लूका 23
23
पिलातुस दवारा यीशु शै सवाल
(मत्ती 27:1-2,11-14; मर 15:1-5; युहन्ना 18:28-38)
1तोबै सारी सभा कै लोग बिज़यो यीशु कै राज्यपाल पिलातुस कै धोरे लोऐ गौवै।
2औरौ सैजै ऐजौ बौलेयौ तैसी पांदी दोष लान्दै लागै, “आमुए ऐसी लोगौ कै बोयकांदे बैई औरौ रोम कै महाराजा कै मामला दैणौ शै मोना कौरदै बैई औरौ आपी खै मसीह, राजा बौलदै बैई बै शौणै राए।” 3राज्यपाल पिलातुसे तैसीयांदो पूछु, “का तू यहूदी लोगौ का राजा औसौ?” यीशुए तैसीखै जोवाब दिया, “तुऐं आपी ही बौल़ै लो।” 4तोबै राज्यपाल पिलातुसे मुख्य यहूदी पुरोहितो औरौ लोगौ कै बौल़ौ, “हांव ऐसी आदमी दा किछै बै दोष ना पोऊँ।” 5पौरौ सैजै हौजौ बै जोर शै बौलदै लागै, “ऐजा गलील जिले शै लोएबा इथै तौड़ी सौबै यहूदिया प्रदेश कै सौबी लोगौ कै बीच आपणै उपदैश कै दवारा दंगे कै बौजैह बौणै रौआ। ऐणै गलील जिले दो ऐजौ शुरु कौरौ औरौ ऐबै इथै आए गौआ।”
6ऐजौ शोणेयो राज्यपाल पिलातुसे पूछु, “का ऐजा आदमी गलील जिले का औसौ?” 7औरौ ऐजौ जाणैयौ कै यीशु तैसी जिले का औसौ जिथै राजा हेरोदेसे राज कौरे लौआ। तैसी हेरोदेस कै धोरे छाड़ै दिया, जिथुकै तोलो सै बै यरूशलेम शहर दा थिया।
यीशु कै हेरोदेस राजा कै धोरे निणा
8राजा हेरोदेस यीशु कै दैखैयो बौहुता खुशी हौआ, जिथुकै सै बौहितै दूसौ दा उंडा तैसीकै देखणा चांव थिया: इथकारिए कै तैसकै बारै मुंजी शौणै राए थियु, औरौ यीशु कै किछै चौमत्कार कै काम कौरदै बैई दैखणौ कै आशा राखौ थिया। 9सै यीशु कैईंदी बोरिशी बातौ पूछदा रौआ, पौरौ यीशुए राजा हेरोदेस कै किछै बै जोवाब ना दी। 10औरौ मुख्य यहूदी पुरोहित औरौ यहूदी शास्त्री खौड़ै हौयौ जोर दैयौ तैसी पांदी दोष लान्दै रौवै। 11तोबै राजा हेरोदेस आपणै सिपाहियो कै साथै तैसकी बैज्जती कौरेयौ तैसकै ठाटै उड़ाएयों, औरौ शाही भड़कीले खोटणो बाम्बायो तैसी पिलातुस कै धोरे पाछु छाड़ै दिया। 12तैसी सौमय तौड़ी राज्यपाल पिलातुस औरौ राजा हेरोदेस ऐकी दूजै कै दुशमन थिए, पौरौ तैसी दूसै सैजै दोस्त बौण गौए।
पिलातुसे यीशु कै मारणौ का दण्ड दिया
(मत्ती 27:15-26; मर 15:6-15; युहन्ना 18:39-19:16)
13राज्यपाल पिलातुसे मुख्य यहूदी पुरोहितो औरौ ठोगड़े औरौ लोगौ कै बोयदयो तिनु बौल़ौ, 14“तुऐं ऐसी आदमी कै मैरै धोरे लियोऊवा औरौ बौल़ौ कै ऐजा दंगा कौरवाणौ कारिए लोगौ कै बेहकांव थिया। पौरौ मोऐं तोंवारै सामणै ऐसीकै पोरखा पौरौ जिनु बातौ का तुऐं ऐसी पांदी दोष लौआ, इनु बातौ कै बारै मुंजी मोऐं ऐसी दा किछै बै दोष ना पाए रैई। 15राजा हेरोदेस बै ऐसी दोषी ना पैई, इथकारिए तैणै यीशु कै अमारै धोरे पाछु छाड़ै दिया: औरौ दैखौ, ऐसी आदमीए मौरणौ कै सौजा कै लायक किछै बै गौलत ना कौरे रैई। 16इथकारिए हांव ऐसी कौड़ै शै पीटायो छोड़े दियु।”
17राज्यपाल पिलातुस फसह कै तैयार कै सौमय पांदी यहूदी लोगौ कारिए ऐकी कैदी कै छोड़े दैंव थिया। 18तोबै सौबै लोग मिलैयौ लैरौ मारेयों बौल़ौ, “ऐसका काम तमाम कौर दैव, औरौ आमु कारिए बरअब्बा कै आज़ाद कौरे दैव।” 19बरअब्बा कोसी दंगे की बौजैह शै जू नोगरो दो हौए रौए थियु, औरौ हत्या की बौजैह शै कोयद खाने दा थिया। 20पौरौ राज्यपाल पिलातुसे यीशु कै छौड़णौ कै इछा सै लोगौ कै हौजौ सौमझौऊवे। 21पौरौ तिनुऐ लैरौ मारेयों बौल़ौ, “यीशु खै क्रूसो पांदी किलियों खत्म कौरौ।” 22तैणै तिजाल़ियों तिनुखै बौल़ौ, “किथुखै, ऐणै का बुरु कौरे राखौ? मोऐं ऐसी दी हत्या कै सौजा कै लायक किछै बै बात ना पैई! इथकारिए हांव ऐसी कौड़ै शै पीटाएयों छोड़े दियु।” 23पौरौ सै लेलयाए लैलियायो पौछौड़ियौ पौड़ै गौवै, कै ऐसी क्रूसो पांदी किलियों खत्म कौरौ, औरौ तिनकौ लैरौ मारणौ बैजाए बौड़ै गौ। 24तोबै राज्यपाल पिलातुसे आज्ञा दै, कै इनकै मांग पूरै कौरौ। 25औरौ तैणै बरअब्बा खै जैसी दंगे औरौ हत्या की बौजैह शै ज़ेलो पुंडा डाकै राए थिया, औरौ जैसी सै मांगौ थिए, छोड़े दिया; औरौ यीशु कै तिनकै मोरजी कै हिसाब शै सौंपै दिया।
यीशु का क्रूसो पांदी चौढ़ाया जाणा
(मत्ती 27:32-44; मर 15:21-32; युहन्ना 19:17-19)
26जोबै सिपाहीए यीशु कै नी लोआ थिया, तौ तिनुऐ शमौन नांव कै ऐकी आदमी कै जू कुरेन शहर का थिया, सै गांव पौरैशा आन्दा लागै रौआ थिया, पाकड़ेयौ तैसी पांदी क्रूस लादै दियु कै सै क्रूस कै यीशु कै पौछौड़ियौ-पौछौड़ियौ लौए जांव।
27लोगौ कै बौड़ै भीड़ तैसकै पौछौड़ियौ चालदै लागै: औरौ तिनुआरी बोरिशी बैटमाणिशौ बै थी, जू तैसी कारिए छाती पीटैयो रुओं थी। 28यीशुए तिनकै ढौबौ फेरेयो बौल़ौ, “ओए रै यरूशलेम शहर की बैटमाणिशौ, मुं कारिए नी रौया; पौरौ आपी कै औरौ आपणै नानड़िया कारिए जू किछै हौणौवाल़ौ औसौ तिथकी बौजैह शै रौया। 29जिथुकै सैजै पीड़ो कै दूस आन्दै लागै रौवै जिथमुंजी लोग बौलदै, ‘धन्य औसौ सैजी बैटमाणिशौ जिनकै कौलोंई नानड़िया नी थी, जिनुवै कौलोंई नानड़िया कै जन्म ना दी, जिनुऐ कौलोंई तिनु दूध ना पियैई।’
30तैसी सौमय लोग
‘धारो शै बौलदै, कै आमु पांदी पौड़ौ,
औरौ धालै कै बौलदै कै आमु दबाए दैव।’
31जै धरमी आदमी कै साथै ऐशै हौंव, तौ सुंचौ कै तिनु लोगौ कै साथै का हौंदौ जू इयौं सौजा पाणौ कै लायक औसौ।”
32सिपाही यीशु कै साथै तिनु दु आदमी कै बै सौजा दैणौ कारिए साथै लोए गौवै जू कुकर्मी थिए।
33जोबै सैजै तैसी ठाँव पांदी जिथु खोपड़ी कै जौगैह बौल़ौ तिथै पौऊंचै, तौ तिनुऐ तिथै यीशु औरौ तिनु कुकर्मी खै बै, ऐकी कै यीशु कै सोऐं ढौबौ औरौ दूजै कै डैरै ढौबौ क्रूसो पांदी चौढ़ाए। 34तोबै यीशुए बौल़ौ, “ओए रै बापू इनु माफ कौर ऐजै ना जाणौ कै ऐजौ का कौरे लो?” औरौ तिनुऐ चिट्ठी पायौ, तैसकै खोटणो आपी मुंजी बान्डै दिए।
35लोगै खौड़ै-खौड़ै दैख लौ थियु, औरौ ठोगड़े बै ठाटा उड़ाएयो ऐजौ बौल़ौ थिए, “ऐणै ओकी कै बौचाए, जै ऐजा पौरमेशवर का मसीह औसौ, औरौ तैसका चोणेयौंदा औसौ, तौ आपी कै बौचाए पांदा।” 36सैनिक बै नेड़िक आयौ औरौ खाटे अंगूरो का रस दैयौ तैसका ठाटा पाड़ैयो बौल़ै लौ थियु, 37“जै तू यहूदियों का राजा औसौ, तौ आपी खै बौचा।” 38औरौ यीशु कै मुंडो कै ऊबै तौकती किलियों लाए दै जिथपांदी लैखै राए थियु कै, “ऐजा यहूदी लोगौ का राजा औसौ।”
क्रूसो पांदी मन फिराणौ वाल़ा कुकर्मी
39जू तिथै कुकर्मी लोटकाए राए थिए, तिनु मुंजीदा ऐकीए तैसकै नेंदैया कौरेयौ बौल़ौ, “का तू मसीह ना आथी? तौ तू आपी खै औरौ आमु कै बौचाए पा।” 40इथपांदी ओकीए तैसी डांटैयौ बौल़ौ, “का तू पौरमेशवर दा बै ना डौरे? तुऐं बै तौ सैजै सौजा पाए लोए। 41औरौ आमुए तौ न्याय कै हिसाब शै सौजा पाए लौए, जिथुकै आमुए आपणै कामौ कै सोही फोल़ पाए लौआ; पौरौ ऐणै तौ कुणजाई बै गौलत काम ना कौरे रैई।” 42तोबै तैणै बौल़ौ, “ओए रै यीशु जोबै तू ऐक राजा कै साए आपणै राज्य दा आए तौ मुखै बै याद राखैया।” 43यीशुए तैसी बौल़ौ, “हांव ताखै साचौ बुलू कै ऐलोई तू मैरै साथै स्वर्ग दा हौंदा।”
यीशु का प्राण छोड़णा
(मत्ती 27:45-56; मर 15:33-41; युहन्ना 19:28-30)
44औरौ लमसम दुफारियौ कै बारौ बोजे शै ती बोजे तौड़ी तैसी सारै देशो दौ इनारौ छाएयौंदौ रौ। 45औरौ सुरजो को पेयाशो आगु हौटौ, औरौ सैजा मोटा पोरदा जू यरूशलेम मन्दिर दा टांगेयोंदा थिया, बीचो दा फाटै गौआ। 46औरौ यीशुए बौड़ै जोर शै पुकारेयौ बौल़ौ, “ओए रै पिता हांव आपणी आत्मा तैरै हाथौ दै दियु।” औरौ ऐजौ बौलेयौ यीशुए आपणै प्राण छोड़े दिए।
47सूबेदारे जू किछै हौए रौ थियु दैखैबा पौरमेशवर की बौड़ाए कौरे, औरौ बौल़ौ, “जौरुर ऐजा आदमी धरमी थिया।” 48औरौ भीड़ जू ऐजौ दैखणौ खै कौठै हौए रोए थै, ऐसी घोटना खै दैखैयो सैजै बैजाए दुखी हौयौ छाती पिटैयो आपणै घौरौ कै पाछु हौटै गौवै।
49औरौ तैसकै सौबै दोस्त औरौ जू बैटमाणिशौ गलील जिले शै तैसकै साथै आए रौए थी, दूर खौड़ै हौयौ जू किछै हौए रौ थियु, दैखै लौ थियु।
अरमतियाह का यूसुफ कै दवारा यीशु कै दफनाना
(मत्ती 27:57-61; मर 15:42-47; युहन्ना 19:38-42)
50तिथै यूसुफ नांव का ऐक महासभा का ऐक सदस्य थिया, जू भला औरौ धरमी मर्द थिया। 51औरौ सै तिनकै इयौं योजना औरौ ऐसी कामौ लैई खुश नै थी। सै यहूदिया प्रदेश कै नोगरो अरिमतियाह शहर का रौणौवाल़ा थिया। औरौ पौरमेशवर कै राज्य कै आणौ कै ठोल़नाए कौरे लौए थै। 52तैणै राज्यपाल पिलातुस कै धोरे जाऐबा यीशु की लाश मांगै। 53औरौ यीशु का शोरीर उतारेयो मलमल कै चादरी दा लोपेटा, औरौ ऐकी कब्रो दा जू चट्टान पांदी खोणे राए थै राखा, औरौ जिथ पुंडे कौलोंई बै कोसी कै लाश ना राखै रैई थी। 54सैजौ दूस शुको को दूस थियु, औरौ विशांव कौ दूस शुरु हौणौवाल़ौ थियु।
55औरौ तिनु बैटमाणिशौ कै जू यीशु कै साथै गलील जिले पौरैशी आए रौए थी, तिनुऐ पौछौड़ियौ-पौछौड़ियौ जाऐबा तियौं कब्रो कै दैखै औरौ ऐजौ बै कै तैसकै लाश कुकै राखै राए। 56औरौ आपणै घोरो कै पाछु जाऐबा खुशबू वाल़ी चीज़ौ औरौ यीशु कै शोरीरो पांदी लाणौ कारिए इत्र तैयार कियु, औरौ विशांव कै दूसै तिनुऐ मूसा कै कानून कै हिसाब शै आराम कौरा।
Currently Selected:
लूका 23: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
