मत्ती 22
22
बैयाव कै खाणौ का उदारण
(लूका 14:15-24)
1यीशु हौजौ तिनुखै उदारण देएयो बौलदा लागा। 2“स्वर्ग का राज्य ऐसी ऐकी उदारण साए औसौ, ऐक राजा जैणै आपणै बैटै का बैयाव बाणा। 3औरौ तैणै आपणै नोकरो खै भैजै, कै नेवता देएयोंदे लोगौ कै बैयाव खाणौ खै बोईदौ, पौरौ तिनुऐ आणौ ना चैंई। 4तोबै तैणै हौजौ ओकी नोकरो खै ऐजौ बौलेबा भैजा कै, ‘नेवता देएयोंदे लोगौ कै बौल़ौ मोऐं स्वाद खाणौ बौणाए राखौ, औरौ बौहितै बौड़ी दावत तैयार कौरे राए औरौ सौबै ठुँ तैयार औसौ; बैयाव कै खाणौ मुंजी आंव।’ 5पौरौ सै जाणैयौ बै अणजाण बौणै, औरौ कुणिए आपणै खेतौ कै, औरौ कुणिए आपणै धियाड़ी पांदी हौटै। 6औरौ किछै लोगै राजा कै नोकरो खै पाकड़ेयो तिनकी बैज्जती कौरी औरौ तिनु मारै दिए। 7जोबै राजाए ऐजौ शुणु तोबै तैसी गुस्सा ओऊवा, औरौ तैणै आपणै सैना भैजैयो तिनु हथियारों खै नाश कौरे दिए, औरौ तिनकै गांव खै फोकै दिए। 8तोबै तैणै आपणै दासो खै बौल़ौ, ‘बैयाव कौ खाणौ तौ तैयार औसौ, पौरौ नेवता देएयोंदे लोग लायक ना आथी। 9इथकारिए शोड़कै दै जाव, औरौ जैतरै लोग तुऔं खै भैटलै, सौबी खै बैयाव कि दावत दै बौएदैयौ लांव।’ 10तोबै तिनु नोकरे शोड़कै पुंडे जायौ, का बुरै, औरौ का आछै, जैतरै भैटी सौबी खै कौठै कौरे; औरौ बैयाव को घोर पोऊंणै लैई भोरै दियु।”
11“जोबै राजा पोऊंणै खै दैखदा भीतरै ओऊवा; तौ तैणै ऐक आदमी दैखा, जैणै बैयाव कै सोही ढंग कै खोटणो ना बाम्बै रैई थी। 12तैणै तैसी कैईंदु पूछु, ‘ओए रै दोस्त; तू बैयाव कै खोटणो बाम्बै बिना इथै किथुखै ओऊवा?’ पौरौ सै चुपी रोआ। 13तोबै राजाए सेवको खै बौल़ौ, ‘ऐसकै हाथ लात बानैबा ऐसीखै बायरै इनारै दा राखै दो, तिथै सिरफ रुणु औरौ दांद पीशणो हौंदौ।’ 14ऐशैखैई जू इबी पाछलै औसौ सै औगौड़ियौ कौरे जांदै, औरौ जू आपी खै औगौड़ियौ सौमझौ सै पाछलै कौरे जांदै।”
महाराजा (कैसर) कै मामला दैणा
(मर 12:13-17; लूका 20:20-26)
15तोबै फरीसी लोगै जाऐबा आपी मुंजी बिचार कौरा, कै यीशु खै तैसकी बातौ दा कैशैखै फोशांई। 16पौरौ तिनुऐ आपणै चैलै खै हेरोदियों कै साथी तैसकै धोरे ऐजौ बौलदा भैजा, “ओए रै गुरुजी, आमै जाणुए, कै तू साचा औसौ, औरौ कोसी कै पोरवा ना कौरे कै लोग मुखै का बौलल़ै; औरौ पौरमेशवर कै बाट सोच्चाई शै शिखांए। जिथुकै तू आदमी कै मुं दैखैयो बातौ ना कौरे। 17इथकारिए तू आमु बोता तू का सौमझै? का रोम कै महाराजा (कैसर) खै मूसा कै कानून कै हिसाब सै आमुखै कर दैणौ चैंई या ना दैणौ चैंई?” 18यीशुए तिनकै दुष्टता जाणैयौ बौल़ौ, “ओए रै कपटियो, तुऐं मुखै किथुखै पोरखौ? 19रोम का सिका मुखै दिखाव।” तोबै तिनुऐ तैसकै धोरे ऐक चांदी का सिका लियोऊवा, जू रोम देश का सिका थिया, जिथकै धियाड़ी ऐकी दूसौ कै बोराबर थी। 20तैणै तिनु कैईंदु पूछु, “इथपांदी छाप औरौ नांव कोसको औसौ?” 21तिनुऐ तैसीखै बौल़ौ, “महाराजा (कैसर) का।” तोबै यीशुए तिनुखै बौल़ौ, “जू महाराजा कौ औसौ, सैजौ महाराजा खै दैंव; औरौ जू पौरमेशवर कौ औसौ, सैजौ पौरमेशवर खै दैंव।” 22इथु शौणैबा सै हैरान हौए गौवै, औरौ तैसी छोडे़बा हौटै गौवै।
मौरेयौंदे का जियुंदी हौणौ का सवाल
(मर 12:18-27; लूका 20:27-40)
23तैसी दूसै सदूकी लोग जू बौल़ौ थिए की मौरेयौंदे का जियुंदी हौणा आथी नै, यीशु कै धोरे आए, औरौ तैसी कैईंदु पूछु। 24“ओए रै गुरुजी, मूसाए बौल़ै राए थियु, कै जै कुणिए बिना ओलादै कै मौरे जांव, तौ तैसका भाई तैसकै घोरवाल़ी आरी बैयाव कौरेयौ आपणै भाईड़ी कै ओलाद पौयदा कौरे सौकौ। 25ऐबै अमारै कागे सात भाई थिए; आगला बैयाव बाणैयो मौरे गौआ; औरौ ओलाद ना हौणौ कै बौजैह शै आपणै घोरवाल़ी खै आपणै भाई कारिए छोड़े दै। 26ऐशैखैई दूजै औरौ तिजै बै ऐशैकैई कौरौ, औरौ सात भाई बेओलाद मौरे गौवै। 27सौबी कै बाद सैजी बैटमाणिश बै मौरे गौए। 28ऐबै, आमुखै बोता जै मौरेयौंदे कै जियुंदी हौणौ पांदी सैजी विधवा बैटमाणिश, जू साती भाईड़ीआरी बियाए राए थै, सै तिनुमुंजी दै कोसके घोरवाल़ी हौन्दै?” 29यीशुए तिनुखै जोवाब दिया, “तुऐं गौलत औसौ जिथु तुऐं पवित्र शास्त्र औरौ पौरमेशवर कै अनौखी शौकतै कै ना जाणौ। 30जिथु मौरेयौंदे कै जियुंदी हौणौ पांदी सै बैयाव ना कौरदै, औरौ ना तिनुमुंजी बियाव हौन्दै; पौरौ स्वर्ग दै रौणौवाल़ै स्वर्गदूतौ कै जैशणै हौन्दै। 31पौरौ मौरेयौंदे कै जियुंदी हौणौ कै बारै मुंजी का तुऐं ऐजा वचन ना पौड़ै रैई जू पौरमेशवरे तुऔं बौल़ै राए। 32‘कै हांव तैरै पुराणिया अब्राहम, इसहाक, औरौ याकूब का पौरमेशवर औसौ।’ जू मौरेयौंदे का ना आथी, पौरौ जियुंदै का पौरमेशवर औसौ।” 33इथु शौणैबा लोग यीशु कै उपदैश लैई हैरान हौए गौवै।
सौबी दै बौड़ी आज्ञा
(मर 12:28-34; लूका 10:25-28)
34जोबै फरीसी लोगै शुणु, कै यीशुए जवाब देएबा सदूकी लोगौ को मुँह बोन्द कौरे दियु, तौ सै कौठै होवे। 35औरौ तिनुमुंजी दै ऐक यहूदी शास्त्र कै ऐकी ज्ञानीए तैसी पौरखणौ कारिए ओऊवा औरौ तैसी कैईंदु पूछु। 36“ओए रै गुरुजी मूसा कै कानून मुंजीदै कुणजै आज्ञा बौड़ै औसौ?” 37तैणै तैसीखै बौल़ौ, “तू पौरमेशवर आपणै प्रभु आरी आपणै सारै मन शै औरौ आपणै सारै प्राण शै औरौ आपणी सारी बुध्दि शै प्यार राखैया। 38बौड़ी औरौ मुख्य आज्ञा तौ ऐजै औसौ। 39औरौ तियौंई साए ऐजै दूजै बै औसौ, कै तू आपणै पड़ोसी आरी तैशणा प्यार कौर जैशणा आपिआरी कौरे। 40ऐजी दो आज्ञा सौबै मूसा कै कानून औरौ पौरमेशवर कै बातौ बौताणौवाल़ै का आधार औसौ।”
मसीह दाऊद का बैटा या दाऊद का प्रभु औसौ?
(मर 12:35-37; लूका 20:41-44)
41जौल़ौ फरीसी लोग कौठै थिए, तौ यीशुए तिनु कैईंदु पूछु, 42“कै मसीह कै बारै मुंजी तुऐं का सुंचौ? सै कोसका बैटा औसौ?” तिनुऐ तैसीखै बौल़ौ, “राजा दाऊद का।” 43यीशुए तिनु कैईंदु पूछु, “तौ दाऊद पवित्र आत्मा दै हौयौ तैसीखै प्रभु किथुखै बौल़ौ? 44‘की प्रभुए मैरै प्रभु खै बौल़ौ; मैरै सोऐं ढौबौ खै बौठ, जांव तौड़ी हांव तैरै बौयरी कै हराए ना दियु।’ 45जोबै राजा दाऊद तैसीखै प्रभु बौल़ौ, तौ सै तैसका बैटा कैशै बौणा?” 46कुणिए बै तैसकै जवाब नै दैय सौकी; पौरौ तैसी दूसौ शै कोसी कै बै हौजौ तैसीयादै किछै पूछणो कै हिम्मत ना होई।
Currently Selected:
मत्ती 22: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
