi.
20Amate ngam khat pan ngam khat,
kumpi ngam khat pan kumpi ngam khat ah vak kawkoai uh hi.
21Ahizong Pathian in amate kuama in nengcipsak ngawl hi;
amate a dal tu in Pathian in kumpite hi bangin thupia hi:
22“Ka tealsa ka naseamte bangma law heak vun;
ka kamsaangte thutha heak vun.” #Pian 20:3-7
23Leitung bup awng,
Topa tungah lasa vun!
ama ii eite hong ngupna lungdamna thuphate ni simin thangsak vun.
24Minamte tungah a minthanna thangsak vun,
mite theampo tungah a nasep liante thangsak vun.
25 Topa sia lian a, nasia tak pok tu ahi hi;
ama sia pathiante theampo sangin patoai zawk tu ahi hi.
26A dang minam theampote ii
pathiante sia milim bekma hi a,
ahihang Topa in vantungte bitphua hi.
27Minthanna le vaangneina in ama kiim uumin,
a Biakinnpi vaangletna le lungdamna taw kidim hi.
28Leitung mi theampo awng
Topa pok vun,
a minthanna le a thahatna pok vun.
29 Topa ii minthanna pok vun;
biakpiakna khat kengin a Biakinnpi sungah pai vun.
Tua Thiangtho Pa a kilangh ciangin
a mai ah kun vun;
30leitung mi theampo awng a mai ah liingin om vun!
Leitung sia a kip a kho in kikoi a, kikhiin thei ngawl hi.
31Van le lei awng lungdam vun!
Topa sia kumpipa hi ci in minamte son vun.
32Tuipi awng, na sungah a om
nganhingte theampo taw hawk vun;
lote awng, na sungah a om
theampo taw lungdam vun!
33Leitung uk tu in Topa hong pai ciang,
thingtaam sung a om thingkungte lungdam in au tu hi.
34 Topa tungah lungdamko vun, banghang ziam cile ama pha hi;
ama ii itna in mong nei ngawl hi. #2 Khang 5:13; 7:3; Ezra 3:11; Ps 100:5; 106:1; 107:1; 118:1; 136:1; Jer 33:11
35Ama tungah, “Kote ii
Ngumpa Pathian awng, ko hong ngum ta'n;
kote hong khawmtua ta'n;
lungdam takin na min thiangtho kong pok thei natu in
minamte khut sung pan hong suatak ta'n,” ci vun.
36Israel te ii Pathian
Topa pok vun!
Tu le a tawntungin
ama pok vun!
Tuasia ciang mi theampo in, “Amen,” ci in Topa pok uh hi.
Jerusalem le Gibeon ah Biakpiakna
37David kumpipa in Asaph le a Levi mipuite Thuciamna Thingkuang a kikepna munah a kivawt biakpiakna sungah a uk tawntung tu in koi hi. Amate in ni khat zawk ni khat amate nasep tek tua munah seam tu uh hi. 38Amate sia Jeduthun ii tapa Obed Edom le ama bee le phung pan pasal 68 te in hu tu hi. Hosah le Obed Edom te sia kongcing ukte ahi hi.
39Ahizong thiampi Zadok le a thiampi seppuite sia Gibeon ah a om Topa biakpiakna munah a ukte ahi uh hi. 40Topa in Israel te tungah a piak thukham sungah a ki at bangin amate in zing sim, nitak sim sangaw biakpiaknate biaknatau tungah a pum bup halin pia tu uh hi. 41A mong nei ngawl Topa hong itna pokna la Topa tungah sa tu in Heman le Jeduthun te le a kitealtuam dangte zongh amate taw tua munah omkhawm uh hi. 42Pokna late a sak uh ciang a tum uh lemle, daalkopsai te le a dang tumthei vanhte Heman le Jeduthun zongh in uksak hi. Jeduthun ii bee le phungte sia kongcing ukte ahi hi.
43Tua zawkciang a kuama po a inn ah cia tek in, David zongh a innkuanpuite taw hun khat zangh khawm tu in cia hi.#2 Sa 6:19-20
Currently Selected:
1 Khangtaanghthu 16: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
