MARKU 11

Yeesu aniaj Jerusalem

(Mat 21.1-11; Lúk 19.28-40; Joŋ 12.12-19)

1Bi ba wokan bi Jerusalem, ni untab wi ka n jaka wi Betfage, ni wi ka n jaka wi Betaania, di kajara untunda Mëoliwa, a Yeesu yël bafetsul batëb, 2na ja bukul: “Nda tsëpan untab un ci wink tsi bërun ind. Uniaj ind rul, ndë tsënk ubuk-ubúuru tana, wi ñaan netse wi rija; nda paci, ndë tsiji. 3A uci ñaa n ja ind: ‘We ka wun ndë ro ko wi?’ Ndë jaul, Ajug afier; ka kakani tsi, inkri.”

4A ba tsënk ubuk-ubúuru tana tsi kawok pëlëman pëbuem, tsi bëga; a ba paci. 5A balon bañaan tsi ban ci biki tsul ja bukul: “Wee ndu pacar wun ubuk-ubúuru wi?” 6A ba yank bukul bi Yeesu ro bi ja bukul ba ja; a ba wët bukul.

7Ba tsëpand ubuk-ubúuru umënts wun abandand di Yeesu, a ba paf iŋi-bëtiem bukul tsi ruets, a Yeesu rija. 8A bañaan bacumal liap iŋi-bëtiem bukul tsi bëga; a balon liap ina mko yi ba fali yi di bëreeŋ. 9#Iya 118.25,26Ba yër biki bërun, ni ban dukee biki ufets, kë lië koo ja: “Osana! Ni kan bi ink tsi katim Ajug, abeenira! 10Pësien asini nja Dawid pi kan bi pink, abeenira! Osana di tsëko tsan pe tsi pëci di ruets!”

11Bi Yeesu niaj bi Jerusalem, di kato-kayëman, a na teen ngëko bëlieng ajëkëlan. Bi u ruka bi ci bëtakala, na pën ni bafetsul untaaja bukun ni batëb atsëp Betaania.

Bëfíigu ban bukats bi

(Mat 21.18-19)

12Tsi unu ucints, upën bukul di Betaania a Yeesu bonats. 13Bi na win bi bufíigu ban tsij bi ito a ba lawanul, a na tsëp pëteen ne ka win ank mbuk tsi bul. Maa bi na band bi tsi bul winats ko, aci koon ito, par roots ci uwal mbuk mfíigu. 14Din, a Yeesu ja bul: “Yaas a ñaan ka kaka re pëbuk tsi wi!” A bafetsul te ko wan.

Yeesu aruak bawaap di Kato-kayëman

(Mat 21.12-17; Lúk 19.45-48; Joŋ 2.13-16)

15A ba band Jerusalem. Bi Yeesu niaj bi kato-kayëman, a na kur përuaki biki ka waap biki, ni biki ka weel biki rul; a na kuutës ngëntabul batsëtsëlan uncaam, ni itsoari bawaap ngëtuuba. 16A niiraants ñaan pëparand ko tsi kato-kayëman. 17#Isa 56.7 Jer 7.11A na jukan bukul aja: “Jakaatsa iink: ‘Kato nji koo rua kato bëñaan pa bañaan ban cits biki Bajudeu bëlieng?’ Maa ind, nda ro kul tsëko kambeku bakiej.”

18A bawiak-bajakan, ni bapican-ngëtsua te ngëko ngan, a bu kë tsas bi bu kë ro bi a bu ka fiŋul. Maa ba lalul, par kandënd bañaan bëlieng apikra tsi bëjukanul.

19Uyër pëcaal, a Yeesu pën ni bafetsul tsi përaasa.

Bëfíigu ban kay bi

(Mat 21.20-22)

20A bëfa, upar bukul, a ba win bufíigu kay te di ibuul. 21Din a Per les ko un par wi, na ja Yeesu: “Rabi! Teenan-e! Bëfíigu bi m jaar bunk ujuatsal, akay.”

22Yeesu yank bukul aja: “Nda kaan u Uwak tsi Nasien-batsi. 23#Mat 17.20; 1Kor 13.2Mán leents ind ucär: Uci ñaa n ja untunda wi: ‘Pënan tsi! Tsëpan kii yër di bërëk;’ a uci na tsijënats ngëwejats ngëtëb di uwaasul, maa na fiaar tsi ko wi na ja wi, u rolaa pa nul. 24Wul ka wun n du n ja ind: Kara ko wi nda yep wi tsi bëñaan, nda waak nda yank! Din ndë ka. 25#Mat 6.14,15Uwal wi nda natsa wi nats koo ñaan, a uci nda tsijar ñaan tsi uwaas, nda jampësaanul, pa Asin ind nan ci di batsi pii jampësa ind buts ngëjuban ind.” [ 26Maa uci nda jampësaats, Asin ind nan cii di batsi di kee jampësa ind ngëjuban ind buts.]

Yeesu ayepara ko wi na tsënkanaan wi përo ngëko

(Mat 21.23-27; Lúk 20.1-8)

27A ba witsa Jerusalem. Bi Yeesu kë yandaar bi di kato-kayëman, a bawiak-bajakan, ni bapican-ngëtsua, ni bawiak Bajudeu baandi tsi nul. 28A ba yeparul aja: “Wee m tsënkanaan wun përo ngëmënts ngi? Oo, yën u un pëtsënkan përo ngul?” 29A Yeesu ja: “Mán yepar ind përim pëloole; nda yankin, din ka leents ind ko wi n tsënkanaan wi përo ngëmënts ngi. 30Bëmijan Joŋ, apënë-ni di Nasien-batsi oo tsi bañaan-bajin-a?” 31A ba tseendëlar ibats, a ba ja: “Uci ngë ja: ‘Di Nasien-batsi,’ në ja: ‘A we ka wun nda Uwakatsul?’ 32Maa uci ngë ja: ‘Tsi bañaan-bajin, ha...’” Bë lal kandënd bañaan; par bañaan bëlieng bu Uwak, Joŋ, tsi ucär, aci nayëlia. 33Din, a ba yank Yeesu aja: “Wund meets.” A Yeesu ja bukul: “Nji buts, in di ka leents ko wi n tsënkanaan wi përo ngëmënts ngi.”

Currently Selected:

MARKU 11: KPKNT

Highlight

Copy