1 Khangtaanghthu 11
11
David sia Israel le Judah ii Kumpi suak
(2 Samuel 5:1-10)
1Israel mite theampo David omna Hebron ah pai in ama tungah “Ko sia nangma ii chi le na sa ka hi uh hi. 2Tu masia Saul ii kote kumpi a sep lai ngawngawn zonghin Israel mite nangma in ngalsimna ah na lampui a, a mite lampui tu le uk tu in Topa na Pathian in nang tungah kamciam hong pia zo hi,” ci uh hi. 3Tua ahikom, David kumpipa omna Hebron ah Israel lampuite theampo pai uh hi. Ama in amate taw Pathian mai ah a thiangtho kipawlna khat vawt hi, Samuel tungtawn a Topa ii kamciamsa om bangin amate in David sathau noai in Israel kumpi suaksak uh hi.
4David kumpipa le Israel mite theampo pai in Jerusalem khuapi sim uh hi. Tualai in Jerusalem khuapi sia Jebus kici a tua munah a teang masa Jebus te ma teang lai uh hi. #Jos 15:63; Thkte 1:21 5Jebus mite in David tungah, khuapi sungah tum zo ngeingawl tu ni hi ci uh hi, ahihang David in amate Zion kulh sia la a, tuasia “David ii Khuapi” ci in kiciamtee hi. 6David in, “Jebus mi khat a thatlum masa belpa ngalkaphonpi ukpa suak tu hi!” ci hi. A nu Zeruiah ahi Joab in ngalsimna ah lampui a, ama sia ngalkapmang suak hi. 7Tua kulh huang sungah David pai in teang ahikom tua sia “David ii Khuapi” kici hi. 8David in tua mual ii nisuana sang lei kidimna mun pan kipanin khuapi sa kik a, Joab in khuapi sungah puua tu a om lai teng puuapha kik hi. 9Vaanglianbelpa Topa in ompui ahikom David a thahat vaial hi.
David ii Ngalkap Minthangte
(2 Samuel 23:8-39)
10Hite in David ii ngalkap minthangte ahi uh hi. Amate in Israel mi a om lai teng taw kipawl in, Topa kamciamna omsa bangin, ama kumpi a sua natu in hu uh a, a kumpi ngam thahatsak uh hi.
11A masa belpa sia Hachmon bee le phung pan “Mihing Thumte” ii lampuipa Jashobeam ahi hi. Ama in a teipi taw a ngalte 300 sim a, sim khatin that siat hi. 12“Mihing Thumte” sung pan a minthang kik pa sia Ahoh bee le phung pan Dodo ii tapa Eleazar hi. 13Ama in Pas Dammim ngal kisimna ah David sang pan pangin Philistine te sim hi. Israel te taikeak tu a kipat laitakin ama mangtaang lo sungah om a, 14tuabangin ama le a mite sia lo lai ah dinmun la in Philistine te do uh hi. Topa in ama ngalzawna lianpi pia hi.
15Ni khat ni in Philistine ngalkapte Rephraim Kuam ah ngiaphual saatin a om laitak ngalkap lampui 30 sung pan thum sia Adullam suanghawng nai David omna suangpi khat ii kungah pai uh hi. 16Tua hun laitakin David sia kulh taw ki uum mualtung khat ah om a, Bethlehem khua sia Philistine te pawlkhat in la uh hi. 17David in inn sang ngai in, “Bethlehem kongpi hui tuikhuk panin ka dawn tu tui, khat in hong puak le paw uk na peu ing!” ci hi. 18Ngalkap minthang thumte pai in Philistine ngiaphual nawktan a tua tuikhuk pan tui tawm toai in David puak uh hi. Ahizong tua tui ama in dawn ngawl hi; Topa biakpiakna in bua a, 19“Hi tui ka ne ngei buatu hi! Tuasia a nuntakna a khaam, hi mite ii chi neak taw kibang tu hi!” ci hi. Tuabangin ama in tui neak tu nial hi. Hite sia a minthang ngalkap thumte ii ngalhan nasepte hi.
20Joab ii suapuipa Abishai sia, “A Minthang Sawmthumte” lampuipa hi. Ama in a teipi taw mihing 300 that a, “Sawmthumte” sungah a minthang suak hi. 21Ama, “Sawmthumte” sungah minthang belh a amate lampui suak hi, ahizong, “Mihing Thumte” minthan za in minthang ngawl hi.
22Kabzeel ah Jehoiada ii tapa Benaiah sia ngalkap minthang khat hi a; ama in ngalhan nasep tam mama seamin Moab te ngalhang mama nii zongh that hi. Khatvei vuuk taak ni khat in ama leidum sungah tuaksuk a tawpi khat that hi. 23Ama in tei lian mama khat a toai metre 2 vaal a saang mihing thatang lian Egypt te khat zongh that hi. Tua pa sia Benaiah in Egypt pa moltum taw simin a khut sung pan a teipi a suu zawkciang, tua tei taw ama that hi. 24Tuate sia Benaiah ii ngalhan nasepte hi a, ama “Sawmthum” sungah khat ahi hi. 25Ama sia “Sawmthum” sungah a mindok tuam khat hi a, ahizong “Mihing Thumte” za in minthang ngawl hi. David in ama sia ama a cingte a uk tu in koi hi.
26-47Hite sia a dang ngalkap mindok tuamte veu hi a:
Joab ii suapuipa Asahel
Bethlehem pan Dodo ii tapa Elhanan
Harod pan Shammoth
Pelet pan Helez
Tekoa pan Ikkesh ii tapa Ira
Anathoth pan Abiezer
Hushah pan Sibbecai
Ahoh pan Ilai
Netophah pan Maharai
Netophah pan Baanah ii tapa Heled
Benjamin ngam Gibeah pan Ribai ii tapa Ithai
Pirathon pan Benaiah
Gaash paam kuamte pan Hurai
Arbah pan Abiel
Bahurum pan Azmaveth
Shaalbon pan Eliahba
Gizon pan Hashem
Harar pan Shagee ii tapa Jonathan
Harar pan Sachar ii tapa Ahiam
Ur ii tapa Eliphal
Mecherah pan Hepher
Pelon pan Ahijah
Carmel pan Hezro
Ezbai ii tapa Naarai
Nathan suapuipa Joel
Hagri ii tapa Mibhar
Ammon pan Zelek
Beeroth pan Joab ii ngalhiam puapa Naharai
Jattir pan Ira le Gareb
Hit mi Uriah
Ahlai ii tapa Zabad
Shiza ii tapa Adina (ama sia Reuben nam pan a lampui khat hi in, ngalkap 30 nei hi.)
Maacah ii tapa Hanan
Mithan pan Joshaphat
Ashterah pan Uzzia
Aroer pan Hotham ii tapate, Shamma le Jeiel
Tiz pan Shimri ii tapate, Jediael le Joha
Mahavah pan Eliel
Elnaam ii tapate, Jeribai le Joshaviah
Moab pan Ithmah
Zobah pan Eliel, Obed le Jaasiel te ahi hi.
Currently Selected:
1 Khangtaanghthu 11: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
