LÚKAS 16

Yeesu tib përim, anaamanaan na tsijëna bëka na mabatsi

1A Yeesu ja buts bafetsul: “Aka narëmb nan kai ni na tergaari bëkaul na tsijëna; a narëmb bi leentsa namënts unja na roon nuu cokul bëka. 2Narëmb mandaar përuiul, a na jaul: ‘We ci wun wi ndu n te wink tsi ulekau? Pibani bi m leempëna bi bëka m ja. Par, m katse ka tsijëna bëka nji.’ 3Din, naleemp ja tsi ibatsul: ‘Wee ndu ndo wun-i? Par nawiak nji ka pënanin ink tsi pëtsijëna bëka. Pëjëp? In yëlaants, Bëñaan? Man kawa. 4Ma me ko wi ndu ndo wi, upënana nji tsi pëtsijëna bëka, u ka biki ka welanin biki di ito bukul.’ 5Din, a na rui ban tsiats biki nawiakul, naloole-naloole; na ja nacak: ‘Um di m tsiats run nawiak nji?’ 6Na yankul aja: ‘Ngëntankin useent, ngi mkër.’ Na jaul: ‘Moban kakaartau ki batsiats; tsoaran ucar, kë pican ngëntaaja kañan.’ 7A na ja nacints: ‘A wi, um di m tsiats run?’ A na yankul aja: ‘Ngësaaku useent, ngi mmaaj.’ Na jaul: ‘Moban kakaartau ki batsiats, kë pican ngëntaaja këwas.’ 8A nawiak bëndan namabats ni na tergaar unk bëka na tsijëna, undo bi na ro bi ngëko ni bëlipal. Par babuk umundu wi, bë lip tsi ngëko ngi bu kë ro ngi bacints bukul apean babuk ufac. 9Man ja ind: Bëka ban pënëni bi tsi kamabats, nda tsasëni bul ifetsar, pa uwal wi bëka bi ka baan ind, ifetsar imënts yun ka welan ind di ngënkundan bukul ngan dits ngi ka coka. 10Ñaan na mobi tsi ngëko ngëties, në mob buts tsi ngëwiak. A ñaan nan ci namabats tsi ngëko ngëties, aci buts namabats tsi ngëwiak. 11Bi u ci bank, uci nda mobats tsi bëka ba mabats bi, yën ka tergaar ind un bëka bëcar? 12A uci nda cits ba mob biki tsi ko ñaan, yën kee wël ind ko un ci wi wiic ind? 13#Mat 6.24Kaats naleemp nan yëlani pëleempar bawiak batëb tsi uyaas uloole. Par, na ro ank ba, në ka ni nu ñaasi, në ŋal nacints; oo në mob tsi nalon, në beeng nacints. Nda yëlants pëleempar Nasien-batsi, ndë tankëlaand pëleempar Bëka.” 14Bafariseu, bukul baŋal-uncaam, bu kë te ko wan bëlieng a ba ci tsi përiatul. 15A Yeesu ja bukul: “Ind, nda ci ban ja bukunk ba roon bu kë tsu iyeen bukul pëci bamabal, tsi bërun bañaan-bajin; maa Nasien-batsi ame ngëwaas ind. Par, ko un dëmbanaa wi tsi bërun bañaan-bajin, añutsan tsi bërun Nasien-batsi.

16 # Mat 11.12,13 Ulua, ni bayëlia, aleentsaa te uwal Joŋ. Pëpën tsi uwal umënts wun te inkri, Upetsan-uwar pësien Nasien-batsi ci tsi pëleentsaa, a uja nandooni në tambandar mak, pa pëniaj tsi pul. 17#Mat 5.18Ape përaf batsi ni utsia pëpar, ni pëjaa ujopat upic tsi Ulua ayër. 18#Mat 5.32; 1Kor 7.10,11Nanduaki aarul a na nim nalon ŋaats, aro mjubi; a na nimi ŋaats ni ayënul ruaki aro mjubi.”

Nalon narëmb, ni Lasaru

19“Aka nalon narëmb nanjai na roon nu tiema iŋi ijankal caw, a i ñats mak. A na ja kara unu në ci tsi ulílan, nuu kul. 20Nalon naranj, ni kanjakee Lasaru, ja na roon në piints tsi pëlëman pëbuem kato narëmb; uliaful acum ni ngëcoontsësa. 21Na ja na roon në ŋal përe irukësar i ka yëri yi tsi umesa narëmb, maa u ci ngëbëus ka bi ngun ngii ru lajul ngëcoontsësa.

22A naranj bi cats, ngëwaanju tsëpandul, na bi ci tsi Abraam ci tsi. Narëmb bi cats buts, na mooya; 23di mcats na ci tsi unoor uwiak; a na kat këkës, na win Abraam di tsëko tsan lawan tsi, a Lasaru ci tsi Abraam ci tsi. 24Din a na lië, aja: ‘Paapa, Abraam! Jampësain këjampësain kë yël Lasaru na yuag bëjul pëkuanjul di mlik pa pëjuabutsaanin pëndiamënt, par man ci tsi unoor uwiak tsi bërua bi.’ 25Maa Abraam jaul: ‘Napats! Lesan m yank ngiicu ngëwar tsi ubiirau, a Lasaru, nga waraatsa ngi; maa inkri ajuabëtsana uwaas tsi. A wi, m ci tsi unoor uwiak. 26Te, baar bëwiak atsua, pëpën tsi wund pëya di ind, pa ba ŋal biki pëpën tsi pëya di ind, bë ri ka yëlan, nin pëpëni run pëbi tsi wund.’ 27Na yankul, aja: ‘Man ñaanu këñaanu paapa, yëlan Lasaru di kato asin nji; 28par man ka bañaan kañan biki wund tsaar biki; na leentsan bukul, pa ba rits bi buts tsi tsëko unoor tsëwiak tsi.’ 29Abraam jaul: ‘Bu tsij Moises, ni bayëlia; ba cikëndëni bukul.’ 30Na yank Abraam, aja: ‘Nin a, paapa, Abraam! Par uci nalon pën di bacäts atsëp di bukul, din bu ka yaar ibats.’ 31Maa Abraam jaul: ‘Uci ba cikëndënats Moises ni bayëlia, ŋal ank nalon ka natsee di bacäts bë ri ka waak.’”

Currently Selected:

LÚKAS 16: KPKNT

Highlight

Copy