LÚKAS 19

Yeesu ni Sakeu

1A Yeesu niaj Jeriko, a na par tsi përaasa. 2Aka nalon niints ni kanjakee Sakeu, aci nawiak tsi bayep bëluk-uraasa, na ciind narëmb. 3A na ci tsi pëtsas pëwin nan ci Yeesu, maa yëlanats, undo kandënd bañaan, par nul arungët. 4Na tukar bërun, a na paya #19.4 Bësikomoor: apënë-ni tsi përim “Sikomoor” aci bëlon bëko di ucaak Israel, anaam unk bëcalambësikomoor pa pëwin Yeesu, par aka pëpar-na tsul. 5A Yeesu kë band tsëko tsëmënts tsun, na teen duets, a na jaul: “Sakeu! Welee ucar, par mán ka pëciina katou ntsari.” 6A Sakeu welee ucar, na welan Yeesu ni ulílan. 7Ba win biki bëlieng ko wan kë ŋëmŋëm koo ja: “Atsëp ee tsooŋatsaan di niints najuban.” 8Maa Sakeu natsa, na ja Ajug: “Ajug! Teenan-e! Mán wël baranj umetaari bëka nji; a uci n fal ñaan a yankënul ko, ka kakanul aa ngëyaas ngëbaakër.” 9Din, Yeesu jaul: “Pëbuer abaandi ntsari tsi kato ki. Par namëntsi buts, aci abuk Abraam. 10#Mat 18.11Par Abuk ñaan-najin, abi pëtsas ba niam biki, në bueran bukul.”

Yeesu tib përim anaamanaan baceenc uwëru

(Mat 25.14-30)

11Bi bu kë cikëndën bi ngëmënts ngan, a Yeesu tib përim, par aruka wokan Jerusalem, a u naam bukul ne pësien Nasien-batsi ka pibandar tsi uyëk umënts wun. 12Din, a na ja: “Aka nalon ñaan nan bëkee tsi pëbuka pëwar. Na pën atsëp ucaak ulawal, pa pii yank pësien, në witsee. 13Na rui bañaan untaaja tsi baluekul; a na wël bukul untaaja #19.13 Mina: Aro ci ulon uncaam di Gëreesia. Mina dëloole, aci Drakëma 100.Mina. Na ja bukul: ‘Mán tsëp; nda rukaan nda leempëna wul aa uwitsee nji.’ 14Maa bañaan ban bof biki ucaak ni nul, bu ñaasul; a ba yël bañaan tsi ufetsul, bee ba ja: ‘Wund ŋalats namëntsi pësien wund.’ 15Bi na yank bi pësien a uu ba, na witsee; a na mandaar përui baluekul, biki na ro biki wël uncaam, pa pëme ko wi kara ñaan gaañaar wi tsi ko wi na ro wi. 16Nacak abaandi, a na ja: ‘Ajug! Pëminau abëkan këmina untaaja.’ 17A na ja naluek: ‘M do uwar, naluek nawar! Bi m mob bink tsi ngan tiesëts ngi mak, ciin ni ka mandaari tsi këraasa untaaja.’ 18A natëbantsan baandi, na ja: ‘Ajug! Pëminau abëkan këmina kañan.’ 19A na ja naluek namënts un: ‘Wi buts, ciin ni ka mandaari tsi këraasa kañan.’ 20Nacints baandi, a na ja: ‘Ajug! Pëminau, pul pi. Man do m bëb pul di kaleenj, a n patsan pul tsëko; 21Par ma lalu, undo bi m ci bi ñaan na liinci tsi ko unjaka wi; kë jej ko wi m júkaants wi, a kë cët ko wi m wayaants wi.’ 22A na ja naluek namënts un: ‘Irimu bërier yul i ndu n watënu yun pëleents, wi naluek na waraatsee! M do me n ci ñaan na liinci tsi ko un jaka wi, a ndu n jej ko wi n júkaants wi, a ndu n cët ko wi n wayaants wi, 23a m do um a m júkaants uncaam nji di bank? Koo n baandi, ka ro yank wul ni ko wi u bëkan wi.’ 24Din, a na ja ba maatir biki: ‘Nda caaniul pëmina pun, ndë wël pul nan ka unk këmina untaaja.’ 25A ba jaul: ‘Ajug! Nul aka ba këmina untaaja.’ 26#Mat 13.12; Mar 4.25; Lúk 8.18Na ja bukul: ‘Man ja ind: Nan kai, nii wëlaa. Maa nan kaatsi, nii caanaa ŋal ko wi na ka wi. 27#Mat 25.14-30Maa ba ñaasin bukunk, ba ŋalats bukunk ndoon ka sien bukul, nda tsiji bukul tsi, ndë fiŋ bukul tsi bërun nji.’”

Yeesu aka kape, uniajul Jerusalem

(Mat 21.1-11; Mar 11.1-11; Joŋ 12.12-19)

28A Yeesu ja ko wan a nuu ba, na yër bërun pëkata pëtsëp Jerusalem. 29Nu wokan Betfage, ni Betaania, tsi kajara untunda wi kanjaka wunk untunda Mëoliwa, a na yël batëb tsi bafets, 30na ja bukul: “Nda tsëpan untab wi tsi bërun. Uniaj ind rul, ndë tsënk ubuk-ubúuru tana, wi ñaan netse wi rija; nda pacan wul, ndë tsiji wul. 31Uci ñaan yepar ind: ‘We ka wun ndu pac wul?’ Ndë jaul: ‘Ajug afier wul.’” 32Biki Yeesu yël biki tsëp a bee tsënk u ci bi na ja bi bukul. 33Bi ba ci bi tsi pëpac wul, bajug wul ja bukul: “We ka wun ndu pac ubuk-ubúuru?” 34A ba yank bukul aja: “Ajug afier wul.” 35Ba tsëpand wul di Yeesu. A ba liap iŋi bukul yi bëtiem tsi ruets wul, ba rijan Yeesu. 36Bi na ci bi tsi pëtsëp, bañaan kë liap iŋi bukul yi bëtiem tsi bëga. 37Bi na ruka bi wokan kajara ki untunda Mëoliwa welara kunk, kandënd bafets bëlieng ci tsi ulílan, bu kë lië, bu kë bëndan Nasien-batsi, undo ngëko bawitsa bëlieng, ngi ba win ngi. Bu kë ja:

38 # Iya 118.26 “Nasien ni kan bi ink tsi katim Ajug, a jara ngëwar!

Pëfac, pa ciin di batsi; përëmb, pa ciin di tsëko tsan pe tsi pëci di ruets.”

39Tsi kandënd bañaan, aka Bafariseu ban ja biki Yeesu: “Najukan! Leentsari bafetsu!” 40A na yank bukul, aja: “Man ja ind, uci ba yëŋandar, u ci ilaak ka lië yun.”

Yeesu arugar Jerusalem

41Uwokanul përaasa a nu win pul, na rugar pul; 42aja: “Uci pëjaa tsi unu wi, wi buts m me ko wi ka wëlu wi pëfac! Maa inkri, ko umënts abekau a m winats wul; 43par ngënu ka biiniu, ngi babëru kë jëp ngi tsëbekënee ba fayësanu, bu ka fayu, bu ka miepu ngëjara bëlieng; 44bu ka fam-famanu, ni upätsu ban ci biki di bametsuu. Bë ri ka ruk tsi wi pëlaak tsi ruets pëcints pul, par m yëkëranats uwal wi m wúlaa wi.”

Yeesu tsëp kato-kayëman

(Mat 21.12-17; Mar 11.15-18; Joŋ 2.13-16)

45A Yeesu niaj kato-kayëman, din na kur përuaki bawaap; 46#Isa 56.7; Jer 7.11na ja bukul: “Ko wi picana wun: ‘Kato nji ka ci kato buñaan;’ maa ind, nda ro kul tsëko kambeku ngëwayu.” 47#Lúk 21.37A nuu jukan di kato-kayëman, kara unu. Bawiak-bajakan ni bapican-ulua ni bawiak bañaan-ucaak kë tsas pëfiŋul. 48Maa bë meets ko wi ba yëlan wi përo, par bañaan bëlieng bë baar ibats tsi pëcikëndënul.

Currently Selected:

LÚKAS 19: KPKNT

Highlight

Copy