मरकुस 11
11
यीशु कै यरूशलेम शहर दो आणौ
(मत्ती 21:1-11; लूका 19:28-40; युहन्ना 12:12-19)
1जोबै यीशु औरौ तैसकै चैलै यरूशलेम शहर कै नेड़िक, जैतून धारो पांदी बैतफगे बैतनिय्याह गांव कै धोरे ओऊवे, तौ तैणै आपणै दो चैलै खै ऐजौ बौलेयौ छाड़ै। 2“सामणै कै गांव दै जांव, औरौ तिथै पोहचेबा तुऔं खै ऐक गाधडू बानेयोंदो भैटदौ, जिथपांदी ऐलो तौड़ी कौलोंई कुणिए बै ना बौठै रैली, तिथुखै खोलेबा मैरै धोरे लेयांव। 3जै कुणिए तुऔं कैईंदु पूछौ, ‘ऐजौ किथुखै कौरे लौ? तौ बौलेया, प्रभु खै इथकै जौरुरत औसौ,’ औरौ सै तावल़ो पाछु दैय दैंदा।” 4चैलै गांव दै हौटै, औरौ तिनुखै गाधडू खै ऐकी घोरो कै दवारो कै नेड़िक खुंडै दो बांनैयौंदो भैटौ, औरौ सै तिथुखै खोलदै लागै। 5तिनुमुंजी दै जू तिथै खौड़ै थिए, कुणिए-कुणिए बौलदै लागै, “ऐजौ का कौरे लौ गाधडू खै किथुखै खोले लो?” 6यीशुए चैलै खै जैशैखै बौल़ै राए थियु, तैशैखैई तिनुऐ तिनुकैईं बौल़ै दियु; तोबै लोगै गाधडू खै निणो दियु।
7औरौ तिनुऐ गाधडू खै यीशु कै धोरे लियोऊ औरौ तिनुऐ गाधडू कै पीठ पांदी आपणै खोटणो धोरे औरौ यीशु तिथपांदी बौठै गौआ। 8औरौ बौहितै लोगै यीशु कै आदर दैणौ कारिए बाटो पुंडे आपणै खोटणो बिछाए औरौ कैई लोगै खेतौ की डाल़ी पौरैशै पातै तौड़ेयो बिछाए दियै। 9औरौ किछै लोग यीशु कै आगै-आगै औरौ पौछौड़ियौ-पौछौड़ियौ चालै रौवै थिए। तोबै सौबै खुश हौयौ जोर शै बौल़ौ थिए, “पौरमेशवर कै बौड़ाए हौंव!#11:9 इथकै मूल भाषा दो होशाना लैखै राए। ऐजा ऐकी अरामी भाषा का शोब्द औसौ जिथका मतलब औसौ “आमुखै बौचा” पौरौ बाद दा इथका इस्तैमाल लोगौ कै स्वागत औरौ तारीफ कौरणौ कारिए हौंदा लागा। धन्य औसौ सैजा जू प्रभु कै औधिकार शै आंव। 10धन्य औसौ! अमारै बुड़ेईक राजा दाऊद का राज्य जू पौरमेशवर कै औधिकार दा आए रौआ; पौरमेशवर कै बौड़ाए हौंव जू स्वर्ग दा रौंव।”
11जोबै यीशु यरूशलेम शहर दा पोऊंचा, तिथकै बाद, सै यरूशलेम मन्दिरो दा हौटा। तिथै तैणै चोऊ ढौबौ सौबै चीज़ौ खै ध्यान सै दैखी औरौ तोबै तैणै शहर छोड़ दियु जिथुकै फिरै हौए गौ थियु। इथकारिए सै बारौ चैलै आरी बैतनिय्याह गांव कै हौटा।
अंजीर कै डाल़ो खै शराप दैणा
(मत्ती 21:18-19)
12दूजै दूसै जोबै सै बैतनिय्याह गांव दै निकल़ै तौ तैसीखै भूख लागै। 13औरौ यीशुए दूरकै दा ऐक अंजीर का हरा डाल़ दैखा औरौ डाल़ो कै नेड़िक हौटा, कै तिंदै किछै फोल़ भैट जांव। पौरौ पात छोडे़बा तिंदु किछै बै ना भैटी; जिथुखै तौलौ फोल़ का सौमय ना थी। 14तोबै यीशुए डाल़ो खै शराप दिया, “ऐबै ऐलो दै ऊबै ऐसी डाल़ो दै कौलोंई फोल़ ना लागदै।” औरौ तैसकै चैलै शौणै लौ थियु।
मन्दिरो पौरैशै व्यापारियों खै निकाल़णै
(मत्ती 21:12-17; लूका 19:45-48; युहन्ना 2:13-22)
15इथकै बाद यीशु औरौ तैसकै चैलै यरूशलेम शहर दै ओऊवे, औरौ सै यरूशलेम मन्दिरो दा हौटा; औरौ यीशु तिनु लोगौ खै बायरै निकाल़दा लागा, जू चीज़ौ औरौ गोरु कै बल़ि कारिए खोरिदणो औरौ बैचणो कै काम कौरौ थिए। तैणै लोगौ कै मेजो कै जू पौयसै बौदलौ#11:15 पौयसै बौदल़णौ वाल़ै व्यापारी थिये जू रोमी औरौ यूनानी सिक्कै कै बौदलौ थिये, जिथुकै रोमी औरौ यूनानी सिक्कै दै चित्र बौणैयौंदे हौंव थिये जिथकै यहूदियों कै हट थी। थिए, औरौ कबूतर बिकणौवाल़ै कै मेजो कै पोलटै दियै।
16औरौ तैणै लोगौ खै मन्दिरो कै आँगणो पौरैशै कोसी खै बै समान लाणौ औरौ निणो ना दी। 17औरौ तिनुखै उपदैश देएबा बौल़ौ, “पवित्र शास्त्र दो लैखै राए, कै मैरा मन्दिर सौबी देशो कै लोगौ कारिए प्रार्थना का घोर बौल़ै जांव। पौरौ तुऐं इथुखै डाकुओं लैई भोरेयोंदे गुफा कै जैशणौ बाणै राए।” 18ऐजौ बौलेबा मुख्य यहूदी पुरोहित औरौ यहूदी शास्त्री तैसीखै मारणौ का मौका जौंदै लागै कै तैसीखै मारै सौकौ पौरौ सै तैसिदै डौरौ थिए। जिथुकै जू किछै बै यीशुए शिखोऊ सैजी सौबै बातौ शौणैबा भीड़ौ कै लोग हैरान हौए जांव थिए। 19बैल़खै कै सौमय यीशु औरौ तैसकै चैलै बैतनिय्याह गांव दै तियौं राती सुतदे हौटै।
शुकै अंजीर कै डाल़ो शै शिक्षा
(मत्ती 21:20-22)
20ओकी दूसै झीशो यीशु औरौ तैसकै चैलै यरूशलेम शहर कै ढौबौ जांदै लागै रौवै थिए, तोबै तिनुऐ तैसी अंजीर कै डाल़ो खै जड़ दा ऊबा शोकेयौंदा दैखा। 21पतरस खै सैजै बात याद आए, औरौ तैणै यीशु कै बौल़ौ, “ओए रै गुरुजी, दैख धिबा! जू ऐजा अंजीरो का डाल़ औसौ जैसीखै तुऐं शराप दैय राए थिया, ऐबै शोकै गौआ।” 22यीशुए तैसीखै जोवाब दिया, “पौरमेशवर पांदी बिशवाश राखौ, कै तुऐं जू किछै मांगै राए सै तुऔं दैंदाए। 23हांव तुऔं कैंई साचौ बुलू कै जू कुणिए इयौं धारो खै बौल़ौ, ‘जै तू ओकशै जा, औरौ समुन्द्रो दो पौड़ै जा,’ औरौ आपणै मन दा शक ना कौरौ, पौरौ बिशवाश कौरौ तौ जू तुऐं मांगलै सै हौए जालो, औरौ पौरमेशवर तैसी कारिए ऐजौ कौरे दैंदा। 24इथकारिए हांव तुऔं खै बुलू, कै जू किछै तुऐं प्रार्थना कौरेयौ मांगलै तौ बिशवाश कौरेया कै पौरमेशवरे तोंवारै बिन्ती शौणै राए, तौ सै तुऔं खै जौरुर दैला।
25ऐशैकैई जोबै तुऐं प्रार्थना कौरणौ कै खौड़ै हौंव, तौ तोंवारै मन दै कोसी कारिए नफरत हौंव, तौ तैसीखै माफ कौरेया: इथकारिए पौरमेशवर जू तोंवारा पिता औसौ औरौ जू स्वर्ग दा रौंव तोंवारै पाप माफ कौरौ। 26(पौरौ जै तुऐं माफ नी कौरलै तौ तोंवारा पिता बै जू स्वर्गो दा औसौ, तोंवारै पाप माफ ना कौरदा)।”
यीशु कै औधिकार पांदी सवाल
(मत्ती 21:23-27; लूका 20:1-8)
27यीशु औरौ तैसकै चैलै यरूशलेम शहर दै आए, औरौ जोबै सै यरूशलेम मन्दिरो दा घोमै रौआ थिया तौ मुख्य यहूदी पुरोहित औरौ यहूदी शास्त्री औरौ बुड़ेईक तैसकै धोरे आयौ पूछदै लागै। 28तू ऐजै काम कोसी औधिकार शै कौरे? औरौ ऐजा औधिकार ताखै कुणै दैय राए कै तू ऐजै काम कौरे? 29यीशुए तिनुखै बौल़ौ, “हांव बै तुऔं कैईंदै ऐक बात पूछु; जै तुऐं मुखै जोवाब दैलै, तौ हांव तुऔं खै बौतौऊंबा कै ऐजै काम कोसी औधिकार शै कौरु। 30मुखै जोवाब दैव, जोबै यूहन्नाए लोगौ खै बपतिस्मा दिया, तौ तैसीखै ऐजा कौरणौ का औधिकार पौरमेशवरे दिया, या लोगै।” 31“तोबै सै आपी मुंजी चौर्चा कौरदै लागै कै जै आमै जोवाब दियु, ‘स्वर्गो कै ढौबौशै,’ तौ सै बौलला, ‘कै तुऐं तैसका बिशवाश किथुखै ना की?’ 32औरौ जै आमु बुलूबे, ‘ऐजा औधिकार आदमियों कै ढौबौशै,’ तौ लोग आमुखै पौरैशानी खौड़ै कौरलै, जिथुकै सौबै लोग मानौ थिए कै यूहन्ना बपतिस्मा दाता सौथीखै ही पौरमेशवर कै बातौ बौताणौवाल़ा थिया इथकारिए सै डौरे रौवै थिए।” 33तोबै तिनुऐ यीशु खै जोवाब दिया, “आमै ना जाणु।” यीशुए तिनुखै बौल़ौ, “हांव बै तुऔं खै ना बौतांदा कै ऐजै काम कोसी औधिकार शै कौरु।”
Currently Selected:
मरकुस 11: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
