LÚKAS 9

Yeesu yël bapostolu, untaaja ni batëb

(Mat 10.5-15; Mar 6.7-13)

1Yeesu rui bapostolu, bë ci-untaaja ni batëb, na wël bukul uyëlan ni pëyëlan përuak ngëcaay tsi bañaan, ni pëyësan bañaan mmaak. 2Na yël bukul pëleents bañaan ngëko pësien Nasien-batsi, ni pëyësan bamoj. 3Aja bukul: “Upënar ind bëyaas, ind tsë tsëpand ko; ind tsë tsëpand nin pëndog, nin kamaañ, nin bariala, nin uncaam. Te, ñaan tsë tsëpand imíisa itëb. 4Uja kato ki nda niaj ki, ndë tsoar rul aa ndë pëndul. 5#Ngë 13.51#Lúk 10.4-11Tsi ba welanats ind tsi, upën ind tsi përaasa pëmënts nda raafan kandëpe ka pën tsi itsiim ind, pa pëpibanaan ba lac.” 6A ba pën atsëp, bu kë yaana ngëntab, koo leents Upetsan-uwar; a uja tsi ba ya tsi, bu ka yësan bañaan.

Eroodis katse me bi nu ro bi

(Mat 14.1-12; Mar 6.14-29; Lúk 3.19-20)

7 # Mat 16.14; Mar 8.28; Lúk 9.19 Eroodis, nasien kajara Galileeya, ate ngëko ngan par ngi bëlieng, a katse me ko wi nu ro wi, par aka ba nja biki: “Joŋ-namijan natsee un tsi bacäts;” 8balo n ja: “Eliyas, nayëlia, pibandari un;” a balon kak ja: “Nalon tsi bayëlia bajon natsee un di pëcäts.” 9Maa, Eroodis ja: “Man tsu Joŋ a na falaa been; a naom ci-un namëntsan, ni n te ank nu ro ngëko ngan?” A nuu tsas pëwinul.

Yeesu ro bawitsa upom

(Mat 14.13-21; Mar 6.30-44; Joŋ 6.1-14)

10Bi bapostolu witsee bi, a ba leents Yeesu ngëko ngi ba ro ngi, ngul bëlieng. Na pënand bukul alaayatsaand, kajara përaasa pi ka n jaka pi Betësaida. 11Indënd bañaan kë me ko wan, ba fetsanul, a nee welan bukul, na ci tsi pëñakanaan bukul tsi uleka pësien Nasien-batsi; na yësan ban fier biki pëyësana. 12Unu kë wokan pëyër, bapostolu untaaja bukun ni batëb tsëp awokul, a ba jaul: “Wëtani kandënd bañaan ki ba tsëp ngëntab nga fay ngink tsi, ni ngëntab ireeŋ, bu kee ka tsi bu kë fër-na tsi, ni ko wi bu kë re wi. Par, tsëko tsi ngë ci tsink alaayatsa.” 13Maa Yeesu ja bukul: “Nda wëlan bukul bariala, ind bërier ind.” Ba yankul, aja: “Ko wi wund ka wi, peets këpom kañan, ni ngëtsëb ngëtëb; uroko ne wund pëya pii weeli bariala, pa bañaan biki bëlieng.” 14Par bë ci tsul bayënts ban duakan biki gëmíil kañan. Din, Yeesu ja bafetsul: “Nda tsuun bukul ba tsoar, ba ro ijúk; kara bëjúk bë ruakan bañaan ngëntaaja kañan.” 15Ba ro unk, ba tsoaran bañaan bëlieng. 16A Yeesu jej këpom kañan kun, ni ngëtsëb ngëtëb ngun, na kat këkës akaŋan batsi, na beenir ngul, a na cëtës upom ni ngëtsëb, a na colan bafets ba wël kandënd bañaan. 17Ba riala aa ba suëts bëlieng. A ko wi ba rukësan wi ci këcaa untaaja ni këtëb ki itawësar.

Per ayëkëran Yeesu ci-un Këristu

(Mat 16.13-23; Mar 8.27-33; Joŋ 6.66-69)

18Aka bëlon bëyaas, Yeesu laayatsa bañaan a na ci tsi bëñaan; bafets aci ni nul. A na yepar bukul, aja: “Yën ni indënd bañaa n ja un man ci?” 19#Mat 14.1,2; Mar 6.14,15; Lúk 9.7,8Ba yankul aja: “Aka biki ka nja biki, m ci Joŋ-namijan; balon kë ja, m ci Eliyas; a balon kak kë ja, m ci nalon tsi bayëlia bajon, na natsee di pëcäts.” 20#Joŋ 6.68,69Na yepar bukul, aja: “Maa ind, yën ni nda ja un man ci?” Per yank aja: “Wi ci-un Krëstu Nasien-batsi.” 21Din Yeesu tsu bukul përits les koon këles ñaan ko wan.

Yeesu ñakan tsi uleka unoor wi nu noor wi, ni pëcäts pi nu cäts pi

(Mat 16.20-28; Mar 8.30—9.1)

22Na ja bukul kak: “Abuk ñaan-najin aka pëtsua tsi unoor uwiak. Bawiak Bajudeu, ni bawiak-bajakan, ni bapican-ulua, bu ka fatsul ufets, në fiŋa, a uu ba, në natsee di pëcäts tsi unu uwaajantsan.” 23#Mat 10.38; Lúk 14.27Din, na ja bukul bëlieng: “Ñaan na ŋali pëfetsin aka pëbër ngiicul, në lap kruusul kara unu, nuu fetsin. 24#Mat 10.39; Lúk 17.33; Joŋ 12.25Par, na ŋali pëbueran ubiiraul, ka niam wul. Maa, na niamani ubiiraul undo nji, në bueran wul. 25We kat wun koon ñaan pëgaañaar umundu upëban, maa në niaman beenul, oo në cok beenul? 26Par, ñaan nan kawee tsi undo nji ni irim nji, Abuk ñaan-najin kee kawa tsi undoul, ubiul ni përëmbul, ni pi Asin, ni pi ngëwaanju ngëyëman. 27Maa mán leents ind ucär: Aka balon tsi ba nats biki tsi, kaats bi bu kë teenaman bi pëcäts, aa bu ka tsënkëna ka win pësien Nasien-batsi.”

Bënaam Yeesu witsësar

(Mat 17.1-13; Mar 9.2-13)

28Bi u par bi ko u wokan wi ngënu këwas bi Yeesu ja bi irim yan, na tsëpand Per, ni Joŋ, ni Jakob, a nee paya untunda pa bëñaan. 29Bi na ci bi tsi bëñaan, bënaam urostuul witsësar, iŋiul witsa ifaacal faŋ, a yu lik-lik. 30Din, bayënts batëb kë ñakan ni nul; aci Moises ni Eliyas, 31pibandar bukun di përëmb, a bu kë ñakanaan tsi uleka upënar Yeesu, bi u ka bi pëci Jerusalem di nu pënëna run. 32Per ni bacintsul pea ni bëŋooy mak. Bi ba teeni bi, ba win përëmb Yeesu, ni bayënts batëb ban ci biki ni nul. 33Bi bu kë ruk bi Yeesu, a Per jaul: “Nawiak! Awara nja pëci tsi; nda ju ngë leemp ngënkundan ngëwaants: ulon pa wi, ulon pa Moises, ulon pa Eliyas.” Per añakan ank, maa meets ko wi na ci wi tsi pëja. 34Bi na ci bi tsi pëja ngëmënts ngan, kasa bi ee kund bukul; bi kasa kë kund bi bukul, ba lënk. 35#Isa 42.1; Mat 3.17; 12.18; Mar 1.11; Lúk 3.22#2Per 1.17,18Përim pëni di kasa, pa ja: “Ni ci-un Abuk nji, nan datee; nda cikëndëniul!” 36Ujaka përim pan, Yeesu ruka koorul. Tsi ngënu ngëmënts ngun, bë yëŋandar, bë leentsats ñaan ko wi ba win wi.

Yeesu yësan napäts niints ni ucaay niaji

(Mat 17.14-23; Mar 9.14-32)

37Tsi unu uneki wi, bi Yeesu ni bafetsul welee bi di untunda, a kandënd bañaan kawiak jëk ni nul. 38Din, nalon niints lie tsi pëncuaf kandënd, aja: “Najukan! Man buarau teen abuk nji ni, niints, par aci ni n buki koorul. 39Aka ucaay un ja wi u mobul, din në lie ucar umënts wun, në yër bëcats, mtum kë pën pëlëts, uu lupanul, te di ka car pëwëtanul. 40Man ñaan bafetsu ba ruak wul, maa bë yëlaants.” 41A Yeesu yankul, aja: “Ind bañaan ntsari! Nda ranj uwak, a nda colandats! Mán ci ni ind, koo n miira ind te lum-i? Biindi abuku tsi.” 42Bi nu wokani bi Yeesu, ucaay watul tsi utsia, u tsuul a na yër bëcats. Din Yeesu leentsar ucaay ujuatsal umënts, na yësan napäts, a na kakanul asinul. 43A Bañaan bëlieng pikra, undo përëmb Nasien-batsi.

Bi ba wama bi pikra bëlieng tsi uleka ko wi Yeesu ro wi bëlieng, na ja bafetsul: 44“Nda rukan ibats tsi irim yi: Abuk ñaan-najin ka gutsa tsi iñan bañaan-bajin.” 45Maa bë meets ko wi përim pan pac wi. Akunda bukul pa ba rits me ko wi pa pac wi; te bë yeentsats pëyeparul ko tsi pul.

Naom pe un pëci ñaan nawiak?

(Mat 18.1-6; Mar 9.33-37)

46 # Lúk 22.24 Bëlon bëyaas, bafets Yeesu mob mantotëlër, pa pëme nan pei pëci ñaan nawiak tsi bukul. 47A Yeesu me ibats bukul, na jej napäts naties awokaraand, 48#Mat 10.40; Lúk 10.16; Joŋ 13.20na ja bukul: “Na welani napäts naties ni, tsi katim nji, awelanin. A na welanini, awelan na yëliini. Par, nan pei pëci ñaan naties tsi ind bëlieng, ci-un ñaan nawiak.”

Ñaan na natsaraatsee pëkamanu, aci ni wi

(Mar 9.38-40)

49Din, Joŋ ja: “Nawiak, wund awin ñaan a nuu ruak ngëcaay tsi katimu, pa nga pëni di bañaan; a wund pokul përo ank, par cits ni wund tsi pëfetsu.” 50Yeesu jaul: “Ind tsë pokul. Par, ñaan na natsaraatsee pëkaman ind, aci ni ind.”

Bañaan ulon untab Samaaria, bë welaants Yeesu

51Bi ngënu pëpaya Yeesu batsi woki bi, a na baaraan pëtsëp Jerusalem. 52Na wëtan bañaan ni kayëlia, ba yërul bërun. Ba tsëp, bee niaj untab bañaan Samaaria, pëyecisul. 53Maa, bañaan untab welaantsul, par Jerusalem di na pënar run. 54#2Bas 1.9-16A bafetsul, Jakob ni Joŋ, kë win ko wan, a ba ja: “Ajug! M ŋal wund ja bërua ba pëni di batsi, bii jasan bukul-a?” 55Maa, Yeesu witsësa, na leentsar bukul [aja: “Nda meets uwejats wi nda ci wi. 56Par, Abuk ñaan-najin biits pa pëniaman bañaan, maa pëbuëran bukul.”] Din, a ba repa bëga pëtsëp ulon untab.

Unoor ñaan nan ci tsi pëfets Yeesu

(Mat 8.19-22)

57Bi ba repa bi bëga pëtsëp, a u ka na njai A Yeesu: “Mán fetsu, tsi kë tsëp tsi ba këtsëp.” 58Yeesu jaul: “Ngëcuts aka iyar, a ngëko-ngëyits ka icang. Maa Abuk ñaan-najin kaats tsi nuu naakësaan tsi been.” 59A Yeesu ja nalon: “Fetsin.” Namëntsa n jaul: “Ajug! Wëtin n tsëp bërun kee n mooy asin nji.” 60Maa, Yeesu jaul: “Wëtan bacäts, ba mooy bacäts bukul. Maa wi, tsëpan kuu leents uleka pësien Nasien-batsi.” 61#1Bas 19.20A nalon kaka ja Yeesu: “Ajug! Mán fetsu, maa wëtin n tíil bërun bañaan kato nji.” 62Maa, Yeesu ja: “Ñaan nan ci tsi kajaar, a nuu witsand ufets, katats tsi pësien Nasien-batsi.”

Currently Selected:

LÚKAS 9: KPKNT

Highlight

Copy