LÚKAS 22

Judas aniiran pëya Yeesu ufets

(Mat 26.1-5,14-16; Mar 14.1-2,10-11; Joŋ 11.45-53)

1 # Pëp 12.1-27 A ufesta kare-upom un tsijats wi bëko-bëlëntsantsaani kë wokani, wi ka n jaka wi Ufesta-pëbuër. 2A bawiak-bajakan, ni bapican-ulua kë tsas bi bu kë ro bi pa Yeesu pëfiŋaa, par bë lal bañaan. 3Din a Useetaani niaj Judas, ni ka n jakee Iskarioti, nul nan ci nalon tsi bapostolu untaaja bukun ni batëb; 4na ya ee ñakan ni bawiak-bajakan, ni bawiak bawaay kato-kayëman, tsi bi nu ro bi a në guts Yeesu tsi iñan bukul. 5A ba lílan mak, ba baar pëloole pa pëwëlul uncaam; 6Judas niiran, a nuu tsas uwal u wara wi pëguts Yeesu tsi iñan bukul, te kandënd bañaan di ka maatir.

Ufëri Yeesu utuami

(Mat 26.17-30; Mar 14.12-26; Joŋ 13.21-30; 1 Kor 11.23-29)

7Unu baandi, un ci wi unu kare-upom un tsijats wi bëko-bëlëntsantsaani, wi pëjakan Ufesta-pëbuër. 8A Yeesu yël Per ni Joŋ, aja bukul: “Nda tsëpan ndii yecis Ufesta-pëbuer, pa nja ka re wul.” 9A ba yeparul ajaul: “Tsum tsi m ŋal tsun wund yecis wul?” 10Na yank bukul, aja: “Uniaj ind përaasa, din u ka ñaan ni kan jëki ni ind, a tsij pëliiki mlik; nda fetsanul te di kato ki nu niaj ki, 11ndë ja ajug kato: Najukan aja: ‘Pëfër pëtsooŋatsaani aci tsum, tsi ndu n deena tsi Ufesta-pëbuer ni bafetsin?’ 12Din, në piban ind pëfër pëwiak di ruets kato, pan yecisa pi ngëko; nda yecis ufesta rul.”

13A ba tsëp, bee tsënk u ci bi Yeesu ja bi bukul; ba yecis Ufesta-pëbuer. 14Uwal kë band, a Yeesu tsoar bariala, bapostolu ci ni nul; 15a na ja bukul: “Man dí përe Ufesta-pëbuer wi ni ind, tsini nduka ka ci tsi unoor. 16Par ma n ja ind, in katse ka n de wul yaas, te uwal wi u baar wi pëci di pësien Nasien-batsi.” 17Din Yeesu jej karaani, na baran, na ja: “Nda jejan ko wi, ndë faar tsi nda ci tsi. 18Par má n ja ind, pëpën tsi inkri pëya bërun, in katse ka n daan pëwat mbuk bëbiiñu, te ubaandi pësien Nasien-batsi.” 19Din, a na jej pëpom, na baran, na cëtës pul, na wël bukul, na ja: “Ko wi, aci uliaf nji, u wëla wi pa ind. Nda ru kuu ro ko umënts wi, pa pëlesënin.” 20#Jer 31.31-34Tsi uleka karaani, bi ba ba bi kare ufëri, na ro unk buts, aja: “Karaani ki, aci Karo-pëloole kawalu tsi pëñaak nji pan tulaa pi pa ind. 21#Iya 41.10Maa nda teenan-e! Kañan ni ka yaini ufets ci kink ni kamiñ tsi bariala. 22Par, Abuk ñaan-najin, ka tsëp, bi u ka bi pëci. Maa cay ñaan ni ka yaul ank ufets!” 23Din a bapostolu kur pëyepëlar tsi ba ci tsi, naom tsi bukul ka un pii ro ko wan.

Naom pe un pëci ñaan nawiak

(Mat 20.25-28)

24 # Mat 18.1; Mar 9.34; Lúk 9.46 Ba bi mob mantotëlër, pa pëme naom tsi bukul wina un na pe pëci ñaan nawiak. 25A Yeesu ja bukul: “Basien bañaan ban cits biki Bajudeu, bë ja ba roon bu kë sienëna bañaan bukul uyëlan; a biki ka mandaar biki tsi bukul kë jakaa Baro-ngëwar. 26#Mat 23.11; Mar 9.35#Mat 20.25-27; Mar 10.42-44Maa ind, nda kaats pëci ank; nan pei pëci nawiak tsi ind, na ciin pi nan pei pëci naties; a na wiaki ko, na ciin pi nasirbir. 27#Joŋ 13.12-15Par, nan tsoari bariala, ni nan ci tsi pësirbir, naom pe un pëci nawiak? Cits nan tsoar unk bariala-a? Maa tsi pëncuaf ind, nji n ci ink pi nasirbir.

28Ind, nda ci ban tambandar biki tsi pëci ni nji tsi mteen-teenana mi n par-na mi. 29Mán kaar ind pësien, bi Asin nji kaarin bi pul; 30#Mat 19.28pa ndë riala, ndë raan ni nji, di pësien nji; ndë tsoar tsi itsoari-pësien, pa ndë wat këbuka Israel untaaja kun ni këtëb pëleents.”

Yeesu car aleents Per kë fatsul ufets

(Mat 26.31-35; Mar 14.27-31; Joŋ 13.36-38)

31“Simon, Simon, teenan-e! Useetaani ayep ind, pa u roon u way ind pi mmaaj. 32Maa nji, man ñaandaru, pa uwaku tsë niaman. A wi, uwal wi m kaki wi, kë liinc-liincan ban tsaar biki ni wi.” 33Per yankul, aja: “Ajug! Man yecis pëtsëp ni wi, ŋal ank ukalabus, ŋal ank u ci pëcäts.” 34Maa Yeesu ja: “Per! Ma n jau, uguk ka ruka ka aan ntsari, kë bërin aa ngëyaas ngëwaants.”

Ngëlaac ngëtëb

35 # Mat 10.9,10; Mar 6.8,9; Lúk 9.3; 10.4 Din, a Yeesu yepar bukul, aja: “Bi n yël ind bunk, a n ja ind, ind tsë tsëpand nin pëkalëpa, nin kamaañ, nin iraala, nda bi ranj iink ko-a?” Ba yankul, aja: “Nin ko.” 36A na ja bukul: “Maa inkri, nan kai pëkalëpa, na tsëpandi pul. Nan kai kamaañ, na tsëpandi kul buts. A nan kaatsi ulaac, na waapan kapantuul, në weelëna wul. 37#Isa 53.12Par ma n ja ind, përim pan picana pink, aka përolaa tsi nji; iink di pa ja run: ‘Abofana tsi baro-ngëko-kawaraatsa.’ Par, ko un jaka wi tsi uleka nji, band wink pëci.” 38A bafetsul ja: “Ajug! Teenan-e! Ngëlaac ngëtëb nguu ngi.” Na ja bukul: “Akës!”

Yeesu ci tsi bëñaan di Getsësemani

(Mat 26.36-46; Mar 14.32-42; Joŋ 18.1)

39A Yeesu pën atsëp untunda Mëoliwa, bi na wakëtsa bi përo; bafetsul fetsul. 40Nu band tsëko tsëmënts, a na ja bukul: “Nda ñaanan ind përits yër tsi kafal.” 41Nul, na kikësa bukul, tsi ko wi ñaan yëlan wi pëtap pëlaak. A ba jintëla, na ñaan 42aja: “Paapa! Uci m ŋal, lawanin karaani unoor ki. Uŋal nji tsë rola, maa wiicu.” 43[Uwaanju batsi pibandar tsi nul, a u watsësul uyëlan. 44Bi na juatsan bi, na ru pe këpe pëmob tsi bëñaan; mcíbiul witsësa ci pi ngëjopat pëñaak ka tolar ngun utsia.] 45Bi na natsa bi tsi bëñaan na band tsi bafetsul, na tsënk ba yër bëŋooy, par bë juatsan. 46A na ja bukul: “We! Nda ŋooy-a? Nda natsaan, nda ñaanan, pa nda rits yër tsi kafal.”

Pëmoba Yeesu

(Mat 26.47-56; Mar 14.43-50; Joŋ 18.2-12)

47Bi Yeesu wama bi ka ñakan, din kandënd bañaan baandi, nalon tsi untaaja bukun ni batëb, ni ka n jaka unk Judas, yëri un bukul bërun; akika awok Yeesu pa pëwúnkëraul. 48Maa Yeesu jaul: “Judas! Kë ya Abuk ñaan-najin, ufets ni mawunkëlër-a?” 49Ban ci biki ni Yeesu, bi ba win bi ko un yecis wi pëci, a ba ja: “Ajug! Wund ka tib ni mawunkëlër-a?” 50A nalon bukul tib naleempar nan pei pëci nawiak-bajakan, afalul kabats kariir. 51Maa Yeesu yank bukul, aja: “Nda wëtan, aliing!” A na këraraul kabats, na yësanul. 52Din, a Yeesu ja bawiak-bajakan, ni bawiak bawaay kato-kayëman, ni bawiak Bajudeu, bukul ban bi biki pa pii mobul: “Nda pëni bi ni ngëlaac, ni ngëndog, pi pëmob nakiej-a? 53#Lúk 19.47; 21.37Man do nja ka ra unu, ka ci ni ind di kato-kayëman, te nda lakatsin kañan, maa uwal ind band wink, ni uyëlan karëm.”

Per apok meets Yeesu

(Mat 26.69-75; Mar 14.66-72; Joŋ 18.15-18,25-27)

54Din a ba mob Yeesu, ba tsëpandul ee niajan di kato nan pei pëci nawiak-bajakan. A Per rukaul tsi ufets alawan. 55Bërua tabana tsi umetaari bëlay, bañaan tsoar tsëloole; A Per tsoar tsi pëncuaf bukul. 56A nampëli naleemp winul tsi na tsoar tsank tsi ufacar bërua, na teenul uwar, na ja: “Ni buts, aro ci ni nul.” 57Maa Per pok, aja: “Ŋaatsi, in meets namëntsan a!” 58Jonats, nalon niints kë winul, a na ja: “Wi buts, m ci nalon tsi bukul.” Maa Per ja: “Niintsi, in citsul.” 59Upar ko pi uwoora, a u ka niints nalon kak na mobi tsi pëja: “Aci ucär, ni buts aro ci ni nul, par aci buts nagalileeya.” 60Maa Per ja: “Niintsi, in meets ko wi kë ja wank!” Bi Per wama bi ka ñakan, uyëk umënts wun a uguk aan. 61Ajug witsësa, na kaŋan Per këkës, din Per les përim Ajug pi na jaul pi: “Uguk ka ruka ka aan ntsari, kë pok m meetsin aa ngëyaas ngëwaants.” 62A na pën acil utsand, na rug, ajuatsan mak.

Basondaari ci tsi përiat Yeesu, a bu kë tucanul

(Mat 26.67-68; Mar 14.65)

63Bayënts ba mob biki Yeesu tsij, bë ci tsi përiatul, bu kë tucanul. 64A ba ja ba tanul këkës, bu kë yeparul koo ja: “Leentsan-e! Yën kobu un?” 65Bu kë jaul ilon irim icumal, yi ikar.

Yeesu atsëpanda kato kawat-pëleents kawiak

(Mat 26.59-66; Mar 14.55-64; Joŋ 18.19-24)

66Unu kë fa, a bawiak bañaan-ucaak, ni bawiak-bajakan, ni bapican-ulua, júk. Yeesu tsëpanda rul, di kato kawat-pëleents kawiak; 67a ba jaul: “Uci wi ci-un Këristu, leents wund.” A Yeesu yank bukul, aja: “Uci n leents ind, nda ri ka fiaar; 68a uci n yepar ind përim, nda ri ka yankin. 69Pëkur tsi inkri, Abuk ñaan-najin ka tsoar di kariir pëyëlan Nasien-batsi.” 70A ba yeparul bëlieng aja: “A wi ci-un Abuk Nasien-batsi-a?” Yeesu yank bukul, aja: “Ind bërier ind, nda ja man ciul.” 71A ba ja: “We wi ngë fierar wun kak, wi ka leentsa wi? Ngë te bërier nja ko wi na ja wi ni mtumul.”

Currently Selected:

LÚKAS 22: KPKNT

Highlight

Copy