यूहन्ना 11
11
लाजर कै मौत
1बैतनिय्याह गांव दा लाजर नांव का ऐक आदमी बीमार थिया। मरियम औरौ मार्था तैसकै दीदी थै। 2ऐजै सैजै मरियम थी जियैं बाद मै प्रभु कै लातो पांदी इत्र रितायौ खै तैसकै लातो खै आपणै बाल़ो लैई गौशै राए थिए, तियौंका भाई लाजर बीमार थिया। 3तोबै तैसकै दीदीए तैसीकै बैवरा दिया, “ओए रै प्रभु दैख जैसीखै तू प्यार कौरे सै बीमार औसौ।” 4ऐजौ शोणेयो खै यीशुए बौल़ौ, “इयौं बीमारी का अन्त मौत ना आथी पौरौ पौरमेशवर कै महिमा कारिए औसौ, कै ऐसकै दवारा मुं पौरमेशवर कै बैटै कै महिमा हौंव।”
5यीशु मार्था औरौ तियौंकै बोईणी आरी औरौ लाजर आरी प्यार राखौ थिया। 6पौरौ जोबै तैणै शुणौ कै लाजर बीमार औसौ, तौ जैसी जौगैह पांदी सै थिया, तिथै दो दूस हौजौ रौकै गौआ। 7दु दूसौ कै बाद यीशुए आपणै चैलै खै बौल़ौ, “आव, आमै यहूदिया प्रदेश कै ऐकी बैतनिय्याह गांव कै जोऊंबे।” 8चैलै तैसीखै बौल़ौ, “ओए रै गुरुजी, इबी तौ यहूदी नेता ताखै पाथरो लैई मार दैणा चांव थिए, औरौ का तू हौजौ बै तिथै जाणौ चांए?” 9यीशुए जवाब दिया, “का दूसौ कै बारौ घांटे ना हौंव? जै कुणिए दूसौ कै हांडो तौ ठोकर ना खांव, जिथुखै इयौं दुनिया कौ पेयाशो मतलब सुरज कै दैखौए। 10पौरौ जै कुणिए रातै हांडो तौ ठोकर खांव, जिथुखै तैसीकैईं पेयाशो ना आथी।”
11तैणै ऐजी बातौ बुली, औरौ तिथकै बाद तिनुखै बौलदा लागा, “अमारा दोस्त लाजर सोतै गौआ, पौरौ हांव तैसी बिजाल़दा जांदा लागै रौआ।” 12तोबै चैलै तैसीखै बौल़ौ, “ओए रै प्रभु, जै सै सोतै गौआ तौ सै ठीक हौए जांदा।” 13यीशुए ऐजै बात तैसकै मौत कै बारै मुंजी बौल़ै लोऐ थै। पौरौ तिनुऐ सौमझौ कै तैणै नींदो मुंजी सोतै जाणौ कै बारै मुंजी बौल़ै लो। 14तोबै यीशुए तिनुखै साफ बौल़ै दियु, “लाजर मौरे गौआ। 15औरौ मुखै खुशी औसौ कै हांव तैसकै साथै नी थी। ऐजौ तोंवारै फायदै कारिए थियु। जिथलैई तुऐं बिशवाश कौरौ। पौरौ ऐबै आव, आमै तैसकै धोरे जोऊंबे।” 16तोबै थोमाऐ जैसी दिदुमुस बै बौल़ौए, आपणै साथौ कै चैलै कै बौल़ौ, “आव आमै बै तैसकै साथै मौरणौ कै जोऊंबे।”
यीशु ही मौरेयो जियुंदा हौणा औरौ जिन्दगी औसौ
17जोबै यीशु बैतनिय्याह गांव दा ओऊवा, औरौ तैसीकै पौता चाला कै चार दूस आगै ही लाजर कै दबाए राए थिया। 18बैतनिय्याह गांव यरूशलेम शहर कै नेड़िक किछै तीन किलोमीटर शै कम की दूरी पांदी थिया। 19औरौ भौरिशै यहूदी लोग मार्था औरौ मरियम खै धोरे तियौंखै भाई कै मौत कै बारै मुंजी ढेट दैणौ कारिए आए रौवै थिए। 20जोबै मार्थाए यीशु कै आणौ का समाचार शुणा तौ तैसीखै भैटिणौ कारिए हौटै गौए, पौरौ मरियम घोरी बोठेयोंदै रौए।
21मार्थाए यीशु खै बौल़ौ, “ओए रै, प्रभु जै तू इथै हौंदा तौ मैरै भाई कै मौत नी हौंदी। 22पौरौ ऐबै बै हांव जाणुए, कै जू किछै तू पौरमेशवर कैईंदु मांगल़ा पौरमेशवर ताखै दैन्दाए।” 23यीशुए तियौंखै बौल़ौ, “तैरा भाई हौजौ जियुंदी हौंदा।” 24मार्थाए तैसी बौल़ौ, “हांव जाणुए, कै न्याय कै दूसै जोबै सौबवे मौरेयौंदे मुंजीदै जियुंदी हौए जालै, तैसी दूसै लाजर बै होटेयो जियुंदी हौए जांदा।” 25यीशुए तियौंखै बौल़ौ, “हांव सैजा औसौ जू मौरेयौंदे लोगौ कै जिन्दगी दै पाछु लोऊ, औरौ हांव जीवन औसौ। इथकारिए जू कुणिए मुं पांदी बिशवाश कौरौ, जै सै मौरे बै जाला, तौ बै जियुंदी रौंदा। 26औरौ जू मुं पांदी बिशवाश कौरेयौ जियुंदै औसौ, सै सौदा काल़ तौड़ी ना मौरदै। का तू इयौं बातौ पांदी बिशवाश कौरे?” 27मार्थाए तैसीखै बौल़ौ, “हां ओए रै प्रभु, हांव बिशवाश कौरु, कै पौरमेशवर का बैटा मसीह जू दुनिया पांदी आणौवाल़ा थिया, सै तू ही औसौ।”
लाजर कै जिंदा कौरणा
28ऐजौ बौलेयौ खै मार्था आपणै घोरे हौटै गौए, औरौ आपणै बोईण मरियम खै चुपकै शै बौएदैयौ बौल़ौ, “गुरु इथी औसौ, औरौ ताखै बौएदै लोए।” 29ऐजौ शोणेयो मरियम तावल़ी बिज़यो यीशु कै धोरे हौटै। 30यीशु इबी गांव दा बायरै थिया, औरौ तियौं जौगैह पांदी थिया जिथै मार्था तैसी भैटी रौए थै। 31तोबै जू यहूदी लोग मरियम कै साथै घोरे थिए, औरौ तियौं ढेट दैय लोए थी। जोबै तिनुऐ ऐजौ दैखौ कै मरियम तावल़ै ऊबै बिज़यो बायरै जांदै लागै रौए तौ तिनुऐ ऐजौ जाणौ कै सै कब्रो पांदी रुंदै हौटै, औरौ तियौंकै पाछैदै हौटै गौवै।
32जोबै मरियम तिथै पौंचै जिथै यीशु थिया तौ तैसी दैखैयो कै ही सै यीशु कै लातो पांदी पौड़ेयौ कै बौलदै लागै, “ओए रै प्रभु, जै तू इथै हौंदा तौ मैरा भाई नी मौरदा।” 33जोबै यीशुए मरियम कै औरौ तिनु यहूदी लोगौ खै जू तियौंकै साथै आए रौवै थिए दैखै। तैणै शुशकार भोरै, औरौ बौड़ै दुख कै साथै तिनुवांदो पूछु, 34“तुऐं तैसी कुकै दबाए राए?” तिनुऐ तैसी बौल़ौ, “ओए रै प्रभु, चालैयौ खै दैख पा।” 35यीशु आशु बोवायो रुवा। 36तोबै यहूदी लोग बौलदै लागै, “दैखौ यीशु लाजर खै कैतरा प्यार कौरौ थिया।” 37पौरौ तिनुमुंजी दै किछै लोगै बौल़ौ, “ऐणै तौ तैसी आन्धै आदमी की आखी ठीक कौरी, ऐजा लाजर कै मौरणौ शै बौचाए सौकौ थिया?”
38यीशुए हौजौ शुशकार भोरै, औरौ बौड़ै दुख कै साथै कब्र पांदी ओऊवा, सैजै क्रब ऐक औड़ार थियु, औरौ जिथकै दवारो पांदी ऐक पाथर राखै राए थिया। 39यीशुए बौल़ौ, “पाथर कै ऊबा टिपो।” लाजर कै बोईण मार्था यीशु खै बौलदै लागै, “ओए रै प्रभु, ऐसी पौरैशै ऐबै तौ बुरै बांस आए रौए, जिथुखै ऐसी मोरयों खै चार दूस हौए गौवै।” 40यीशुए तियौंखै बौल़ौ, “का मोऐं ताखै ना बुली थी कै जै तू बिशवाश कौरलै तौ तू पौरमेशवर कै महिमा कै दैखली।” 41तोबै तिनुऐ सैजा पाथर होटोऊवा, यीशुए स्वर्ग कै ढौबौ दैखैयो बौल़ौ, “ओए रै पिता, हांव तैरा धन्यवाद कौरु कै तू मैरै शौणै पाए। 42औरौ हांव जाणुए कै तू सौदा मैरी शुणैए, पौरौ जू भीड़ आंडे-पांढे मैरै धोरे खौड़ै औसौ, तिनकी बौजैह शै मोऐं ऐजौ बौल़ौ, जिथलैई सै बिशवाश कौरौ, कै तुऐं मुखै भैजै राए।” 43ऐजौ बौलेयौ खै तैणै बौड़ै जोर शै धाव दै, “ओए रै लाजर, बांईडा आ!” 44लाजर जू मौरे गौआ थिया, सै कोफनी लैई हाथ लात बानेयोंदे बायरै आया औरौ तैसकौ मुँह खोटणो लैई लोपेटियोंदो थियु। यीशुए तिनुखै बौल़ौ, “ऐसकै कोफनी कै खोटणो खोले दैव औरौ ऐसी जाणौ दैव।”
यीशु कै खिलाफ साजिश
(मत्ती 26:1-5; मर 14:1-2; लूका 22:1-2)
45तोबै जू यहूदी लोग मरियम कै साथै आए रौवै थिए, औरौ तिनुऐ यीशु का ऐजा काम दैखा, औरौ तिनुमुंजी बौहितै लोगै यीशु पांदी बिशवाश कौरा। 46पौरौ तिनुमुंजी दै किछै यहूदी लोगै फरीसी लोगौ कै धोरे जायौ खै यीशु कै ऐसी काम कै बारै मुंजी बौतौऊ।
47इयौं बातौ पांदी मुख्य यहूदी पुरोहिते औरौ फरीसी लोगै महासभा कै लोगौ कै कौठै कौरेयौ बौल़ौ, “आमै का कौरु? ऐजा आदमी तौ बौहितै चौमत्कार कै काम दिखांव। 48जै आमै ऐसी इबी नी रुकु, तौ सौबवे आदमी ऐसी पांदी बिशवाश कौरदै कै सै मसीह औसौ औरौ रोम देश की सैना आयौ खै अमारै मन्दिर औरौ अमारै लोगौ कै नाश कौरे दैंदै।” 49तोबै तिनु मुंजीदा कैफा नांव का ऐक आदमी जू यहूदी सभा कै सदस्य मुंजीदा ऐक थिया, औरौ तियौं सालो का महायहूदी पुरोहित थिया, तिनुखै बौल़ौ, “तुऐं किछै बै ना जाणौ। 50औरौ ऐजौ बै ना सौमझौ, कै तुऔं कारिए ऐजौ ठीक औसौ कै सारै लोगौ कारिए सिरफ ऐक आदमी मोरो औरौ अमारै सौबै लोग नाश नी हौंव।” 51ऐजै बात तैणै आपी खै ना बुली, पौरौ तियौं सालो का महायहूदी पुरोहित कै भैषो दै तैणै ऐजै पौरमेशवर कै ढौबौशै बातौ बौतैई, कै यीशु पूरै इस्राएल देश कारिए मौरदा। 52पौरौ सिरफ तिनु कारिए ना मौरदा। सै पौरमेशवर कै ओकी संतान कारिए बै मौरदा जू इयौं दुनिया पांदी बिखरेयोंदे औसौ, ताकि तिनु कौठै कौरे सौकौ। 53इथकारिए तैसी दूसौ दै ऊबै यहूदी नेता यीशु खै मारणौ कै चाल चालदै लागै। 54इथकारिए यीशु तैसी सौमय शै यहूदी लोगौ मुंजी सौबी कै सामणै ना घूमी, पौरौ तिथैदा शुनशान जौगैह कै नेड़िक कै प्रदेश कै एप्रैम नांव कै ऐकी नोगरो कै हौटै गौआ, औरौ आपणै चैलै कै साथै तिथी रौंदा लागा।
55औरौ यहूदी लोगौ का फसह का तैयार नेड़िक थिया औरौ बौहितै सारै लोग फसह दै औगौड़ियौ गांव पौरैशै यरूशलेम शहर कै हौटै कै आपी खै शुध्द कौरौ। 56औरौ सैजै यीशु खै जौंदै लागै औरौ मन्दिरो दै खौड़ै हौयौ खै आपी मुंजी बौलदै लागै, “तुऐं का सुंचौ? का सै तैयारो मुंजी ना आन्दा?” 57मुख्य यहूदी पुरोहिते औरौ फरीसी लोगै ऐजा आदैश दैय राए थिया, कै जै कुणिए ऐजौ जाणौए कै यीशु कुकै औसौ तौ बौताए दैया कै आमै तैसीखै गिरफ्तार कौरे सौकु।
Currently Selected:
यूहन्ना 11: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
