MATEU 18

Naom pe un pëci nawiak di pësien batsi

(Mar 9.33-37,42-48; Lúk 9.46-48)

1 # Lúk 22.24 Tsi uwal umënts wun, a bafets kika awok Yeesu, a ba yeparul aja: “Yën pe un pëci nawiak di pësien batsi?” 2A Yeesu rui napäts naties ee natsan tsi pëncuaf bukul, 3#Mar 10.15; Lúk 18.17a na ja bukul: “Mán leents ind ucär: Uci nda wëtanats ba bëci ind, a nda witsaats aci pi upäts uties, nda ri ka niaj koon këniaj pësien batsi. 4Wul ka wun, ná welani beenul pi napäts naties ni, ci-un nan pei pëci nawiak di pësien batsi. 5A ná welani napäts naties pi ni, tsi katim nji, nji ni na welan un. 6Maa ñaan nan tsui nalon tsi baties ba uwak bikink tsi nji a na juban, amat na roon në ŋaŋana pëlaak pëwiak tsi katsuts, në gutsa di bërëk. 7Cay umundu, tsi uleka ngëko ngi kan tsu ngi ñaan në juban! Par, kaats bi nga rits bi ka ci; maa cay, ni kan kai ngëko nga kë baandë-ni ñaan! 8#Mat 5.30Uci kañanu, oo pëtsiimu kë tsuu juban, falan kë guts ka lawan. Par, amat wi përukanda kañan kaloole, oo pëtsiim pëloole, kë ci tsi ubiira, ni pëjaa m gutsara bërua ban dits bi ka ba, ni iñan itëb, oo ni këtsiim këtëb. 9#Mat 5.29A uci pëkësu kë tsuu këjuban, kuatësi pul, kë guts pul pa lawanu. Par, amat wi përukanda pëkës pëloole kë kaand ubiira, ni pëjaa m gutsara bërua ban dits bi kaba, ni këkës këtëb.

10 # Lúk 19.10 Nda rukan ibats! Ind tsë be nalon tsi baties biki; par man ja ind, ngëwaanju bukul di batsi aci tsi puu win urostu Asin nji, nan cii di batsi. 11Par, Abuk ñaan-najin abi pëbueran u niam wi.

Unkaanel u niam wi

(Lúk 15.3-7)

12Wee nda ja wun? Uci ñaan ka ngënkaanel useent, a ulon tsi ngul niamënul, di ka ruk ngënkaanel ngëntaaja këwas ngun ni ulon, ni këwas ni ulon, tsi untunda, në ya pëtsas u niam wunk-a? 13Mán leents ind ucär: Uci na yaa na wini, në lílan tsi undo na pean undo ngënkaanel ngëntaaja këwas ngun ni ulon, ni këwas ni ulon nga niamats ngunk. 14Unk buts, cits uŋal Asin ind nan cii di batsi, pa naloole tsi baties biki pëniam.

Pëjampësa ñaan ngëjuban

15 # Lúk 17.3 Uci ni nda tsaari jubanu, tsëpan band ri nul, tsi kambeku, kë ñakanaanul. Uci na cikëndënu, kë me m kakaniul nda tsaari. 16#Ulú 19.15Maa uci na cikëndënatsu, tsijariul ñaan naloole oo batëb, ‘pa ko wi ka ñakanaana wi bëlieng, u ba tsi përim bañaan batëb oo bawaants ban maatir biki.’ 17A uci na pok pëcikëndën bukul, leentsan Ngëriisia ko umënts. A uci na pok buts pëcikëndën Ngëriisia, tsuun nul pi nameets-nasien-batsi, ni pi nayep bëluk-uraasa. 18#Mat 16.19; Joŋ 20.23Mán leents ind ucär: Ko wi nda tan wi ba këtan tsi umundu, wii tanaa di batsi. A ko wi nda pac wi ba këpac tsi umundu, wii pacaa di batsi. 19Mán leents ind ucär kak: Uci batëb tsi ind baar pëloole tsi umundu, tsi ko wi bu kë yep wi ba këyep, Asin nji nan cii di batsi ka wël bukul. 20Par, tsi batëb oo bawaants júk tsi, tsi katim nji, man ci tsi pëncuaf bukul.” 21#Lúk 17.3,4Din, Per wok Yeesu na yeparul ajaul: “Ajug! Ngëyaas um ngi n du n jampësa ngun nan tsaari ni nji, uci na lacin? Te ngëyaas paaj ni ulon-a?” 22#Uju 4.24A Yeesu jaul: “Njnjaatsu te ngëyaas paaj ni ulon, maa ngëyaas ngëntaaja paaj ni ulon, te ngëyaas paaj ni ulon.

Naleemp nan ditsi ka yëkar ñaan ipës

23Wul ka wun, pësien batsi anaam pi nasien na ŋali përo baleempul unkoont. 24Bi na jot bi përo unkoont, a u ka nalon nan baandandee tsi nul; a tsijarul ngëmiil untaaja (10.000) #18.24 Taleentu: Aro ci ulon uncaam Gëreesia. Taleentu dëloole, aci ngëmiil paaj (6.000) Dinaariu.Taleentu. 25Bi na kaats bi ko wi nu lukëna wi, a nawiakul tsuul na waapa, nul ni aarul ni upätsul, ni bëkaul bëlieng, pëlukëna batsiats. 26Naleemp yër tsi utsia, a na jintëla tsi bërun nawiakul, a na jaul: ‘Míirain, mee n luku bëlieng.’ 27Nawiakul yëkarul ipës, na wëtanul, na jampësaul batsiatsul. 28Bi naleemp namënts un pën bi tsul, na jëk ni acintsul naleemp, nan tsijaruli useent tsi uncaam wi ka n jaka wi #18.28 Dinaariu: Aro ci-uncaam Rooma; aci bëluk naleemp, unu uloole.Dinaariu. A na mobul tsi katsuts amiep, a na jaul: ‘Lúkan batsiats bi m tsiatsin bi!’ 29A acintsul naleemp namënts un yër tsi utsia, na buaraul aja: ‘Míireen, mee luku.’ 30Maa na pok, a na pënandul aguts di ukalabus, te uwal wi na luk wi ko wi na ka wi pëluk. 31Bi bacintsul baleemp win bi bi ngëko par bi ja, ba juatsan mak; ba tsëp ee leents nawiak bukul bi ngëko par bi ja. 32Din, nawiakul ruiul, a na jaul: ‘M ci naleemp na waraatsee! Ma n jampësau batsiatsu bëlieng, undo m dúgarin; 33a m kaats m doon kë yëkar buts acintsu naleemp ipës bi n yëkaru bi a?’ 34Nawiakul riabats mak, a na gutsarul bawaay ukalabus ba pikaarul mak, te uwal wi na luk wi bëlieng ko wi na ka wi pëluk. 35Unk di Asin nji di batsi kë ro ind run buts, uci kara ñaan tsi ind jampësaats acintsul tsi uwaasul.”

Currently Selected:

MATEU 18: KPKNT

Highlight

Copy