MATEU 3

Joŋ-namijan

(Mar 1.1-8; Lúk 3.1-18; Joŋ 1.6-8,19-36)

1Tsi uwal umënts wun, wi Joŋ-namijan baandi wun di ulaalats Judeeya a nuu leents përim, 2#Mat 4.17; Mar 1.15koo ja: “Nda yaari ibats, par pësien batsi awokani.” 3#Isa 40.3Përim pi ci pun pi Isaaya nayëlia ja pi tsi uleka Joŋ; aja:

“Ñaan ci ank tsi pëlië di ulaalats, a nuu ja:

‘Nda yecisi bëga Ajug;

nda colani ilëlul.’”

4 # 2Bas 1.8 Nul Joŋ, kaŋiul ki bëtiemaleempëna ifaal ungilëm, a na ja na roon në tan katël ka n jand tsi bëlank. Barialaul, aci ngë n jarabuts ni pëwaaj bëreeŋ. 5A bañaan përaasa Jerusalem kë pëni koo ya di nul, ni biki pëboos Judeeya bëlieng, ni ban ci biki di kajara kabulaŋ Jordan. 6A ba ja ba pets ngëjuban bukul, në mijan bukul di kabulaŋ Jordan. 7#Mat 12.34; 23.33Bi Joŋ win bi Bafariseu ni Basaduseu bacumal kë bi di nul pa pëmijana, a na ja bukul: “Ko wi nda ci wi ngëko-pëtsats! Yë n ja ind un nda túk uriab wi kan bi wi? 8Nda pibani ngi nduu ro ngi ci ngi kayaar-ibats, 9#Joŋ 8.33ndë wët pëfäl iyeen ind koo ja tsi ibats ind: ‘Abraam ci-un asin wund.’ Par man ja ind, ni ilaak yi, Nasien-batsi ayëlan pëkaar Abraam upäts. 10#Mat 7.19Pëtibi pëwús yecisa pink ba tsi ibuul mko; bëko ban bëkats bi mbuk mwar, bu kënta bu gutsara bërua. 11Nji, man ci tsi pëmijan ind di mlik, pa pëpibanaan nda yaar ibats. Maa ni kan bii tsi ufets nji, apein pëyëlan-ko. Nul kee mijan ind un di Uwejats-ujënts ni bërua. Nji n tsënkaants pëjaa mán tsijarul iraala. 12Atsij kacäranaani tsi kañanul, pëjëntsanaan koul, u jënts cës, në baar maajul di kalëpats; maa në tër pëtëtar di bërua ban dits bi ka jimba.”

Yeesu amijana

(Mar 1.9-11; Lúk 3.21-22; Joŋ 1.32-34)

13A Yeesu pëni di Galileeya, a na tsëp Jordan pa Joŋ pii mijanul. 14Maa a Joŋ pokul, ajaul: “Nji n fier un wi pëmijanin, a m do um a kë bi tsi nji?” 15A Yeesu yankul, ajaul: “Wamaan wët. Par, unk di ngë ka run pëpiban ngëmabal bëlieng roaa.” A Joŋ niiranul. 16Bi Yeesu kë ba bi pëmijana, a na pëni di mlik. Tsi uyëk umënts wun a batsi waantsar pa nul, a na win Uwejats Nasien-batsi kë welee tsi nul, anaami unk utuuba. 17#Uju 22.2; Iya 2.7; Isa 42.1; Mat 12.18; 17.5; Mar 1.11; Lúk 9.35Din a përim pëni di batsi a pa ja: “Ni ci-un Abuk nji na ŋalee; ma lílandërul mak.”

Currently Selected:

MATEU 3: KPKNT

Highlight

Copy