LÚKAS 3

Joŋ-namijan aleents përim

(Mat 3.1-12; Mar 1.1-8; Joŋ 1.6-8,19-36)

1Aci tsi uwaanu untaaja ni uñanatsan, ki Tibeeriu, nasien nawiak sien ki, a Ponsiu Pilaatus ci na tsijëna-pëboos Judeeya; a Eroodis sien Galileeya; a Filip nan tsaari ni nul sien Itureeya ni Trakoniitis; a Lisaanias sien Abileene; 2a Anas ni Kayafas pe kun pëci bawiak-bajakan. Tsi uwal umënts, Nasien-batsi wëtani përimul tsi Joŋ, abuk Sakaria, di ulaalats. 3Joŋ yaana kajara bërëk Jordan bëlieng, nuu leents bañaan uleka bëmijan, undo kayaar-ibats, pa ka jampësaa ngëjan kul, 4#Isa 40.3-5bi u picana bi ja tsi ulibëru un tsij wi irim Isaaya, nayëlia; iink di u picana run:

“Ñaan lië ank di ulaalats, aja:

‘Nda yecis bëga pa Ajug,

nda colani ilël pa nul;

5bëyoond ban ci bi-ba këci, ka cumanaa;

untunda un ci wi-ba këci, uwiak ni uties, ka welanaa;

ngëmbeera ngan cika ngi, ka cikësaa;

iga ilaak, ka liingëlanaa;

6din bañaan ka win bëlieng pëër Nasien-batsi.’”

7 # Mat 12.34; 23.33 Joŋ kë ja indënd bañaan ban bi biki nee na mijan kul: “Kajër ngëko-pëtsats! Yë n ja ind un ind pëtuk nda lawan uriab wi kan bi wi? 8#Joŋ 8.33Nda pibani nda yaar ibats, ndë wët pëfal iyeen ind koo ja tsi ibats ind: ‘Abraam ci-un asin wund.’ Par ma n ja ind: Ni ilaak yi, Nasien-batsi ayëlan pëkaar Abraam upäts. 9#Mat 7.19Pëtibi pëwús yecisa pink ba tsi iul mko; bëko ban kats bi mk mwar, bë kënta, bë gutsara bërua.” 10Kandënd bañaan yeparul, aja: “Bi u ci bank, we wi wund ka wun përo-i?” 11Joŋ yank kul, aja: “Nan kai imíisa itëb, na faari ni nan kaatsi. Nan kai bariala, na roon ank buts.” 12#Lúk 7.29A u ka bayep bëluk-uraasa ban bi biki buts, pa pëmijana. Ba ja Joŋ: “Najukan! We wi wund ka wun përo?” 13Na ja kul: “Ind tsë tsu ñaan bëluk nda paran ko wi nda tsua wi pëtsu.” 14A u ka basondaari ba yeparul biki buts, ajaul: “We wi wund ka wun përo, wund buts?” Na ja bukul: “Ind tsë caana ñaan bëkaul, te ind tsë tsupar ñaan; nda liingan tsi bëluk ind.” 15Bi bañaan-ucaak watsar bi, kë ja bëlieng tsi ibats kul ne Joŋ ci-un ank Këristu 16Joŋ ja kul bëlieng: “Nji, mán mijanaan ind mlik. Maa nan peini ka bi, në mijan ind di Uwejats-ujënts ni bërua. Nji n tsënkaants pëjaa mán pacul katanëni iraalaul. 17Atsij kacaranaani di kañanul, pëjëntsanaan koul, u jënts cës; nu ba, në baar bëmaaj di kalëpatsul, maa në tër pëtëtar di bërua ban dits bi ka ba.” 18Unk, ni irim icumal, yi kaliinc-liincan ngëwaas, Joŋ kë leents bañaan Upetsan-uwar. 19#Mat 14.3,4; Mar 6.17,18Maa Eroodis nasien, nul ni Joŋ leentsari undo Eroodia aar ni ba tsaari, ni undo ngëko ngi Eroodis ro ngi bëlieng, nga waraatsa ngi, 20na ru watsës ko wi tsi ngul bëlieng: Aríc Joŋ di ukalas.

Yeesu amijana

(Mat 3.13-17; Mar 1.9-11; Joŋ 1.32-34)

21Bi bañaan bëlieng kë mijana bi, Yeesu mijana buts; bi na ci bi tsi bëñaan, batsi waantsar, 22#Uju 22.2; Iya 2.7; Isa 42.1; Mat 3.17; Mar 1.11; Lúk 9.35Uwejats-ujënts welee tsi nul, anaami unk utuuba. Përim pëni di batsi, pa ja: “Wi ci-un Abuk nji na ŋalee; man lílandëru mak.”

Pëka Yeesu

(Mat 1.1-17)

23Yeesu ka kur uleempul, na wokan pëka ngëwaanu ngëntaaja ngëwaants. Nul Yeesu, ajaka aci abuk Juse, nan ci abuk Eli. 24Eli aci abuk Matati, nan cii abuk Lewi; Lewi aci abuk Melki, nan cii abuk Janai; Janai aci abuk nalon Juse; 25Juse namëntsi aci abuk Matatias, nan cii abuk Amos; Amos aci abuk Naun, nan cii abuk Esëli; Esëli aci abuk Nagai; 26Nagai aci abuk Maati, nan cii abuk nalon Matatias; Matatias namëntsi aci abuk Semei, nan cii abuk Juseki; Juseki aci abuk Joda. 27Joda aci abuk Joanan, nan cii abuk Resa; Resa aci abuk Sorobabel, nan cii abuk Salatiel; Salatiel aci abuk Neri; 28Neri aci abuk nalon Melki, nan cii abuk Adi; Adi aci abuk Kosan, nan cii abuk Elëmodan; Elëmodan aci abuk Er; 29Er aci abuk Josue, nan cii abuk Elieser; Elieser aci abuk Jorin, nan cii abuk nalon Matati; Matati namëntsi aci abuk nalon Lewi. 30Lewi namëntsi aci abuk Simeon, nan cii abuk nalon Juda; Juda namëntsi aci abuk nalon Juse, nan cii abuk Jonan; Jonan aci abuk Eliakim; 31Eliakim aci abuk Melea, nan cii abuk Mena; Mena aci abuk Matata, nan cii abuk Natan; Natan aci abuk Dawid; 32Dawid aci abuk Jese, nan cii abuk Obed; Obed aci abuk Boas, nan cii abuk Salëmon; Salëmon aci abuk Naason, 33Naason aci abuk Aminadabi, nan cii abuk Adëmin; Adëmin aci abuk Arni, nan cii abuk Esrom; Esrom aci abuk Peres, nan cii abuk nalon Juda; 34Juda namëntsi aci abuk Jakob, nan cii abuk Isaak; Isaak aci abuk Abraam, nan cii abuk Tara; Tara aci abuk Naor. 35Naor aci abuk Serugi, nan cii abuk Ragau; Ragau aci abuk Faleki, nan cii abuk Eber; Eber aci abuk nalon Sala; 36Sala aci abuk Kainan, nan cii abuk Arfasadi; Arfasadi aci abuk Sem, nan cii abuk Noe; Noe aci abuk Lamek; 37Lamek aci abuk Metusela, nan cii abuk Enoki; Enoki aci abuk Jaredi, nan cii abuk Maleleel; Maleleel aci abuk nalon Kainan; 38Kainan namëntsi aci abuk Enos, nan cii abuk Seti; Seti aci abuk Adam, nan cii abuk Nasien-batsi.

Currently Selected:

LÚKAS 3: KPKNT

Highlight

Copy