मरकुस 7
7
भोवार औरौ नियम
(मत्ती 15:1-20)
1ऐकी दूसै फरीसी लोगौ कै मोडल़ी औरौ किछै यहूदी शास्त्री जू यरूशलेम शहर पौरैशै आए रौवै थिए, सैजै यीशु कै चोऊ ढौबौ कौठै हुवे। 2औरौ तिनुऐ तैसकै कुणजैई चैलै खै बिना हाथ धोए रोटी खांदै दैखै, जू यहूदी भोवारो कै हिसाब सै अशुध्द थियु। 3जिथु फरीसी लोगौ कै मोडल़ी औरौ सौबै यहूदी लोग रोटी खाणौ दै आगै हमैशा यहूदी भोवार कै हिसाब शै आपणै हाथ धोवों थिए। 4जोबै सै बोजारों शै घोरे आंव थिए, तौ खाणौ खाणै दै आगै यहूदी भोवार कै हिसाब शै आपी कै साफ कौरौ थिए; औरौ बुड़ेईको कै भोवारो की बौहिती बातौ मानौ थिए, जैशैखै छानै, औरौ लोटै, औरौ ताँबे कै बासणौ खै माजणे औरौ धोणे। 5इथकारिए तिनु फरीसी लोगै औरौ यहूदी शास्त्रीए तैसी कैईंदु पूछु, “तैरै चैलै किथु बुड़ेईको कै भोवारो पांदी ना चालौ, औरौ बिना हाथ धोऐबा रोटी खांव?” 6यीशुए तिनुखै बौल़ौ, “यशायाह साचा थिया जोबै तैणै तुऔं कपटियो कै बारै मुंजी पवित्र शास्त्र दै ठीक भविष्यवाणी कौरे राए; जैशै लैखै राखौ:
‘ऐजै लोग ओठो लैई तौ मैरा आदर कौरौ,
पौरौ तिनका मन मुं कैईंदा दूर औसौ।
7इनका आदर कौरणा मुखै मायनै ना राखौ,
जिथु ऐजै लोग आदमी कै बाणैयौंदी आज्ञा खै मैरी आज्ञा बोतायों शिखांव।’
8जिथु तुऐं पौरमेशवर कै आज्ञा खै टालेबा आदमियों कै भोवार खै मानौ।”
9औरौ यीशुए तिनुखै बौल़ौ, “तुऐं आपणै भोवार मानणौ कारिए, पौरमेशवर कै आज्ञा कै बौड़ै आछै ढंग शै अणशौणै कौर दैंव! 10मूसाए बौल़ै राए, ‘आपणै पिता औरौ माँ कै इज्जत कौरेया,’ औरौ ‘जू कुणिए बापू या माँ खै बुरु बौल़ौ, तैसी जौरुर मारै दिया जांदा।’ 11-12पौरौ तुऐं इथकै खिलाफ शिखांव जै कुणिए आपणै माँ-बापू खै बौल़ौ, ‘जू किछै मौदद तुऔं कै दैणै थी, सैजी मोदत मोऐं पौरमेशवर खै दैणौ कै शौं खाए राए, इथकारिए ऐबै सैजी मोदत पौरमेशवर खै चौढ़ाएयौंदे भैंट औसौ तोंवारै ना आथी। तोबै तुऐं तिनुखै बौल़ौ कै ऐबै माँ-बापू कै सेवा कौरणौ कै जौरुरत ना आथी।’ 13ऐशैखैई जिनु रिवाजो खै तुऐं लोगौ खै शिखाए राए, तिथकै हिसाब शै पौरमेशवर कै वचन कै औधिकार खै खत्म कौरे दैंव।”
आदमी खै अशुध्द कौरणौवाल़ी बातौ
14यीशुए लोगौ खै आपणै धोरे बोएदैबा तिनुखै बौल़ौ, “तुऐं सौबै मैरी शुणौ, औरौ सौमझौ। 15ऐशणी कुणजी चीज़ौ ना आथी जू बायरै दी आयौ आदमी कै भीतरै जांव औरौ सै आदमी कै अशुध्द कौरौ; पौरौ जू किछै आदमी कै भीतरै दी निकल़ौ, सैजी तैसीखै अशुध्द कौरौ। 16जिनु कुणिए मैरै बात शौणै लोए, सै ध्यान सै शोणेयो।”
17जोबै सै भीड़ौ कै धोरे दा घोरे कै हौटा, तौ तैसकै चैलै ऐसी उदारण कै बारै दो तैसी कैईंदु पूछु। 18तैणै तिनुखै बौल़ौ, “का तुऐं बै ऐशणै नासमझ औसौ? कै तुऐं ऐजै बात ना जाणौ कै जू खाणा आदमी कै भीतरै जांव, सै तैसी अशुध्द ना कौरे सौकौ? 19जिथु सै तैसकै मन दी ना जांव, पौरौ पेटो दु जांव, औरौ सण्डास शै बायरै निकल़ै जांव?” ऐजौ बौलेबा तैणै सौबी खाणौ की चीज़ौ खै शूची ठोहराई।
20तोबै तैणै बौल़ौ, “ऐजी बुरी चीज़ौ ही औसौ जू कोसी आदमी कै दिमाक शै बायरै निकल़ौ, ऐजी ही बातौ आदमी खै पौरमेशवर कै सामणै अशुध्द बाणौ।” 21जिथु आदमी कै दिमाको शै बुरै-बुरै विचार, गौलत तरीकै शै सौमबंध बौणाणा, चोरी कौरणा, हत्या कौरणा, 22नाजायज सौमबंध राखणै, लालच कौरणा, दुष्टता, नेंदैया, धौखा दैणा, लुचपन, बुरा बर्ताव, घमण्ड, औरौ मूर्खता की बातौ निकल़ौ। 23ऐजी सौब बुरी बातौ आदमी कै दिमाको पौरैशी निकल़ौ औरौ आदमी खै अशुध्द कौरौ।
सुरुफिनीकी देश कै बैटमाणिशौ का बिशवाश
(मत्ती 15:21-28)
24तोबै यीशु औरौ तैसकै चैलै गलील शै निकल़ैयो सूर औरौ सैदा शहरो दै ओऊवे; औरौ ऐकी घोरो दा हौटा, औरौ चांव थिया कै लोगौ कै पौता नै चालौ कै सै तिथी औसौ; पौरौ सौबियां पौता चालै गौआ। 25यीशु कै चौर्चा शौणैबा ऐक बैटमाणिश आए जिंयारै नानड़ै बैटी दी दुष्टआत्मा थी, सै तैसकै आदर दैणौ कारिए तैसकै लातो पांदी पौड़ै। 26ऐजै बैटमाणिश यूनान देश कै ना थी। ऐजै सुरुफिनीकी प्रदेश कै थी; औरौ तियैं यीशु कैईंदै बिन्ती कोरी, कै मैरै बैटी पौरैशै दुष्टआत्मा निकाल़ै दै। 27यीशुए तियौंखै पौरौखणौ कारिए बौल़ौ, “आगै मैरै नानड़िया खै खाणौं खायौ रोजणो दै जू तिनुऐ मांगै लौ, जिथुकै यहूदी लोगौ कै रोटी लोएबा कुते कै आगै फेरकाणै आछी ना आथी (यहूदी लोग सुंचौ थिए कै सै ओकी जाति कै लोगौ दै आछै औसौ, औरौ कौलोंई-कौलोंई तिनुकै आवारै कुते साए बौल़ौ थिए)।” 28तियैं तैसीखै जोवाब दिया, “ऐजै बात साची औसौ प्रभु; पौरौ कुते बै तौ नानड़िया की मैजौ मुल़ी रोटी कौ चूर-चार खाए पांव।” 29यीशुए तियौंखै बौल़ौ, “तुऐं बिशवाश लैई जोवाब दै राखा, तौलौंई मोऐं दुष्टआत्मा तैरै बैटी पौरैशै निकाल़ै दै, इथकारिए तू ऐबै घोरो खै जा।” 30तियैं आपणै घोरे आयौ दैखौ कै बाएटै मांजै पांदी लेटेयोंदे औसौ, औरौ दुष्टआत्मा निकल़ै गौए।
यीशु कै जायरै औरौ हकल़ा आदमी कै ठीक कौरणा
31तोबै यीशु औरौ तैसकै चैलै सूर शहर शै निकल़ैबा सैदा शहर दै जाऐबा दिकापुलिस इलाके शै हौयौ गलील झील कै किनारे पौऊंचै। 32तौ लोगै ऐक जायरै खै जू हकल़ा थिया, तैसकै धोरे लाएबा तैसी कैईंदै बिन्ती कौरे, कै आपणा हाथ तैसी पांदी राख कै सै ठीक हौए जांव। 33तोबै यीशुए तैसीखै भीड़ौ मुंजीदा ऐक ढौबौ निया, औरौ आपणै गोठै तैसकै कानो दै छोड़े, तिथकै बाद यीशुए आपणी गुठी पांदी थूक लोऊ औरौ तैसी आदमी कै जीभो खै छोए। 34औरौ स्वर्ग कै ढौबौ दैखैयो शुशकार भोरा, औरौ तैसी आदमी खै बौल़ौ, “इप्फतह!” यानी “खोले जा!” 35औरौ सैजा आदमी एकदम साफ-साफ शुणदा लागा, औरौ पोठाकरो बौलदा लागा। 36तोबै यीशुए लोगौ खै बौल़ौ इयौं बातौ कै बारै दै कोसी कैंई नै बौलेया; पौरौ जैतरो तैणै मोना कियु, तैतरो ही तिनुवै लोगौ कैंई बौतौऊं। 37औरौ लोग बैजाए ही हैरान हौयौ बौलदै लागै, “यीशुए जू किछै बै कियु सौब आछौ कियु; सै जायरै खै शुणणौ कै, औरौ गुंगै खै बौल़ाणौ कै तागत दैंव।”
Currently Selected:
मरकुस 7: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
