MATEU 5
5
Bëjukan Yeesu di ruets untunda
(Lúk 6.20-23)
Ba naak biki
1Bi Yeesu win bi indënd bañaan, a na paiya ruets untunda. A na tsoar, a bafetsul tsëp ee wokul. 2A na kur pëjukan bukul koo ja:
3“Bu naak, ban ci biki baranj tsi uwejats, par pësien batsi aci piic bukul!
4 #
Isa 61.2
Bu naak, ban ci biki tsi rug, par bu kee raaca!
5 #
Iya 37.11
Bu naak, ban ci biki bajuab-ngëwaas, par bu kee rukanda umundu!
6 #
Isa 55.1,2 Bu naak, ban bonatsar biki bëmabal a ba lofëntsar bul, par bu kee suetsana!
7Bu naak, ban ci biki bayëk-ipës, par bu kee yëkara ipës!
8 #
Iya 24.3,4 Bu naak, ban ci biki bajënts ngëwaas, par bu kee win Nasien-batsi!
9Bë naak, ban ci biki batsu pëjoabuts tsi bañaan, par bu kee ru jakaa babuk Nasien-batsi!
10 #
1Per 3.14
Bë naak, ban ci biki tsi përeata undo bëmabal, par pësien batsi aci píic bukul!
11 #
1Per 4.14
Nda naak, uwal wi bañaan këkar ind wi, a bu këreat ind, a bu këjaar ind ngëko pëkalam, tsi undo nji!
12 #
2Bën 36.16; Ngë 7.52 Nda lílani, ndë kita, par bëluk ind a ci bëwiak di batsi; par unk di ba reat dun bayëlia ba yëri ind biki bërun.
Pënam, ni ufac
(Mar 9.50; Lúk 14.34-35)
13 #
Mar 9.50; Lúk 14.34,35 Ind ci bukun pënam umundu. Maa uci pënam katse tap, we ka kakanaan wun pul pa tap? Katse ka bëkat; aruka ci pul pëgutsara utsand, bañaan këpoos pul. 14#Joŋ 8.12; 9.5Ind ci bukun ufac umundu. Përaasa pan ci pi tsi untunda yilatsa pëci pan beka pi. 15#Mar 4.21; Lúk 8.16; 11.33Ñaan di ka taban ulamp nëjej ko ka kundëna; maa ka tsu di tsëpafi, din u fiets tsëko pa ban ci biki bëlieng di kato. 16#1Per 2.12Unk buts, ufac ind u fietsan tsi bañaan, pa bu ka win ngëwar ngi nduu ro ngi, bu këbëndan Asin ind nan cii di batsi.
Ko wi ulua ja wi, aroa aba
(Lúk 16.17; 12.58,59; 16.18)
17Ind tsë ja ne man bi pëgar ulua, oo pëgar bëjukan bayëlia; nji i biits pëbaan ngul maa përo ngul m ba. 18#Lúk 16.17Mán leents ind ucär: Tsini batsi ni utsia këpar, ŋal upic un pe wi pëtienkëts, nin ujopat upic tsi ulua, di ka niaman, te ngëko bëlieng ka roaa. 19Nandoi ko un pokaa wi tsi ulon tsi ngëtsua ngan pe ngink pëtienkëts, a nuu jukan bañaan përo unk, kee tsua nan pei pëtienkëts di pësien batsi. Maa nan cii tsi përo ko wi ngëtsua ngëmënts ngi ja wi, a nuu jukan bañaan përo unk, kee tsua nawiak di pësien batsi. 20Par man ja ind: Uci bëmabal ind peets bi bapican-utsaua ni bi Bafariseu, nda ri ka niaj koon këniaj pësien batsi. 21#Pëp 20.13; Ulú 5.17Nda te ko wi bajon jaka wi: ‘M di kë fiŋ ñaan; a nan fiŋi ñaan në wata pëleents.’ 22Maa nji, man ja ind: Nan diabatsari ni ba tsaari, në wata pëleents; a nanjai ni ba tsaari, #5.22 Përim Raka, ko wi pa pac wi aci, Narukësa raka, në wataa pëleents di kato kawat-pëleents kawiak; a na njai ni ba tsaari, nafuur, nii lacana pa nfeernu bërua. 23A uci kë wël bëtseendu tsi bëgij, a m les ni nda tsaari ka ko wi na tsijaru wi di uwaasul, 24júkani bëtseendu tsi bërun bëgij, kë tsëp kii teelar bërun ni ni nda tsaari; a kuu ba, kë witsee kë wël bëtseendu. 25Caran teelar ni bëñaasaru, bi m wama bi m ci ni nul tsi bëga pëtsëp kato kawat-pëleents; ucits ank ba, buñaasaru ka tikanu nawat-pëleents, nawat-pëleents ka tikanu napulis, din kë gutsara ukalabus. 26Mán leentsu ucär: M di kë pëni rul, te m yaa m tuam pëluk bëluk bi m tsua bi. 27#Pëp 20.14; Ulú 5.18Nda te bi u jaka bi: ‘M di kë ro mjubi.’ 28Maa nji, ma n ja ind: Uci ñaan teen ŋaats a na ríul, a jub ba ni nul di uwaasul. 29#Mat 18.9; Mar 9.47Uci pëkësu përíl kë tsuu a kë juban, kuatësi pul kë guts pul pa lawanu; par amat pëjakaa m ranj kaŋí uliafu kaloole, ni pëjakaa uliafu bëlieng agutsa di nfeernu. 30#Mat 18.8; Mar 9.43Uci kañanu kariir kë tsuu a kë juban, falan kul kë guts kul ka lawanu, par amat pëjakaa m ranj kaŋí uliafu kaloole, ni pëjakaa uliafu bëlieng atsëp nfeernu.
Kagar-bënim
(Mat 19.9; Mar 10.11-12; Lúk 16.18)
31 #
Ulú 24.1-4; Mat 19.7; Mar 10.4 A u jaka buts: ‘Ni kan gari bënim aarul, na anul kakaarta kagar-bënim.’ 32#Mat 19.9; Mar 10.11,12; Lúk 16.18; 1Kor 7.10,11Maa nji, man ja ind: Nan gari bënim aarul, te cits uleka ko katuk-ufuts, ka tsuul pëjub. A na nimi ŋaats nan gare bënim, a jubi. 33#Ija 19.12 Ngëp 30.3; Ulú 23.22A nda te buts ko wi bajon jaka wi: ‘M di kë garëndan përo ko wi m baaja wi, maa kë ro ko wi m baaja wi Ajug.’ 34#Jak 5.12 Isa 66.1; Mat 23.22Maa nji, man ja ind: Ind tsë baaja ko; tsi batsi par aci pëtsoari Nasien-batsi, 35#Isa 66.1 Iya 48.3nin tsi utsia par aci tsëpafi iyotsul, nin tsi Jerusalem par aci përaasa Nasien nawiak. 36A te tsë baaja tsi beenu, par m yëlanëts ts pëtsu kaweelu ka faac oo ka jín. 37Uci ee-e kë ja ee-e uci aa-a kë ja aa-a, u laka wi tsul apënë-ni tsi na pëkaalam. 38#Pëp 21.24; Ija 24.20; Ulú 19.21Nda te u jaka: ‘Pëkës ka lukëna pëkës, a përumaj kë lukëna përumaj.’ 39Maa nji, man ja ind: Ind tsë lukan pëkaalam; uci ñaan kobu tsi kambakats kariir, kaŋaniul kacints kun buts; 40a uci ñaan ŋal pëtsëpandu kawat-pëleents pa pëyankënu kamíisau, wëtariul buts kapantu; 41a uci ñaan peeru pëtsëp aa kë ro unkilometar uloole, doan ngëtëb ni nul. 42Na ñaanui ko, tseendanul; a na ŋali pëtsiatsu ko, tsë laaŋul. 43Nda te u jaka: ‘Kë ŋal acintsu, kë bër nabëru.’ 44Maa nji, man ja ind: Nda ŋalan babër ind, ndë ñaandar ban ci biki tsi përiat-riatan ind, 45pa ndë ci babuk Asin ind nan cii di batsi; par atsu unuul a u ja u roon u mayi pa ba kaalam ni bawar; a na tsu usubal a uu subi pa bamabal ni bamabats. 46Par, uci nda ŋal ba ŋal ind biki rin, buom bëluk bi ndii ka bun? Bayep bë bëluk-uraasa, bë ri ka ro ank buts-a? 47A uci nduu leena bayëts ind Bajudeu rin, wee nda ro wun un pe wi? Bameets-nasien-batsi, bu ri ka ro ank buts-a? 48#Ija 19.2; Ulú 18.13Bi u ci bank, nda ciin ban ba biki pëci bawar, bi Asin ind nan cii di batsi ci bi nan bai pëci nawar.
Currently Selected:
MATEU 5: KPKNT
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.